Read Samburu Asat 25 Bible Online

Asat 25 - Samburu bible

Asat 25

¹Kore eicha mperot uni eyewuo laduo kitok oji Peseto aya lorika le inia kop, neinyuototo ninye ta Kaisaria neiliep alo Yerusalem.

²Nepuonu laitainok kutuaa la lasar o larikok loo Lyiaudi tekue ninye aayaki mbaa naatipika Paulo.

³Nelej aaomon metachamai meyauni ꞉Paulo Yerusalem, amu ketama apa ninche tenebo aajo keany nkoitieii aar ninye metua, kake keisudorie Peseto inia bae.

⁴Kake nejoki, <<Keana Paulo ta Kaisaria, naa kaloito inie kuna naataana.

⁵Keidim lbata laa larikok linchi aatodoi tenebo o nanu, payie tanaa keatae mbae napong'o tele tung'ani, ninguanarere.>>

⁶Kore payie ebik ninye te Yerusalem mperot isiet tanaa matejo tomon, nedoyio alo Kaisaria. Neikenyu newuon to lorika le nkiguana, neipotu Paulo meiguanareki.

⁷Kore lolo Lyiaudi ootuo eing'uaa Yerusalem tenebo o Peseto naa ketii sii apa ninche inie. Kore payie ejing'u Paulo neitachoo taa mbat pooki, epik ninye mbaa kumo nairochi nemeidim aaitodolu sipata enche.

⁸Neng'oroo Paulo koon ajo, <<Meatae mbae natigila tee nkitanapat ee Lyiaudi, neitu aaitaas nkaji e Nkai tanaa Kaisari ntoki torno.>>

⁹Kake kore tankaraki nayieu ꞉Peseto neiting'id Lyiaudi nejoki Paulo, <<Iyieu niliep alo Yerusalem, nintache tekue nanu mikinguanareki too kuna baa teinie?>>

¹⁰Nejoki ꞉Paulo, <<Kaitache dei taata tekue ꞉lorika le Nkiguana ooitacheki Kaisari, naa tene eyiere payie aaiguanareki. Naa kore abaki iyie, iyielo ajo meatae ntorno naitaasa Lyiaudi.

¹¹Naa kore tanaa laitarruoni ara, nataasa mbae nairirikino payie aadung'okini lkiye, naa maany payie aye. Kake tanaa meatae ndedei too kuna naatayie kulo tung'ana, naaku meatae hoo lobo laaidim atipika nkaik enche. Kayieu payie aaiguanareki tekue Kaisari.>>

¹²Kore payie eiparakino Peseto o lkutuaa lenyena nejoki Paulo, <<Itoomonua payie ilo tekue Kaisari. Ilo naa tekue Kaisari!>>

¹³Kore etung'ututari nkuti perot, nelotu lkinkii Agiripa o nkanache enye naji Bernise Kaisaria, aaisabaki lkitok Peseto.

¹⁴Kore etibiko ninche mperot kumo teinie, nenyaki ꞉Peseto ilo kinkii lomon le Paulo payie ening nejo. Nejoki, <<Keatae ltung'ani otung'ayie ꞉lautani lino Pelikis eena tene.

¹⁵Naa kore ati Yerusalem, neyau ꞉laitainok la lasar o larikok loo Lyiaudi mbaa torrok naatayie ele tung'ani, neomon metudung'okini nkiguana torno.

¹⁶<<Kake nawoliki ajoki, mara lkerreti loo Rroman payie edung'okini ltung'ani nkiguana eitu eduare nkomomi lolo oaatayie ninye lomon, neitu aitoki eichori mpaach nang'ororie koon taa mbaa naatipikaki.

¹⁷Naa kore payie epuonu ene tenebo o nanu, eitu aimalimalie nkiguana kake kore mparri naijipu inia najo siap to lorika le nkiguana naipotu meyauni ilo tung'ani.

¹⁸Kajo apake kore kulo tung'ana naa kepik ele tung'ani mbaa torrok, kake kore payie einyuototo aalimu mbaa naaipotokita, meatae hooyia mbae nabo torno natining'o tee nenia naatejo.

¹⁹Kore ake natining'o, naa nchankar ee mbaa naaipirita nkurukoto enche naata duo o Paulo, o lomon ooipirita ltung'ani otua apa oji Yeso ojo Paulo keichu.

²⁰Nalau naiko tanayielou kulo omon, naipar taa ninye tanaa keyieu nelo Yerusalem meiguanareki too lolo omon.

²¹Kake kore payie eomonu Paulo metowuana eena tele kerenket ana meyakini Kaisari metudung'o kulo omon, naitanap sikarini meirrita ninye ana metabau nkata narewaki ninye.>>

²²Nejoki ꞉Agiripa Peseto, <<Kayieu sii nanu nainining ele tung'ani.>> Nejoki, <<Kore teisiere naa inining.>>

²³Kore mparri naijipu inia nelotu Agiripa o Bernise te nkitoo kitok, nejing tenebo o lkutuaa loo sikarini o lkutuaa le ilo kerenket atua inia aji natumore chiaake ltung'ana. Neitanapicho lkitok Peseto meyauni Paulo.

²⁴Nejo taa Peseto, <<Iyie lkinkii Agiripa o ntae pooki otii ene, idolitata ele tung'ani! Kaaichirakita ltung'ana loo Lyiaudi pooki otii Yerusalem o lootii ene, aajo meyiere payie eitoki alo te keper kulupo.

²⁵Kake katisipua ajo eitu eas ninye ntoki naichiaakino lkiye, naa kore amu ketoomonua ninye koon meichori mechomo tekue Kaisari, naroyie aimie meawae.

²⁶Kake maata lomon oobore laidim aigeroki lkitok lai Kaisari. Naa inia payie ayewua ninye tekue ntae, aa oleng tekue iyie Lkinkii Agiripa, metaa kore kindipa aaiparichiere ninye, nayielou ntoki naiger.

²⁷Amu kajo nanu meichiaakino nerawakini ele tung'ani Kaisari eana meatae ntoki naigeroki naitodolu mbaa naatayieki.>>