Read Samburu Asat 19 Bible Online

Asat 19 - Samburu bible

Asat 19

¹Kore etii Apolos Korinto nelo Paulo Epeso tee nkejek aim nkoitiei naimaa ldonyuo, neirrachu teinie lkuti ooiteng'eni

²neipar ajoki, <<Amaa payie irukuruk, itumo Ltau Sinyati?>> Newoliki aajoki, <<Tapala inia nijo itumo, eitu abaki kining aajo keatae Ltau Sinyati>>

³Neipar Paulo ajoki, <<Naaku aa kipatisare eipatisaki ntae?>> Nejoki, <<Nkipatisare e Yoana.>>

⁴Nejoki ꞉Paulo, <<Kore Yoana, naa keipatisiche nkipatisare naitodolu ajo keirriidua ltung'ani ng'ok, netiaka aitoki ltung'ana meiruko ilo kenya olotu tesiedi ninye, naa Yeso taa ilo.>>

⁵Kore payie ening ana, neipatisi ta nkarna e Laitoriani Yeso metaa lenyena,

⁶neiteleki Paulo ninche nkaik nejing ꞉Ltau Sinyati, neng'asu airo too nkulie kutukie neibonicho.

⁷Naa kebaya lolo lewa tomon o oare pooki.

⁸Kore taa lapatin okuni nejing Paulo sinagogi, neirorie te mpijan ltung'ana ootii inie eimaki, neiteyielo sipat ee mbaa naaipirita Nkitoria e Nkai.

⁹Kake kore lkulikae lenche neitogol nkuechi, neaany ilo rerei edek inia oitiei e Laitoriani ening'ito ltung'ana pooki. Nelo Paulo aing'uaa ninche, neya looiteng'eni aorie lolo Yiaudi. Kore mperot pooki neiteng'enicho taatua nkaji naiteng'enichereki e Tirano.

¹⁰Neas ana taa larin okuni metaa kore ltung'ana pooki otii inia kop e Asia, nening rerei la Laitoriani, peera Lyiaudi o Lgirriki.

¹¹Neas Nkai mbaa e nking'asia kutuaa taa nkaik e Paulo,

¹²metaa kore nkitampaani o nankan naaiseyie sesen lenye, nepuo aaiteleki ltamoyia, neichiu moyianitin, neipung'u sii lairiruani aaing'uaa ninche.

¹³Kore lkuti Yiaudi oaamanaa chiaake emiraa lairiruani, nesaan aaipotoki nkarna e Laitoriani Yeso lolo oaata lairiruani ejo, <<Kore ta nkarna e ilo Yeso olikorita ꞉Paulo, empung'u!>>

¹⁴Naa layiok apa sapa la laitainoni kitok obo la lasar oji Sikepa oaasita ana.

¹⁵Kake kore payie ejo empung'unyie lairiruani, newoliki ꞉lairirua ninche ajoki, <<Kayielo nanu Yeso, nayielo Paulo, kake oong'ae irara ntae?>>

¹⁶Kore ilo tung'ani oata ilo airirua, neipirriki neidimu ninche, near oleng ana mekueta aaipung te inia aji meata nankan, era oleng.

¹⁷Kore payie ening ꞉lolo pooki oaamanya Epeso inia, peera Lyiaudi o Lgirriki, neiput ꞉ngureticho, neisis nkarna e Laitoriani Yeso.

¹⁸Kore lkumo loo lolo ooiruko Yeso, nepuonu aalimu neibalunyie ntorrok pooki naataasa.

¹⁹Neyau loibonok kumo apa ooibonicho mbukui enche kumo naaibonichere tekue ltung'ana nepejoo. Kore payie eikeni nowua ntoki nanya, naaku kebaki laata e ltung'ani ee larin ip nabo o osom o sapa.

²⁰Kore rerei la Laitoriani, nelo kue abulaa oleng neitodolu ngolon enye.

²¹Kore eicha kuna baa, nedung ꞉Paulo ta ltau lenye ajo kelo Yerusalem, aim nkop e Makedonia o ne Akayia. Nejo, <<Kore atabayie inie, naa meata sii ajo malo Rrom.>>

²²Nereu Timoti o Erasito oara laretok lenyena oare nkop e Makedonia, nebik ninye peneu te inia kop e Asia.

²³Kake kore te inia ng'amata, neipung'u long'olng'oli kitok oleng te Epeso taa mbaa naipirita Nkoitiei e Laitoriani.

²⁴Amu keatae lkunoni oji Demeterio, oitibir nkitanyanyukot e nkaji nkai e sapare naji Artemis, tee senke e nkocholai. Kore apa ilo siaai lenye naa keyaka dikir kitok lolo arriyiak ootuwuana ninye.

²⁵Neipotu lolo asiaayiak pooki oaas siaai otuwuana ilo lenye nejoki, <<Lolewa kulo, mara iyielolo aajo ele siaai kitumie parakuoicho ang?

²⁶Kore taata, naa ining'itoto nidolitata aajo kore ele tung'ani oji Paulo naa keibelekenya, neitopong'oo ltung'ana kumo te Epeso o too lubot kumo oleng e Asia ajoki, <Kore nkaitok naaitibira ꞉nkaik ee ltung'ana naa mara nkaitok!>

²⁷Naa mara ake siaai lang apeny oidim nelau rrepeta, kake kore sii nkaji e nkai ang kitok naji Artemis, nasai ltung'ana pooki le nkop pooki e Asia o nkop pooki nalulung'a, naa keidimi neitaae meitoki nedoyio sii nkitoo enye.>>

²⁸Kore payie ening ninche ana, neiputakino ngoro nebuak aajo, <<Keikitok Artemis ee ltung'ana le Epeso!>>

²⁹Neing'olng'ola ilo kerenket pooki, nejo lolo tung'ana dii aakuetiki inie netumoreki, neibung Gayo o Arisitarko ltung'ana le Makedonia ooirukurukore apa Paulo to lototo enye.

³⁰Kore payie ejo Paulo tijing'a tekue lolo tung'ana nemitiki ꞉looiteng'eni.

³¹Kore abaki lbata loo lkutuaa le inia kop oaara sotuatin lenyena, nerewaki Paulo lkilikuai aalej payie melo atua inie netumoreki.

³²Kore teinie netumoreki neing'olng'ola, ebuak lbata loo ltung'ana aajo nkae toki, nejo kulie nkae, nemeyielo lkumo aajo aanyo payie eotuo inie.

³³Neipung'unyie ꞉Lyiaudi Alekisanda meyeu kue, nejoki ꞉lkulikae taatua ilo turrur ninye meiroro. Neapaki ninche nkaina metigirata payie etum atilimu nkiroroto enye.

³⁴Kake kore payie eyielou aajo loo Lyiaudi ninye, nebuak ninche matejo saai are to ltoilo obo ejoito, <<Keikitok Artemis ee ltung'ana le Epeso!>>

³⁵Kore lkitok oitore ilo kerenket, neitigir ninche nejoki, <<Loo tung'ana kulo le Epeso, kalo tung'ani lemeyielo ajo kore lkerenket le Epeso naa ninye etii nkaji e nkai kitok naji Artemis o nkitanyanyukoto enye natodowua te chumata?

³⁶Naa kore naa amu kebore ana, keyiere payie igirara niakuku ltung'ana ooineneng mbaa.

³⁷Amu iyeuta kulo tung'ana ene, abaki eitu epur nkajijik ee nkaitok ang, anaa edek ninche.

³⁸Kore naa tanaa keatae ltung'ani oatayie ꞉Demeterio o lolo boitieii lenyena oaas siaai otuwuana ilo lenye lomon, keatae naa nkata nadung'ieki nkiguana, neatae loodung. Enchoo naa eara ninche maate.

³⁹Naa kore tanaa iatata lkulie omon, naa keyiere nedung'i te nkiguana naichiaakino nkitanapat ang.

⁴⁰Amu kore ana netiu taata, naa keidimi neochieki iyioo ana, tankaraki ng'olng'ol naji ikiyeutua. Nemeatae nikijo tana ng'olng'ol nikinyoyie.>>

⁴¹Kore payie eidip aatejo ana, neboloo ilo turrur.