Read Samburu Asat 27 Bible Online

Asat 27 - Samburu bible

Asat 27

¹Kore payie eimieki aajo ikidir meli aapuo nkop e Itali, nepiki Paulo o lkulie tung'ana ooteenaki tenebo o ninye nkaik e lkitok oji Yulias, oitore lturrur loo sikarini ooirrita Kaisari.

²Nikidir meli kitok e lkerenket le Adiramitiam nataa kelo aimaa lkerenketi otii nchepata e mpaso naibung'are Asia. Nikinyuototo aapuo kiata ltung'ani le nkop e Makedonia oing'uaa lkerenket le Tesalonike oji Arisitarko.

³Kore mparri naijipu inia nikibaki lkerenket le Sidon. Naa kore tankaraki natumo ꞉Paulo omom te Yulias, neicho mechomo atua sotuatin lenyena, payie etum aateret ninye.

⁴Kore payie kinyuototo teinie, nikijing atua mpaso, kake kore tankaraki nanang'are iyioo siwuo kitok, nikipuo aim mbata ilo kuran oji Saipiras nemekut siwuo kitok.

⁵Kore payie kichep mpaso e nkop e Kilikia o ne Pampilia, nikilang'aki lkerenket le Mira le nkop e Lisia.

⁶Neirrachu ilo kitok loo sikarini meli naing'uaa Alekisandiria naloito Itali neitidir iyioo.

⁷Nikipuo akini mperot kumo ana maing'urare lkerenket le Kinido. Kore tankaraki natimitika iyioo siwuo kipuo, nikidoyio te inia meli aaim mbata e Kirete nemekut siwuo kitok kindachaa Salmone.

⁸Nikichep ilo lkuran le Kirete pecheu nikibaki ng'oji nejo ltung'ana, Nchepat supati e mpaso. Naa kore ene ng'oji naa kenyikita lkerenket le Lasea.

⁹Naa kore amu kechomo nkata kitok, neyecho mpaso, netabawua sii nochi kata nainyuototo lopir le mpaso[3], neitaarriyian ꞉Paulo ninche ajoki,

¹⁰<<Lolewa, kadol ajo kenya iyioo sina kitok tana lototo, nepuoyie iyioo ntokitin kumo, naa mara ake meli apeny o lkurupa lenye nalotie iyioo, kake keye abaki lkumo lang.>>

¹¹Kake neiruk ꞉ilo kitok loo sikarini ilo tung'ani oreuta meli o lopeny meli, alang lomon le Paulo.

¹²Naa kore amu meisupat apa inie nebikie melin ta nkata e nkirobi, nedung ltung'ana kumo aajo, <<Maapetin kue tene, paa tanaa keidimai nikibaki Penikis, nikibik teinie inia kata kenya e nkirobi.>> Kore apa Penikis naa lkerenket otii lkuran le Kirete, neata ng'oji supat neitacheyie melin, nejing'unyie nerich kopikop o loontoluo nerich maikope o loontoluo.

¹³Kore payie ekutunye siwuo oing'uaa kopikop, nejo ninche keitabaya inie duaake neyieu nepuo, nelaaya inia meli enche natii mechomo echepita nkalo Kirete.

¹⁴Kake kore eima ake nkini kata, neinyuototo lkutati kitok te ilo kuran le Kirete ojo ltung'ana, <<Lkutati orich maikope o loosaen.>>

¹⁵Neibung ꞉ilo kutati inia meli ang, nikilakino aatapach lkutati, nikipalaa meli meterewa siwuo.

¹⁶Naa kore kiimita mbata nemekut siwuo kitok e lkuran oji Kauda, nikintidiru pecheu inia meli kini nikiata atua inia meli ang sapuk.

¹⁷Kore payie kintidiru inia meli, neng'asu lolo tung'ana aayen inia meli sapuk too lgiitani payie egolu. Naa kore amu keurie aajo kebaki nereu inia meli ꞉lkutati metara ꞉ilo sunyai le ng'oji naing'urare nkop e Libia, neitodoyio lkonchoor payie eitacheyie meli teneiseyie inie. Neicho inia meli meterewa ꞉ilo kutati.

¹⁸Kore mparri naijipu inia nelo ilo kutati kue eoch iyioo oleng ana metang'asu lolo tung'ana aanang'aa lkurupa payie eneneng'u meli.

¹⁹Neikenyu neitoki aaitai mbata ee masaa e inia meli aanang'aki mpaso taa nkaik enche.

²⁰Kore eitu kidol ndama o lakir too mperot kumo enang'ita iyioo ꞉ilo kutati, neich lolo tung'ana lderro le mpuan.

²¹Kore meata ltung'ana kumo yieunoto nanyayie ndaa, neipotu ꞉Paulo ninche nejoki, <<Lolewa, kore apa tanaa ikitining'o, neitu ipuopuo Kirete, anata meata sina litumtum, niminturaa pito.

²²Kake kajoki naa taata ntae, entogolioto amu meatae hoo lobo oye mara ake meli namuta.

²³Kore ng'ole kuarie naa kaaipung'oka ꞉lmalaika le inia Ai nara lenye nara sii laisiaayiani lenye,

²⁴naajoki, <Paulo, Miurieicho amu kedede intache tekue Kaisari, naa ikincho ꞉Nkai te lng'ur lenye metaa kepok lolo pooki liboitiere.>

²⁵Naaku naa, lolewa entogolioto amu kaata nkurukoto ta Nkai ajo keasai inia natejo.

²⁶Kake meata ajo meidakie ꞉lkutati ana meli te likae kuran.>>

²⁷Kore kiji kuarie, nkuarie e tomon oong'uan ereuta iyioo lkutati te mpaso e Adiria, nemuso lolo tung'ana le meli aajo ketaa kibaki nkop natoyio.

²⁸Nesaan ninche neba nguton e nkare, neaku putii 120. Neitoki aasaan neaku putii 90.

²⁹Kore tankaraki naurie ninche aajo kebaki naa keitanang ꞉lkutati meli soito nkocheke, neitodoyio te siedi e meli lgiitani oong'uan ooenikino ntokitin naairochi payie eitacheyie inia meli. Neyieuu ꞉ninche nesioki aikenyu.

³⁰Nenyok lolo tung'ana oaas siaai te inia meli aajo empung'o aaisig taatua inia meli, neitodoki nadei meli kini atua nkare eitaakino kepuo aaitodoyio lgiitani ooenikino ntokitin naairochi, ootii kue e inia meli kitok.

³¹Nejoki ꞉Paulo ilo kitok loo sikarini o sikarini lenyena, <<Kore tanaa mewueni kulo tung'ana taatua meli, naa imutata pooki.>>

³²Nedung sikarini lolo giitani oiboorita inia meli kini, nepalaa mechomo.

³³Kore etaa keikenyu nejoki ꞉Paulo ninche pooki metama ndaa ejo, <<Kore tee mperot 14, naa itupukoitie eitu inyanya toki iyanyutata metodoi lkutati.

³⁴Kaomon naa ntae entam ndaa, payie miyeye amu meatae hoo lobo lichi odung'ori lpapita le nkue.>>

³⁵Kore payie eidip atejo nejia, nerrapu mukate, nerrinyoki Nkai nache tekue ninche pooki negil, neng'asu anya.

³⁶Neitogolio pooki, nenya sii ninche ndaa.

³⁷Kore apa teinia meli naa kumu pooki 276.

³⁸Kore payie kinyia ndaa aaimu, neitaini aitoki nkano aanang'aki mpaso aaiteneneng inia meli.

³⁹Kore payie eibalunye nkakenya, naaku eitu eyielou ninche inia kop nadolita, kake nedol lojata e mpaso naata nchepata supat, neimie aajo keitabaki inia meli inie ng'oji tanaa keidimai.

⁴⁰Nelaku lolo lgiitani ooenikino ntokitin naairochi naaitacheyie meli, neing'uaa taatua mpaso, neitololong inia toki narewueki meli metodoki mpaso. Kore payie eipirie inia anka natii kue e meli meibung'a siwuo, nereu meli inia chepata natoduaa.

⁴¹Kake neikub inia meli ꞉soit le atua nkare neitache meigusgus nkue eibokito ilo soit. Neng'asu siedi agiligila tankaraki nanang'ita ꞉lolo aing'ok le nkare.

⁴²Nemut sikarini aajo kear lolo mampuusi metuata payie metum mpaach nalopie nkare aaisig.

⁴³Kake kore amu keyieu ilo kitok neitejeu Paulo, nemitiki lolo sikarini eas inia. Nejoki lolo ooyielo aatolop nkare meipung'o taatua meli tekue aalang'aki nchepata e mpaso.

⁴⁴Kore lkulie nelang'ie nkeek dapachi, tanaa mbelesat e meli. Nelang pooki eserian teinia oitiei.