Read Samburu Asat 22 Bible Online

Asat 22 - Samburu bible

Asat 22

¹Nejo, <<Lalachera lainien o loo papa, entuur nkiyiaa nikinchocho mairoro ang'oroo koon.>>

²Kore payie ening ꞉ninche aajo nkutuk enche eirorita Paulo, neitoki aagira oleng aainining ninye. Nejoki Paulo,

³<<Kara nanu Lyiaudii otiiwuaki te lkerenket le Tarso otii Kilikia, kake ele kerenket le Yerusalem atubulunyie nanu. Kore sii, naa kaaiteng'ena ꞉Gamaliel aipidaki taatua nkitanapat e lmakui lang, natonyuaa oleng aas nayieu Nkai ana sii ntae tana parri.

⁴Naitama sina lolo oiruko ana Oitiei ng'ejuk e Nkurukoto, lewa o ntomonok, aaibung nairriki jila naar abaki metuata.

⁵Naa keata laitainoni kitok la lasar o ilo kiama pooki loo larikok loo Lyiaudi sipata aajo nejia etiu. Kaaichoo abaki mpala mayaki lalachera loo Lyiaudi ootii Damasikas naaitodolu ajo kaaichooki nkitoo naibung'ie lolo le inia Oitiei e Nkurukoto, nayau Yerusalem eena payie eitemei.

⁶<<Kore aibung'uta nkoitiei alo, matejo saai ile e mparkiji natinyikaka Damasikas, neipung'u nabokata wong'an napi te chumata, naaitoong taa mbat pooki.

⁷Nanang nkop, naning ltoilo laajoki, <Saulo! Saulo! Aanyo payie kintamita sina?>

⁸Najoki, <Aa ng'ae dei ira iyie, Laitoriani?> Naawoliki ajoki, <Kara Yeso le Nasaret, ilo lintamita sina.>

⁹Kore lolo laairukurukore naa ketoduaa wong'an, kake eitu ening ltoilo le ilo laairorie.

¹⁰<<Najoki, <Laitoriani, nyo naa aas?> Naajoki, <Inyuo chomo Damasikas, naa kore iti inie, nikilikini ntokitin pooki nikitegelakaki apake payie ias.>

¹¹Naa kore amu kaaitomodoo inia pijan e wong'an nkonyek, naaibung ꞉lolo laatii tenebo nkaina aarik ana matabai Damasikas.

¹²<<Neatae apa teinie ltung'ani obo oji Anania ourie Nkai aibung nkitanapat enyena, nerrepita ninye ꞉Lyiaudi pooki oaamanya inie.

¹³Nelotu natii, naaitache tabata naajoki, <Lalache lai Saulo, todolichoi aitoki!> Kore ake teinia kata naabolo nkonyek naing'or ninye.

¹⁴<<Naajoki, <Kore Nkai ee lmakui lang naa ikitegelua iyie teyielo yieunoto enye, nidol ilo openy sipat nining rerei le nkutuk enye.

¹⁵Amu ilo iyie aliki ltung'ana pooki sipata ee nenia baa nitoduaa o nitining'o te ninye.

¹⁶Naa nyo taata iyanyita? Inyuo ntacho payie kimpatisi, neitukori ng'ok inono, iimpot nkarna enye.>

¹⁷<<Kore atuchukie alo Yerusalem, naomonito taatua nkaji e Nkai nadol Laitoriani atuwuana kaidetidetita, aairorie aajoki, <Inyuo! Tesioi tung'ai Yerusalem taata amu meng'amaa sipata niata naaipirita.>

¹⁹Najoki, <Laitoriani, kore kulo tung'ana naa keyielo aajo kajing'aa apa atua Sinagogini aaibung naar lolo pooki likiruko iyie.

²⁰Naa kore abaki mparri nari Sitepano olikorita apa sipata ino, kaitacho nanu teinie atachamayie metari ninye metua, nairrita nankan e lolo oorita ninye.>

²¹Kake naajoki ꞉Laitoriani, <Inyuo, amu kaairruaya iyie lkulie oreren otii nkopi naalakua.> >>

²²Kore ilo turrur neinining Paulo ana metejo nejia, nebuak oleng nejo, <<Iwa ele tung'ani! Tara metua! Amu Meyiere payie etii te keper nkulupo.>>

²³Kore ebuakita ltung'ana, neburkuchu nankan enche, neisuaaki nkulupo siwuo,

²⁴nejo ilo kitok loo sikarini meawae Paulo atua kampi ee sikarini, aaiparichere eidong'i tee lichen meteyielo ilo kitok ajo aanyo payie ebuaakita ꞉ilo turrur ninye to ngoro aiko nejia.

²⁵Kore eteena aache ninye payie etum aaidong'o, nejoki ꞉Paulo likae kitok oitache teinie kini ta laduo kitok loo sikarini, <<Amaa, keichiaakino tee nkitanapat e Rroman teneidong'i ltung'ani oigero nkop ee Rroman eitu eiguanareki?>>

²⁶Kore payie ening ilo kitok ana, nelo aliki lkitok lenye ajoki, <<Nyo iyasita? Amu kore ele tung'ani naa loo Rroman!>>

²⁷Nelo ilo kitok loo sikarini pooki netii Paulo neipar ajoki, <<Tilikaki, ira iyie ltung'ani oigero nkop ee Rroman?>> Nejoki, <<Ee, kara.>>

²⁸Nejoki ꞉ilo kitok, <<Katalaa apa nanu ropiyiani kumo payie aaku ltung'ani oigero nkop ee Rroman.>> Nejoki ꞉Paulo, <<Kara nanu ltung'ani oigero nkop ee Rroman amu kaatiwuaki eigero ntoiwuo ainien nkop ee Rroman.>>

²⁹Kore ake payie ening ꞉lolo sikarini ootiakaki meiparichere ninye inia, neinyuototo aapuo. Neiputukuny laduo kitok ooitacheki lkulie sikarini pooki payie eyielou ajo keteena ltung'ani oigero nkop ee Rroman.

³⁰Kore mparri naijipu inia neyieuu ilo lkitok oitacheki sikarini pooki neyielou asipu ajo aanyo payie eyieu ꞉Lyiaudi nedung'okini Paulo nkiguana. Nejoki lkutuaa laa laitainok la lasar o lolo kulie pooki ootii atua inia kiguana ee larikok loo Lyiaudi metutumoto. Neyau Paulo meitacho tekue ninche.