Read Samburu Asat 3 Bible Online

Asat 3 - Samburu bible

Asat 3

¹Kore mparri nabo, neiliep Petero o Yoana aapuo nkaji e Nkai nkata e nkomono saai saal e mparkiji.

²Neyauni inie ltung'ani otiiwuaki etigiligile. Keiteperi chiaake to ltim oji Ltim Supat le nkaji e Nkai mperot pooki, payie etum atoomonu ropiyiani too ltung'ana oojing atua inia aji.

³Kore payie edol ꞉ninye Petero o Yoana etaa keimu ltim aajing nkaji e Nkai, neomon ninche ropiyiani.

⁴Nekurraki ꞉ninche ninye nkonyek nejoki ꞉Petero, <<Ng'ura iyioo!>>

⁵Neunoki ninche nkonyek aing'or ejo kebaki naa ntoki eicho.

⁶Kake nejoki ꞉Petero, <<Maata nanu ropiyiani naaicho, kake kaaicho ntoki naata. Kore ta nkarna e Yeso Kristo le Nasaret, inyuo chomo!>>

⁷Neibung nkaina enye e tetene neitachayie meinyuo, kore ake inia kata negolu ndapi o nkupulito ee nkejek enyena.

⁸Nejo chut aitache tee nkejek enyena neng'asu aloolo. Nejing atua nkaji e Nkai tenebo, eloolo, neipirri, neisis Nkai.

⁹Nedol ninye ꞉ltung'ana eloolo, neisisita Nkai,

¹⁰neyielou aajo lochi tung'ani chiaake ele owuon aomonicho to nkutuk e ltim le nkaji e Nkai oji supat. Neing'asia ninche oleng, inia nataase te ninye.

¹¹Kore eibung'uta ꞉ilo tung'ani Petero o Yoana, nekuetu ltung'ana eing'asiate pooki inie netii ninche. Kore inie ng'oji naa keji loip le Solomon.

¹²Kore payie edol ꞉Petero ana nejoki ninche, <<Lotung'ana kulo le Isirael, aanyo payie ing'asiasia tana? Naa aanyo sii payie ing'orng'or iyioo eji atuwuana to ngolon ang anaa tankaraki nikiurie Nkai kindimie ele tung'ani meinyuo alo?

¹³Kore Nkai e Abraam o ne Isaka o ne Yakobo, Nkai ee lmakui lang, naa ninye nayanyita laisiaayiani lenye Yeso aas ana. Ele Yeso inchooitie, nianyiyany tekue Pilato abaki etudung'o ajo kelakuni ninye.

¹⁴Kake itanya ntae Ilo Sinyati oara loosipat, nisimaa metalakuni ilo arani.

¹⁵Kake kore ilo oing'uaa ꞉nkichui niarar, neitipiu ꞉Nkai ninye taatua lootuata, nikiata iyioo sipata e inia.

¹⁶Kore ngolon e nkarna e Yeso naa keitogolo ele tung'ani, liyielolo chiaake nidolitata taata netiu tankaraki nkurukoto e inia arna. Kore inia kurukoto, naa ninye naichiunyie ele tung'ani tekue ng'onyek inchi pooki katukul.

¹⁷<<Lalachera, kayielo naa ajo itaasa ana o larikok linchi miyielolo.

¹⁸Naa keitabayie Nkai inia natejo apa ewuon eng'or nkata too loibonok lenyena pooki nchere, kore kenya ilo Aitejeunoni le lekutuk lenye naa ketum sina.

¹⁹Erriidu naa, niwuatuwuatata, payie ejuti ng'ok inchi,

²⁰nepuonu nkatitin naaing'uaa netii Laitoriani naayeng'iyeng'ie ntae, nerewaki ntae ilo Aitejeunoni otegelua aa ninye Yeso.

²¹Naa meata ajo meng'amaa ninye ꞉chumata ana metabau kenya inia kata naitaa Nkai ntoki pooki supat ana netiu apake, ana netejo apake too loibonok sinyat lenyena.

²²Kedede ketejo apa Musa, <Kore Laitoriani Nkai inchi naa kelo aipung'unyie loiboni taatua ltung'ana linchi otuwuana nanu. Entining ninye taa mbaa pooki naaliki kenya ntae.

²³Naa kore pooki lemening ilo oiboni, neworieki ltung'ana le Nkai neidaaya.>

²⁴Amu kore lolo oibonok le Nkai pooki oiroro ang'asunyie Samuel o lolo oijipu ninye, naa ketilimutua aajo kepuonu kuna perot.

²⁵Kore ntae naa irara lootum nana naatejo Nkai aimunyie loibonok lenyena o ne lning'o oitaka ninye loo papa linchi. Amu ketiaka apa ꞉Nkai Abraam, <Te ichoi ino ake amayian loreren pooki le nkop pooki.>

²⁶Ntae apa lekue ooterewaka ꞉Nkai ilo aisiaayiani lenye oipung'okinyie ntae payie emayian ntae. Naa kemayian ntae aiwuatuwuat pooki ng'ae metung'ai ntorrok enyena.>>