Read Samburu Asat 24 Bible Online

Asat 24 - Samburu bible

Asat 24

¹Kore payie eich mperot imiet, nedoyio Anania laitainoni kitok la lasar alo Kaisaria tenebo o lkulie arikok loo Lyiaudi o lautaroni loo nkitanapat oji Tertulo, neyau mbaa naatayie Paulo tekue Pelikis.

²Kore payie eipotuni Paulo, neng'asu Tertulo alimu tekue ilo kitok, nenia baa pooki naatayie Paulo ejo, <<Ikiata nache kitok nikichamaa nchere, kore tankaraki iyie Pelikis lkitok lang le nkanyit naa ikutumo seriani kitok, niyaka sii kulo tung'ana mbaa ng'ejuko supati ta ramat ino, to ng'oji pooki o taa mbaa pooki.

⁴Naa kore naa payie maaitoki ainaurie, kaaomon iyie ting'iria tining'o iyioo to ndorropo.

⁵<<Kore ele tung'ani naa ikitoduaa aajo kera lmang'antita loo ltung'ana. Keinyoyie ng'olng'ol taatua Lyiaudi to nkop pooki ee Rroman, nera sii larikoni lo turrur ooirukurukore nkiteng'ena e lapa tung'ani lo lkerenket le Nasaret.

⁶Ketejo abaki ninye ntarruoi nkaji e Nkai, kake nikumbung.

⁸Naa kore tinimparichiere, naa indim atisipu te ninye nenia mbaa pooki nikiatayie ninye.>>

⁹Kore abaki Lyiaudi ootii inie, naa ketijing'a atua kulo omon netachamaitie.

¹⁰Kore payie eroj ilo kitok ninye meiroro nejo Paulo, <<Kayielo ajo kore taa larin kumo, ang'asu apake o taata naa itaa iyie ladung'oni le nkiguana lele orere, naaku kaitieu airoro atong'oroi koon.

¹¹Indim atisipu ajo eitu eim mperot tomon oare ailiepa nanu alo asai Nkai te Yerusalem.

¹²Neitu aikarnyasare nanu abaki ltung'ani obo taatua nkaji e Nkai, anaa ainyoyie ng'olng'ol tee Sinagogini tanaa taatua ilo lkerenket.

¹³Nemeidim kulo tung'ana abaki taata aaitodolu sipata ee nenia baa naatayie nanu.

¹⁴Kake kaibalie ajo kara loirukurukore inia oitiei e nkurukoto najo ninche nkiteng'ena e sapare. Naa kore teinia oitiei naisiaai Nkai ee lmakui lang. Nairuk sii mbaa pooki naaigero tee nkitanapat o naigero too mbukui ee loibonok le Nkai.

¹⁵Kaata nanu siligi ta Nkai, ana naata sii kulo tung'ana, nchere keitipiu ꞉ninye loosipat o lamara loosipat too lootuata.

¹⁶Naaku kore nkata pooki, kanyok metaa kaning ta ltau lai ajo meata naakurrieki tekue Nkai o tekue ltung'ana.

¹⁷<<Kore atibiko lkuti arin eitu alotu Yerusalem, nachukunyie aitabaki ltung'ana lainien nkichoorot e reto, nalotu sii aitaki Nkai lasar.

¹⁸Kore aasita inia, naatum lolo tung'ana atama ntasim naaitarropilieki ta nkaji e Nkai. Nemeatae ltung'ana ooiturrurrote tanaa ooing'olng'olete te inie.

¹⁹Kake ketii apa lkulie Yiaudi ooing'uaa Asia nkaji e Nkai inia kata, naa tanaa duo ketii ene tekue iyie anata elimu tanaa keata ntoki naarum.

²⁰Naa tanaa mara nejia nchoo elimu kulo tung'ana ootii ene ntorno naatumieki apa aaigunare ꞉nkiguana ee larikok loo Lyiaudi.

²¹Meitoki aatumie mara ntoki nabo ake natobuaa aajo tekue ninche ajo, <Kaaiguanareki anapar tankaraki nairuk mpiunoto ee lootuata.> >>

²²Kore Pelikis oyielo aiteeng mbaa naipirita nkiteng'ena najo ltung'ana Nkoitiei ng'ejuk e Nkurukoto, neitacheyie inia kiguana nejo, <<Kore payie elotu Lisias, lkitok loo sikarini pooki, nadung kulo omon.>>

²³Neitarriyian inia kata ꞉Pelikis likae kitok loo sikarini metirripo Paulo, kake neicho metaa keata mpaach nadolie ltung'ana lenyena, neret ninye.

²⁴Kore payie eim nkuti perot, nelotu Pelikis o ntomononi enye naji Durusila ntito ee Lyiaudi neipotu Paulo, neinining elimu netiu nkurukoto taatua Kristo Yeso.

²⁵Kore elikita ꞉Paulo ninye mbaa naipirita sotua oipida o Nkai o nkiboroto e koon o nkiguana e Nkai nalotu Kenya, neguretu Pelikis nejo, <<Maitabaki taa ene taata! Chomo metaa kore tanaitoki atum mpaach, naaipuotu.>>

²⁶Kore eyia naa keata ꞉ninye lderro ajo keidim Paulo nerop ninye, naa tankaraki inia payie eipotua ninye nkatitin kumo anyayie lomon.

²⁷Kore payie eim larin oare, nejing Porkio Peseto mpaach ee Pelikis, naa kore tankaraki nayieu apa ꞉Pelikis neiting'id Lyiaudi, neing'uaa Paulo eena.