Read Samburu Asat 23 Bible Online

Asat 23 - Samburu bible

Asat 23

¹Neing'ode ꞉Paulo inia kiguana ee lpayiani nejoki, <<Lalachera lainien, kore te nkichon ai pooki ana metabaki ana parri naa kamusoo ajo meatae hoo naakurreki tekue Nkai.>>

²Nejoki ꞉laitainoni kitok la lasar oji Anania lolo tung'ana ooitachoo tabata Paulo, metoocho nkutuk.

³Nejoki ꞉Paulo, <<Ikiwoch iyie Nkai, iyie oitaakino! Iti iyie lorika kinguanare ana nairirikino tee nkitanapat e Nkai, kake nitigila iyie nenia nkitanapat, payie ijo maatoochi nanu?>>

⁴Kore lolo ooitachoo tabata Paulo nejo, <<Iyie oitorioki adek laitainoni le Nkai kitok la lasar?>>

⁵Nejoki ꞉Paulo, <<Lalachera lainien, eitu duo ayielou ajo kera laitainoni kitok la lasar, amu keigero too Lkigerot Sinyat ajo, <Mijo ntoki torno te lkitok oitore ltung'ana linono.> >>

⁶Kake kore amu keyielo Paulo ajo, kore lbata lenche naa Sadukayo nera lkulie Lparisayo, nebuak ening'ito pooki ejo, <<Lalachera lainien, kara nanu Lparisayoi, nara nkerai ee Lparisayo. Naa kaayewuaki aaiguanare tankaraki nairuk ajo keatae mpiunoto ee lootuata.>>

⁷Kore payie ejo nejia, neikarnyasa Lparisayo o Sadukayo, nejing'u woro kitok atua ninche.

⁸Amu kore apa Sadukayo naa kejo meatae mpiunoto to lootuata, nemeatae lmalaikani tanaa ltauja torrok, kake kore Lparisayo naa keiruk aajo keatae pooki.

⁹Nejing'u ninche lolemilemi kitok atua, neinyuototo laiteng'enak loo nkitanapat le mbata ee Lparisayo aitacheyie oleng inia duata ee Lparisayo nejo, <<Meatae ntoki torno nikidolita tele tung'ani. Keidimai naa ltau tanaa sii lmalaika oirorie ninye?>>

¹⁰Neaku inia nchankar kitok, neguretu laduo kitok loo sikarini pooki ootalakua duo Paulo, ejo kebaki naa keichu lolo tung'ana ninye. Nejoki sikarini meyau ninye teinie nabokata atua inia kampi enche.

¹¹Kore inia kuarie neipung'oki Laitoriani Paulo nejoki, <<Togolo! Kore ninkuna payie imbalie sipata ee mbaa naipirita nanu te Yerusalem, naa meata ajo mimbalie abaki too ltung'ana ootii Rrom.>>

¹²Kore payie eikienyu nenya Lyiaudi lmumai pee menya ndaa nemematicho, ana metara Paulo metua.

¹³Naa kore apa ꞉lolo tung'ana oaatama ilo mumai, naa kerepaa artam.

¹⁴Nepuo netii laitainok kutuaa la lasar o lpayiani loo Lyiaudi nejoki, <<Ikitama iyioo lmumai tenebo, aajo mikinchamicham ntoki mara ikitara Paulo metua.

¹⁵Naaku naa, kore ntae laitainok kutuaa la lasar o nkiguana ee lpayiani, enterewaki taata lkilikuai lkitok loo sikarini pooki lene meitodoki ntae ninye, intaakinono ijoijo payie ing'uraa aasipu mbaa naadung'okinyieki ninye nkiguana. Naa kore ewuon eitu ebau ninye ene, naa ikiterretenete iyioo payie kiar ninye metua.>>

¹⁶Kore payie ening ꞉layieni le nkanache Paulo inia, nelo atua kampi ee sikarini neliki ninye.

¹⁷Neipotu ꞉Paulo lkitok obo loo sikarini pooki nejoki, <<Tiriko ele barnoti netii lkitok oitore ntae, amu keata lkilikuai lenye.>>

¹⁸Nerik netii ilo kitok nejoki, <<Kaaipuotua nanu ilo tung'ani oyeena oji Paulo, aomon maayaki iyie ele barnoti, amu keata mbae nikiliki.>>

¹⁹Neibung ꞉ilo kitok ooitore sikarini pooki ilo barnoti nkaina, neikonyi aiwuang'ie nejoki, <<Nyo dei kiyieu nikiliki?>>

²⁰Nejoki, <<Ketachamaitie ꞉Lyiaudi payie kiomon iyie iyau Paulo teisiere tekue kiguana ee larikok loo Lyiaudi, eji payie eitoki aaiparu mbaa enyena oleng.

²¹Kake mincho ꞉ninche kisapaki, amu ketijing'a lbata lenche oorepaa artam nkurruna aanyu ninye payie ear metua. Naa ketama lmumai tenebo ejo menya ndaa tanaa emat ntoki ana metara ninye metua. Keidipa aaterretenata paa iyie ake eanyuta nchoo ninche inia nayieu.>>

²²Nejoki ninye ilo barnoti mechomo kake neitaarriyian ajoki, <<Meata ltung'ani liliki ajo ikimbalakinyie ana bae.>>

²³Neipotu ꞉ilo kitok loo sikarini pooki, lkutuaa oare lenyena kunini nejoki, <<Entegelu sikarini ip are oopuo tee nkejek nigelulu aitoki ntomoni sapa loo mbartan o ip are loo mperria, mechomo Kaisaria saai uni e nkuarie.

²⁴Nirotokiki abaki Paulo mbartan naadir, nintabakiki ninye eserian Pelikis ooitore ana nkop e Isirael.>>

²⁵Neiger ilo kitok loo sikarini pooki mpalai ajo inchi:

²⁶Kore ana palai, naa nanu Kilaudio Lisias oigero. Kairoroki naa iyie Pelikis lkitok oayanyiti.

²⁷Kore ele tung'ani naa keibung'a ꞉Lyiaudi nenyokita aajo entar, kake nairrachu o sikarini lainien namitu, amu kayewuo apa ayielou ajo kera ltung'ani oigero to nkop ee Rroman.

²⁸Naa kore apa amu kayieu nayielou larrabal oaatayie Lyiaudi ninye, naicho meitodouni aayau tekue inia kiguana ee larikok lenche.

²⁹Nayielou ajo kore larrabal oaatayieki ninye naa nchankar tankaraki nkitanapat enche. Kake eitu adol ntoki teinia nadung'okinyieki ninye lkiye tanaa payie eeni te jila.

³⁰Kore payie aaibalakinyieki aajo ketipika ninche loseg oaarie ninye metua, nareuu nabokata nitii. Natilika lolo oaatayie ninye larrabal mikitiliki iyie payie itum atudung'oki nkiguana.

³¹Neas lolo sikarini inia natiakaki aaya Paulo kuarie ana metabai lkerenket le Antipatiris.

³²Kore mparri naijipu inia, neicho ꞉laaduo sikarini oare kutuaa lolo sikarini loo mbartan mewa Paulo Kaisaria, nechuko ninche aapuo kampi nawuenie te Yerusalem.

³³Kore payie ebaya lolo sikarini oayaita Paulo Kaisaria, neicho ilo kitok loo Rroman oitore nkop e Isirael inia palai naigerokaki, neitabaki ninye Paulo.

³⁴Neisom ninye inia palai, neipar Paulo le nkop nara. Kore payie eyielou ajo Kilikia eing'uaa

³⁵nejoki, <<Kore lomon linono naa kaning'u nkata napuonu lolo likiatayie larrabal.>> Nejo meirritae Paulo taatua inia aji naaitorichiere apa Erode.