Read Samburu Asat 28 Bible Online

Asat 28 - Samburu bible

Asat 28

¹Kore payie kilang pooki kinchu, nikiyielou ajo kore ilo kuran likitalang'akita naa keji Malta.

²Neitodol iyioo lolo tung'ana le inia kop, nchaman kitok, amu keinuaa nkima, neitoomon iyioo pooki tankaraki natang'asua acha, neirobi.

³Nebosu ꞉Paulo suen nepik nkima. Neony lasurai oata sayiet oipung'unyie nkirewuaj nkaina, neililikino.

⁴Kore payie edol lolo tung'ana le inia kop eililikino ilo asurai nkaina, nejokino, <<Kore ele tung'ani naa meata ajo mara ketarichie! Amu kore abaki eitu eye taatua mpaso, naa eitu epal nkai e sipata ninye metopuaa.>>

⁵Neipiripiroki ꞉Paulo ilo asurai atua nkima, nemeata hoo neikuna ninye aroyie.

⁶Neanyu ltung'ana tanaa kejei ninye tanaa sii enang nkop aye. Kore payie eanyu nkata naado, nedol aajo meata ntoki nataase te ninye, neibelekeny lomon nejo, kera ꞉ninye nkae ai nabo.

⁷Ketaaniki inie ng'oji nikitabakita, lchampai lo lkitok le ilo lkuran oji nkarna enye Pabilio. Neitoomon iyioo te nchaman nkang enye, nikiaku lomon lenyena tee mperot uni.

⁸Kore apa papa lenye, naa keperito emuai eata nkirewua o nkirriata torno. Nejing Paulo nkaji asaaya ninye, neomonoki, neiteleki nkaik, neichiunyie.

⁹Kore payie easai ana, nepuonu lkulie pooki le inia kop oomoyiaa neichiunyieki.

¹⁰Naa kore tankaraki ana, neicho iyioo nkanyit kitok oleng, naaku kore payie eaku kinyuototo kenya aapuo ta nkae meli, neitanap iyioo ntoki pooki nikiyieu te inia oitiei.

¹¹Kore payie kiwueni lapatin okuni te inia kop, nikidir meli natowuana teinie inia ng'amata e nkirobi, naing'uaa Alekisandiria, natii nkomom enye nkitanyanyukoto ee nkaitok are naaji Kasita o Polos.

¹²Nikibau lkerenket le Sirakus, nikiwueni mperot uni teinie.

¹³Kore payie kinyuototo teinie nikibaki lkerenket le Regiam, nikibik nabo. Kore mparri naijipu inia, nekutunye siwuo oing'uaa kopikop nikimpung te Regiam, neikenyu nikibaki lkerenket otii nkutuk e mpaso oji Puteoli.

¹⁴Nikirrachu teinie lalachera o nkanachera neitoomon iyioo, nikiboitiare ninche mperot sapa. Nikinyuototo teinie nikipuo tee nkejek Rrom.

¹⁵Kore eitu kibaki Rrom nening ltung'ana ooiruko Kristo ootii inie lomon lang, nepuonu aang'amaa iyioo te sokoni e lkerenket le Apio o nkae naji noo Lojing'i Okuni. Kore payie edol ꞉Paulo ninche, nerrinyoki Nkai nache, nening ajo etogolo.

¹⁶Kore payie kibau Rrom, neichori Paulo metowuana ta nkaji apeny, neata ꞉sikarii orrip ninye.

¹⁷Kore payie kibik mperot uni teinie, neipotu ꞉Paulo lkutuaa loo Lyiaudi. Kore payie epuonu nejoki ꞉Paulo, <<Lalachera lainien, kore te Yerusalem naa kaaibung'aki naapiki nkaik ee Rroman abaki meata hoo ntoki torno naaitaasa ltung'ana lang tanaa kerreti la lmakui lang, naayauni ene ayena.

¹⁸Kore payie aaiparichiere, neyieu payie aapalaa, amu meatae apa mbae naatipikaki nairirikino naarieki matua.

¹⁹Kake kore payie eany larikok loo Lyiaudi naimie ꞉nkiguana, naaku meatae nkae mara tanaamonu maaiguanareki tekue Kaisari, abaki maata mbae naipotie ltung'ana lang.

²⁰Naa inia payie atoomonua matodua ntae nairorie. Amu kaena tana senkei tankaraki kairuko ajo kore ilo Aitejeunoni oisiliguta ꞉Isirael naa keyewuo.>>

²¹Nejoki, <<Meata mpala naing'uaa Yudea nikimpirita nikitumo, nemeatae loyeuo ene taa lalachera lang, otilimua tanaa oiroro, mbae ntorno nikimpirita.

²²Kake ikiyieu nikining nijo iyie too kuna baa, amu ikiyielo aajo keiroritae oleng to ng'oji pooki mbaa naarieki ele turrur lena kurukoto.>>

²³Negelu mparri natumore Paulo, naa kore inia parri, nepuonu inia aji natii ninye era kumo alang idia mparri naatuo apa. Kore ang'asu tasiran ana memuto, neliki lomon le nkitoria e Nkai, eliki sipata ee mbaa e nkitoria e Nkai. Kore easichere mbukuii ee nkitanapat e Musa o mbukuii ee loibonok le Nkai, nenyok aliki metining'u neiruk ninche aajo kore lomon ooipirita Yeso naa kedede.

²⁴Neiruk ꞉lbata tankaraki rerei lenye, kake neany ꞉lkulie eiruk.

²⁵Nejo Paulo mbae nabo e siedi, neinyuototo ninche aapuo teinie, amu ketalakinete aatining'oto maate. Kore natejo Paulo naa ana: <<Kedede natiaka ꞉Ltau Sinyati lmakui linchi to loiboni le Nkai Isaya payie ejo,

²⁶<Chomo tiaaki ltung'ana lainien, <<Ining'ining kake nimining'ung'u aikata, ing'orng'or ake, nimidoldol aikata.>>

²⁷Amu kore nkuechi ee kulo tung'ana naa keitogoloki, nemening'icho aaitibiraki tee nkiyiaa enche, neikeno nkonyek enche, payie medol too nkonyek enche, nening tee nkiyiaa enche, neyielou taa ltauja lenche, naachukokino, payie aichiunyie ninche.>

²⁸<<Naa kayieu niyielouu aajo kore lkilikuai le njeunoto e Nkai, naa eterewakaki taata lkulie oreren, naa kening ninche.>> [4]

³⁰Kore taa larin oare, newuon Paulo te inia aji nalaki, neitoomon lolo pooki ootuo netii.

³¹Nelikoo ninye lomon le nkitoria e Nkai, neiteng'en mbaa naaipirita Laitoriani Yeso Kristo meata hoo ngureticho, nemeata ltung'ani oibooyie ninye.