Read Samburu Asat 20 Bible Online

Asat 20 - Samburu bible

Asat 20

¹Kore payie eichunye inia ng'olng'ol neipotu ꞉Paulo lolo ooiruko Kristo. Nerreten neicho lesere neinyuototo alo nkop e Makedonia.

²Kore eimaa nenia lubot nerreten aitoki lolo ooiruko Kristo oleng, nebaya nkop e Akayia,

³newuon teinie lapatin okuni. Kore etaa keinyuototo alang nkare alo Siria, neyielou ajo keyieita ꞉Lyiaudi neiko tenear ninye metua, nedung arrinyo alo aim Makedonia.

⁴Neirukurukore ninye ꞉Sopater layieni le Parro oing'uaa Berea, neitoki sii aairukurukore lkulie tung'ana oare ooing'ua Tesalonike ooji Arisitarko o Sekundo, o Gayo oing'uaa Derbe o Timoti o lkulikae ltung'ana oare le Asia ooji Tikiko o Toropimo.

⁵Neituruk ninche pooki aapuo aanyu iyioo te Tiroa.

⁶Kore payie eichunye ntasim ee mukateni nemeisiichieki, nikinyuototo te Pilipi aalang mpaso, nikipuo mperot imiet ana matabaki Tiroa netii lolo tung'ana ooituruko tekue iyioo. Nikibik teinie mperot sapa.

⁷Kore ta mparri e Jumapili, nikitumo tenebo aagil mukate e ndaa e Laitoriani. Neirorie ꞉Paulo ltung'ana, naa kore amu keyieu apa nelo teneikenyu, neitoodor nkiroroto ana metaa kiji kuarie.

⁸Kore apa inia aji nikitumore naa kebore lkilang'ilang'eta.

⁹Newuon lbarnoti obo oji Yutiko to long'u le inia aji. Kore eitoodorita ꞉Paulo nkiroroto enye, neyiasai ilo barnoti neilura pii nesulari to nkurupa e uni e inia aji nikitii, nenang nkop. Kore payie errapuni, naaku ketua.

¹⁰Nedoyio Paulo nepetaa, nemuatu ta nkaik enyena nejo, <<Emimputukuny, amu keichu ninye.>>

¹¹Neitoki Paulo achuko ailiep, negil mukate e ndaa e Laitoriani, nenya pooki tenebo. Neitoki alo kue airorie ninche oleng ana meikenyu, neinyuototo alo.

¹²Neyae ilo barnoti nkang eichu, neng'ida ꞉ninche oleng.

¹³Kore iyioo lkulie nikinturuk aapuo aadir meli, nikipuo Asos payie kiya Paulo teinie, amu inia apa etudung'o ninye ayieu payie elotu tee nkejek.

¹⁴Kore payie kitumo o ninye ta Asos, nikintoomon metidiru meli nikipuo lkerenket le Mitilene.

¹⁵Kore mparri naijipu inia, nikipuo teinie matinyikaki aaing'urare lkuran le Kios. Neikenyu nikilang'aki Samos, kore mparri naijipu inia nikibaki lkerenket le Mileto.

¹⁶Naa ketudung'o apa ꞉Paulo payie erepaa te meli Epeso payie meimalmal te Asia. Amu keyieu apa nesioyo alo Yerusalem, paa tanaa keidimai netii inie ta mparri nanyae ntasim e Pentekost.

¹⁷Kore etii Mileto, nereu lkilikuai Epeso, meipotuni lpayiani le nkanisa.

¹⁸Kore payie ebau nejoki, <<Iyielolo naikuna apa payie awuon tenebo o ntae nkata naado ang'asu inia parri ekue natabawua nkop e Asia.

¹⁹Kaisiaayia Laitoriani to mborron pooki o te sina, natumo ntemat kutuaa tankaraki nayieu ꞉Lyiaudi payie aar matua.

²⁰Niyielolo sii aajo meatae hoo ntoki naata tipat taa ntae naisudoyie. Kore tekue ltung'ana pooki o taa nkang'itie inchi naa katilikoyie naiteng'eniche Lomon Supati le Nkai,

²¹aliki Lyiaudi o Lgirriki nchere meata ajo meibelekenyakino Nkai, neiruk Laitoriani lang Yeso.

²²Katudung'o taata ta ltau lai ajo kalo Yerusalem, namayielo mbaa naaipung'oki teinie.

²³Kake kore too lkerenketi pooki naa kaaitodolita Ltau Sinyati aitisipu ajo kaaeni, natum sina.

²⁴Kake maiken nanu nkichon ai aitaa toki mara ake payie atum aidipa ana lototo ai o ele siaai laatipika ꞉Laitoriani Yeso nkaik ainien matilikoi Lomon Supati oipirita munyani e Nkai.

²⁵<<Naa kore taata, ateyielo ajo kore ntae pooki laimayie natilika nkitoria e Nkai naa mikingilgil aadol.

²⁶Naaku kaliki ntae sipata ana parri, nchere maaipotieki teneimina lobo linchi.

²⁷Amu eitu hooyia aisudoo nanu eitu aliki ntae kipirte pooki natipika ꞉Nkai.

²⁸Naa entodol naa ate o mboo pooki ee nkerra naatipika ꞉Ltau Sinyati nkaik inchi payie irritata, aaku lchekuti le nkanisa e Nkai nainyieng'ua to lodo le Nkerai enye.

²⁹Kayielo ajo kore payie alo aing'uaa ntae, naa kejing'u suyiani oonyecho atua ntae, lemepal inia boo.

³⁰Amu kore taatua ntae, naa keipung'u ltung'ana ooiro aakord sipata, payie eitopong'oo looiteng'eni meirukurukore ninche.

³¹Naaku naa entirripicho iparrurru aajo kore taa larin okuni eitu apal maitaarriyian pooki ng'ae linchi kuarie o parkiji aichirita.

³²<<Naa kore taata, atung'aka ntae Nkai o rerei le munyani enye ooidim aterretena ntae, neicho ntae inia naitaanyitae ntae metaa ninchi tenebo o lolo oogeluno.

³³Neitu apa ang'uar ropiyiani anaa nankan e ltung'ani.

³⁴Iyielolo ntae aajo taa nkaik ainien maate aitaka koon o lboitieii lainien nenia nikiyieu.

³⁵Kore tee nenia pooki nataasa naa kaitodolita ntae ajo meata ajo mikiret loomena aas siaai oleng, kiparru rerei la Laitoriani Yeso payie ejo, <Imayiana tininchoyoo alang tinikinchori.> >>

³⁶Kore payie eidip atiaki ninche nejia, negil kung aomon tenebo o ninche pooki.

³⁷Neichir pooki nemuatu Paulo taa nkaik, negus aaicho lesere.

³⁸Naa kore ntoki naisinanie ninche oleng naa inia natiaaka, nchere meigil aitoki aadol nkomom enye. Neduaaki taa ninye meli.