Read Samburu Asat 4 Bible Online

Asat 4 - Samburu bible

Asat 4

¹Kore eirorie ꞉Petero o Yoana ltung'ana, nepuonu laitainok la lasar o lkitok loo sikarini le nkaji e Nkai o Sadukayo netii ninche.

²Kore amu keiteng'enita ꞉lkipaareta ltung'ana aajoki keatae mpiunoto ee lootuata too lolo ooiruk Yeso, negoro ninche.

³Neibung ꞉ninche Petero o Yoana, kake kore amu kemuto, neirriki atua jila meteperio ana meikenyu.

⁴Kake kore lkumo loo lolo ootining'o ilo rerei lenche neiruk, neponunye looiruko Yeso metaa matejo lewa nkalupini imiet.

⁵Kore payie eikienyu, netumo larikok o lpayiani loo Lyiaudi o laiteng'enak loo Nkitanapat te Yerusalem.

⁶Netii inie Anas oara laitainoni kitok la lasar o Kayapas o Yoana o Alekisanda o lolo lewa pooki le nkang e ilo aitainoni kitok la lasar.

⁷Neyauni Petero o Yoana nkiji e inia kiguana neng'asu aiparichiere aajoki, <<Amaa, taa golon anaa taa arna itaasa ntae ana?>>

⁸Kore inia kata neiput Petero ꞉Ltau Sinyati nejo, <<Larikok o lpayiani loo ltung'ana lang!

⁹Kore tanaa imparichierere iyioo anapar tankaraki supat naitaasaki ele tardoi o neikunaki payie eichiunyieki ninye,

¹⁰enteyielo ntae pooki o ltung'ana le Isirael pooki nchere, ketaase ana ta nkarna e Yeso Kristo le Nasaret litecho ntae neitipiu ꞉Nkai taatua lootuata. Naa ninye oidimie ele tung'ani meitacho tene eichiwua.

¹¹Naa ninye soit litanya ntae lachetak, kake ketaa ninye soit le tipat oirichiu nkaji.

¹²<<Meatae hoo njeunoto te likae mara ake te ninye. Nemeatae ajo mara inia arna ake apeny naichoo ꞉Nkai ltung'ana to nkop pooki, eitejeunyieki iyioo.>>

¹³Kore payie edol ꞉ninche aajo meata Petero o Yoana ngureticho, neteyielouto aajo meata nkisoma naa lpayiani le nkang ake era, neing'asia. Kake neyielou naa aajo, keboitiere apa ꞉ninche Yeso.

¹⁴Naa kore payie edol ꞉ninche ilo tung'ani oichiunyieki eitache tabata ninche, nelau ntoki najo.

¹⁵Nebuaaki ninche meipung'o taatua inia aji e nkiguana. Neipara

¹⁶aajokino, <<Kaji kinko kulo ltung'ana? Amu kedede keteyieloki aajo ketaase mbae e nking'asia tee ninche, netelie too ltung'ana pooki oamanya Yerusalem, nimikindim aatany.

¹⁷Naa kore payie mebulaa ana bae kue taatua ltung'ana, maichoo ninche lomon oome payie meimakinyie ltung'ani toki tana arna.>>

¹⁸Neipotu aitoki ninche neitarrap aajoki payie meiro nemeiteng'enicho katukul ta nkarna e Yeso.

¹⁹Kake nejoki ꞉Petero o Yoana ninche <<Amaa, kaa naichiaakino tekue Nkai, tinikining ntae ana tinikining Nkai? Entodol ntae niasias,

²⁰amu mikindim aatapal mikilikoo nenia nikitoduaa o nikitining'o.>>

²¹Kore payie eidip aaichoo ninche lomon oome, nepalaa mechomo. Nelau neiko teneiteme, amu kore ltung'ana pooki naa keisisita Nkai tankaraki inia nataase.

²²Kore apa larin le ele tung'ani oichiunyieki tana mbae e nking'asia naitodolu ajo keidim Nkai aichiunyie ltung'ana, naa kerepaa larin artam.

²³Kore payie elakuni Petero o Yoana, nechuko aapuo netii lboitieii lenche, neliki ntoki pooki natiakita ꞉laitainok kutuaa la lasar o lpayiani.

²⁴Kore payie ening ninche inia, neapaa ltoilochi lenche aomon Nkai tanaboicho ejo, <<Laitoriani lopeny pooki toki, iyie oitibira chumata o nkop o mpaso o ntokitin pooki naatii.

²⁵Niroro aimu akuyia lang Daudi, ta Ltau Sinyati ajo, <Aanyo payie etogorete ltung'ana lemeirruk Nkai e Isirael, nechetu ꞉ltung'ana mbaa nemeitoki?

²⁶Neinyuoto lkinkii le nkop pooki, netama larikok nabo, aarare Laitoriani o Laitejeunoni otegelua ꞉ninye.>

²⁷<<Naa kedede kore Erode o Pontio Pilato o lorere le Isirael o lkulie oreren sii, ketama nabo te ele kerenket aarare Yeso ilo aisiaayiani lino sinyati litegelua iyie.

²⁸Ketaasa ninche ana payie ebaya nitegelua apake iyie to golon o yieuna ino.

²⁹Kore naa taata Laitoriani, ng'ura ja neiko teneicho iyioo lomon oome, nincho laisiaayiak linono nkidimata nalikorie rerei lino te mpijan.

³⁰Ntorioi nkaina ino aichiunyie, nintodolu nkitoo ino, nias mbaa e nking'asia ta nkarna e laisiaayiani lino sinyati Yeso.>>

³¹Kore payie eidip aatoomon neikirikiro inie netumore ninche, neiput ninche ꞉Ltau Sinyati nelikoo rerei le Nkai meata ngureticho.

³²Kore lolo pooki ooiruko Yeso, neaku nabo taa ltauja o taa mparrunot. Nemeatae hoo ltung'ani oiken ntokitin naata ajo nenyena aapeny, kake ketang'ara ntokitin enche pooki tenebo.

³³Naa kore to ngolon kitok nelimu ꞉lkipaareta sipata naipirita mpiunoto e Laitoriani Yeso, neichoo ꞉Nkai ninche pooki munyani kitok.

³⁴Nemeatae lobo taatua inia chula ee looiruko Yeso otong'orika toki, amu kore ꞉lolo pooki oaata lchampai o nkajijik, nemir neyau ropiyiani naaitamita,

³⁵nepik nkaik ee lkipaareta. Neorikini kuna ropiyiani pooki ng'ae ana nairirikino yieuna naata.

³⁶Netii apa ltung'ani la lmarei laa Lawi oing'uaa lkuran oji Saipiras, oji nkarna Yosep. Kejo apa ꞉lkipaareta ninye Barnabas, laa keji laitogoloni.

³⁷Naa kore tankaraki naata ninye lchampa, nemir ilo champa neyau nenia ropiyiani naatumo, nepik nkaik ee lkipaareta.