Read Samburu Asat 26 Bible Online

Asat 26 - Samburu bible

Asat 26

¹Nejoki ꞉Agiripa Paulo, <<Kore taata, iyata mpaach ning'ororie koon.>> Neapaa ꞉Paulo nkaina, neng'asu airo ang'oroo koon nejo,

²<<Kaiken ajo kamunyak aitache tekue iyie lkinkii lai Agiripa ana parri, payie ang'oroo koon tee nenia baa pooki naatayie ꞉Lyiaudi.

³Kamunyak naa oleng tankaraki iyielo iyie lkerretin pooki loo Lyiaudi o nchankar enche, naaku naa kaomon oleng payie kining niminauru.

⁴<<Kore Lyiaudi pooki naa keyielo nkichon ai ang'asu ara lelerie, atii apa nkop ang naayielo sii atii apa Yerusalem.

⁵Kore tanaa keyieu nelimu sipata naaipirita, kaayielo apake aajo kara lobo lo lturrur loo Lparisayo ooibung'uta aaitirrichaki lkerreti le nkurukoto ang.

⁶Naa kaitache taata nanu tene aaiguanareki tankaraki siligi lai laata te lekutuk oitaka ꞉Nkai lmakui lang.

⁷Naa ele lekutuk apa eanyuta lmareita tomon o oare le Isirael payie eitabari, eisiaita Nkai kuarie o parkiji. Lkinkii lai, naa tankaraki ele siligi, payie eata kulo Yiaudi kuna mbaa naatayie.

⁸Aanyo sa payie ijoijo ntae meidimai payie eitipiu ꞉Nkai lootuata?

⁹<<Katejo abaki apa nanu nchere keyiere payie anyok oleng aany nkarna e Yeso le Nasaret.

¹⁰Naa nejia apa ataasa te Yerusalem. Kore te nkitoria naaichoo laitainok kutuaa la lasar, katipika lairukok kumo atua jila, naa kore payie eri metuata, naang'amaa sii nanu inia.

¹¹Kajing'aa apake nanu atua Sinagogini enche to ng'oji pooki, aiteme nanyok aisimaki ninche metediaa Yeso. Kore apa tankaraki nkiba kitok naata tee ninche, nalang'aki abaki lkulie kerenketi leiching'a aar ninche.

¹²<<Nainyuototo mparri nabo alo Damasikas te nkitoo o nkitoria naichoo ꞉laitainok kutuaa la lasar payie atum achomo kue aaitam sina lolo ooiruko Yeso.

¹³Lkinkii lai, kore aibung'uta nkoitiei matejo saai ile e mparkiji, naaipung'oki wong'an napi alang ndama naing'uaa chumata. Naaitoong taa mbat pooki o lboitiei lainien.

¹⁴Nikinang pooki nkop, naning ltoilo aajoki to nkutuk ee Lburania, <Saulo, Saulo, aanyo payie kintamita sina? Meidimai te iyie payie irere yieunoto ai.>

¹⁵Naipar ajoki, <Ng'ae dei ira iyie, Laitoriani?> Naajoki, <Kara nanu Yeso, ilo lintamita sina.

¹⁶Inyuo ntacho amu kaipung'oka agelu taa laisiaayiani lai, nilimu sipata ee mbaa ainien nitoduaa o naaitoki aitodol.

¹⁷Kaaitejeu iyie too ltung'ana linono o too loreren laairruaki,

¹⁸tobolo nkonyek enche nichuku taatua naimin apik atua wong'an. Impung'unyie taatua nkitoria e Chitani achukoki Nkai, netum mpalikinoto ee ng'ok o mpaach enche taatua lolo ooitisinyaki tankaraki naairuko nanu.>

¹⁹<<Naaku naa, Lkinkii lai Agiripa meatae nkae mara tanayanyit inia duata natoduaa te chumata.

²⁰Kore tekue nang'asu aliki ltung'ana ta Damasikas, naitoki te Yerusalem o te Yudea pooki o too Loreren, payie eirriidu neibelekenyakino Nkai, neas mbaa naaichiaakino too ltung'ana ooirriidutua.

²¹Naa tankaraki ana payie aaibung'a ꞉Lyiaudi atii atua nkaji e Nkai naajo entar matua.

²²Kake kore ana metabaki ana parri naa Nkai naairrita, naa kaitache taata tene alimu sipata tekue lkunini o lkutuaa, meatae nkae nalimu mara inia natejo Musa o loibonok le Nkai keasai.

²³Katilika ninche nchere keitami ilo Aitejeunoni oaanyutae oji Kristo sina neri metua, neaku lekue opiu taatua lootuata nelikoo wong'an, aliki lorere lang o lkulie oreren.>>

²⁴Kore ake inia kata, nebuaaki ꞉Peseto Paulo ajo, <<Paulo, imada! Kore inia kiteng'ena kitok niata naa ikintamadita.>>

²⁵Kake nejoki ꞉Paulo, <<Peseto lkitok lai oayanyiti, mamada, kake sipata ajoito nairorita rerei oning'unoi.

²⁶Keata Lkinkii lomon ooipirita kuna baa pooki, naa kairorie ninye maata ngureticho, tankaraki naata sipata ajo meata ntoki natalang'a ninye too kuna pooki, amu eitu easi to lkutoto.

²⁷Lkinkii lai Agiripa, amaa iruk iyie loibonok le Nkai? Kayielo ajo iruk.>>

²⁸Nejoki ꞉Agiripa, <<Ijo dei iyie ikintaa nanu lobo oara le Kristo too kulo kuti rereii?>>

²⁹Nejoki ꞉Paulo, <<Kore abaki tanaa keikuni tanaa sii keikumo, kaomon Nkai metaa mara iyie ake apeny oiruk, kake kayieu abaki payie etiuu kulo pooki laaning'ito nanu ana parri ana natiu nanu, mara ake payie meeni tana naena nanu.>>

³⁰Neinyuototo inia kata ilo kinkii o ilo kitok o Bernise o lolo kulie pooki oowueni tenebo o ninche, nepuo.

³¹Kore payie epuo teinie, neimaki maate ana ejo pooki, <<Kore ele tung'ani naa eitu eas mbae torno naaichiaakino lkiye tanaa sii eanata.>>

³²Nejoki ꞉Agiripa Peseto, <<Kore ele tung'ani naa keidimai duo payie elakuni tana eitu ejo keyieu nelo meing'unareki tekue Kaisari.>>