Read Samburu Asat 21 Bible Online

Asat 21 - Samburu bible

Asat 21

¹Kore payie kincho lolo payiani le nkanisa lesere, nikinyuototo aaipidari alang mpaso aapuo lkuran oji Kos, neikenyu nikipuo likae lkuran oji Rodes, nikintoki aapuo teinie lkerenket le Patara.

²Kore payie kirrachu meli naloito alang'aki nkop e Penisia, nikidir nikipuo.

³Kore payie kidol lkuran oji Saipiras, nikirepaa kinchorita kidienye, nikidoyio aalang'aki Tiro e nkop e Siria, nikintachoo meitodouni lkurupa te meli.

⁴Nikiyiaya looiteng'eni teinie, nikitum nikiwueni tenebo o ninche mperot sapa. Nejoki ꞉ninche Paulo payie meidach Yerusalem ana natiaka ninche ꞉Ltau Sinyati.

⁵Kake kore payie eichunye nenia perot ang teinie, nikinyuototo aapuo. Kore payie eduaaya iyioo looiteng'eni pooki tenebo o ntomonok enche o nkera maipung'o taatua ilo kerenket, nikigil kung aomon to nkutuk e mpaso,

⁶nikinchooro lesere. Kore payie kindip aichooroto lesere, nikidir meli, nerrinyo ninche aapuo nkang.

⁷Nikipuo te Tiro ana matabaki lkerenket le Pitolemais, nikipuo aairoroki looiteng'eni, nikiwueni mparri nabo o ninche.

⁸Neikenyu nikipuo Kaisaria, nikijing nkaji e lalikoroni loo Lomon Supati oji Pilipo, oara lobo loo lolo apa sapa ootegeluaki meichooi ndaa.

⁹Kore apa ninye naa keata ntoyie oong'uan enyena neitu eboitiere lewa, naaichoo ꞉Nkai nkidimata naibonichere.

¹⁰Kore kitibiko mperot kumo teinie, nedou loiboni obo oji nkarna Agabas, eing'uaa Yudea.

¹¹Kore payie ebau nikitii, neya nkeene e nkiji e Paulo neen koon nkaik o nkejek nejo, <<Inji ejo Ltau Sinyati, <Keen Lyiaudi le Yerusalem lopeny ana keene e nkiji aaiko inji, nepik nkaik ee lkulie oreren.> >>

¹²Kore payie kining iyioo o ltung'ana le inie ana, nikilej Paulo payie meiliep alo Yerusalem.

¹³Nejoki ꞉Paulo, <<Aanyo payie inchirchir? Ikigilitata ltau! Entung'ai abaki yenata nayeeni te jila, kore abaki tanaa kaari te Yerusalem tankaraki nkarna e Laitoriani Yeso, nchoo eaku naaku!>>

¹⁴Kore payie kilakino ninye pii, nikipal ninye nikijo, <<Nchoo easai nayieu Laitoriani.>>

¹⁵Kore tesiedi nenia perot, nikinapa nikiliep aapuo Yerusalem.

¹⁶Nepuonu lbata loo lolo ooiteng'eni te Kaisaria tenebo iyioo, nerik iyioo matewueni ta nkaji e Nason. Kore apa ninye naa ltung'ani oing'uaa Saipiras, nera lobo loo looiteng'eni ooiruko tekue.

¹⁷Kore payie kibaki Yerusalem, neng'amaa iyioo lolo ooiruko Kristo te ng'ida.

¹⁸Neikenyu nelo Paulo tenebo o iyioo adol Yakobo, netii sii lpayiani pooki le nkanisa inie.

¹⁹Kore eidipa Paulo airoroki ninche, nenyaki ntoki pooki nataasa Nkai te siaai lenye taatua Loreren.

²⁰Kore payie ening ꞉ninche ana, neisis Nkai nejoki Paulo, <<Lalache lang, idolita newua nkalupuni ee Lyiaudi ooiruko Yeso, naa kenyokita ninche pooki aaibung nkitanapat e Musa.

²¹Neitabakaki iyioo lomon likimpirita eji kore iyie naa inteng'en Lyiaudi pooki otii nkopi ee lkulie oreren payie eing'uaa nkitanapat e Musa, ijoki payie memurat nkera enche tanaa eirukurukore lkerreti loo Lyiaudi.

²²Naa kaa sa kias, amu meata ajo mening'i aajo iyewuo?

²³Naaku naa taasa ana nikijoki iyie. Ketii atua iyioo lewa oong'uan ooitakita Nkai lekutuk.

²⁴Rukurukore ninche tama ntasim e nkitorropiloto, nilaaki ninche ntoki nayieuni, payie eidim ꞉ninche aatabarn nkuechi enche. Kore tiniaas inia neyielou ltung'ana pooki aajo, kore taatua ntoki pooki natejoki te iyie naa sapare amu imbung'uta, nirukurukore nkitanapat ee Lyiaudi.

²⁵Naa kore too ltung'ana loo lkulie oreren ooiruko, naa ikingerokita ninche mpalai nikiimie nchere, keyiere payie epaachere ndaa naitakaki nkaitok ana lasar, nememat sii lodo, neitoki apaachere nkiri ee suom o nee ng'uesi naatogoroki, nemeboitare likae tung'ani te sesen mara ake ntomononi enye o lpayian lenye.>>

²⁶Kore mparri naijipu inia, neya ꞉Paulo lolo lewa, nelo aaitorropil koon o ninche, nejing nkaji e Nkai alikoo kenya mparri naichunye inia kata e nkitorropiloto enche o nkata nayiere neitaini lasar too pooki ng'ae lenche.

²⁷Kore payie eaku keichunye nenia perot sapa, nedol lkulie Yiaudi oing'uaa nkae bata e Asia Paulo taatua nkaji e Nkai, neinyoyie lturrur pooki meing'olng'olata, neibung ninye.

²⁸Nebuak aajo, <<Lotung'ana kulo le Isirael, enteret iyioo! Kore ele tung'ani naa keiteng'enita ltung'ana pooki to ng'oji pooki metaa lmang'ati loo ltung'ana lang o loo nkitanapat o le nkaji e Nkai. Naa keyewua abaki loreren atua ana Aji e Nkai, neitarroyie ene ng'oji sinyati.>>

²⁹Amu ketoduaa duo ninche Toropimo oing'uaa Epeso eboita o Paulo to lkerenket, nejo ketiriko ꞉Paulo ninye atua nkaji e Nkai.

³⁰Neinyuototo ltung'ana pooki le ilo kerenket nebukunyie neibung Paulo. Neyietu aaipung'unyie taatua nkaji e Nkai, neikeni nabokata nkutukie e inia aji.

³¹Kore enyok aajo entar ninye metua, nebaki lomon lkitok ooitore sikarini pooki le inie, nchere eing'olng'ole Yerusalem pooki.

³²Nekuet ilo kitok nabokata adoki lolo tung'ana, neya sikarini o lkutuaa ootii taabori ninye. Kore payie edol ilo turrur ninye o lolo sikarini ooirukurukore, naaku eitu eitoki aar Paulo.

³³Nenyikaki ꞉ilo lkitok ninye, neibung, neichooyo meteeni tee lgiitani oare le senkei. Neiparu ajo, <<Ng'ae ele naa nyo etaasa?>>

³⁴Nebuak lkulie aajo likae rerei, nejo lkulie likae. Kake kore amu ketalakine ateyielo ajo aanyo payie eing'olng'ole ilo turrur, neitanapicho meawae Paulo atua kampi ee sikarini.

³⁵Neijipu ninche ꞉ilo turrur kitok oleng, ebuakita aajo, <<Entar metua!>> Kore payie eitabakini Paulo inie nedirakini aajing'ie ng'oji ee sikarini, nerrapu ꞉sikarini aanap tankaraki keikarkarrunye ilo lturrur eyieu near ninye.

³⁷Kore payie eaku keirriki ꞉sikarini Paulo atua kampi nawuenie ninche, neipar ꞉Paulo lkitok loo sikarini ajoki, <<Ikincho sa maatiaaki ntoki?>> Nejoki, <<Aaku iro dei iyie nkutuk ee Lgirriki?

³⁸Naaku mara apa iyie ilo tung'ani loo Lmisiri oinyoyie larrabal kunda, nirik lolo tung'ana nkalupuni ong'uan ooricho taa lalema kuni atua lkees?>>

³⁹Newoliki ajoki, <<Kore nanu, naa Lyiaudii ara oing'uaa lkerenket le Tarso le mbata e Kilikia, oigero to lkerenket le tipat oleng. Kaomon iyie nchooki mairorie kulo tung'ana.>>

⁴⁰Kore payie eicho Paulo mpaach nairorie ninche, neapaki ꞉Paulo nkaina metigirata eitache teinie nedirieki aajing'ie ng'oji ee sikarini. Kore payie ejo tau, neirorie too nkutuk ee Lburania.