Read Samburu Asat 5 Bible Online

Asat 5 - Samburu bible

Asat 5

¹Netii aitoki lpayian obo oji Anania o ntomononi enye naji Sapira otimira lchampa lenche.

²Neisudoo ꞉Anania mbata ee ropiyiani naaitama ilo champa eyielo ꞉ntomononi enye, neyau mbata nepik nkaik ee lkipaareta.

³Nejoki ꞉Petero, <<Anania, aanyo payie kitijing'a Chitani ltau tasapa Ltau Sinyati, nisudoo mbata ee ropiyiani e lchampa litimira?

⁴Mara apa lino lchampa eitu imir? Oo itimira, mara apa ninono ropiyiani pooki? Nyo nikinchoo taasa mbae natuwaunyi? Mara ltung'ana itasapa kake Nkai!>>

⁵Kore payie ening ꞉Anania kulo rereii, nenang nkop etundung'ie tau. Nejing ngureticho atua lolo pooki ooning'ito.

⁶Neinyuototo lewa leleru, neimulmul sesen lenye, neipung'unyie, nenukaa.

⁷Kore eima matejo saai uni, nejing'u ntomononi enye, nemeyielo ajo nyo nataase.

⁸Neipar ꞉Petero ajoki, <<Amaa, tilikaaki tanaa ntoki nawua inji itimirie lchampa?>> Nejoki, <<Ee, nejia ake ewua.>>

⁹Nejoki ꞉Petero, <<Aanyo payie itachamaitie aajo matasap Ltau la Laitoriani! Tining'o nkejek ee lolo ootunukaitie lpayian lino ajo kening'o to nkutuk e nkaji, naa ikipuonu aaya aitoki iyie aanukaa.>>

¹⁰Kore ake inia kata, nedung'o Sapira tau tekue nkejek e Petero, nejo tii anang nkop. Kore payie ejing'u laadei lewa leleru, neirrachu ninye etua, nerrapu aaya nenukaa tabata lpayian lenye.

¹¹Nejing ngureticho kitok atua ltung'ana pooki le nkanisa o lolo pooki ootining'o kuna baa.

¹²Ketaasa Nkai taa nkaik ee Lkipaareta mbaa naaitodolu nkitoo enye o mbaa kumo e nking'asia taatua ltung'ana. Netumo chiaake ninche pooki tanaboicho to ng'oji neji loip le Solomon.

¹³Nemeatae lkulikae ooiruko Yeso ooitieu aatoboitare Lkipaareta, abaki eichorita ꞉ltung'ana ninche nkanyit kitok.

¹⁴Kake kore eyia ketoponunye ltung'ana kumo oiruko Laitoriani, lewa o ntomonok.

¹⁵Naa kore tankaraki kuna baa, neyau ꞉ltung'ana ltamoyia lketiketi lo lkerenket, neiteper too nkusoreta o lchonito, metaa kore eimita Petero inie, kore ake ltung'ani owochoo ꞉loip lenye, neichiu.

¹⁶Neiturrurrunyie ltung'ana kumo eing'uaa lkerenketi onyikita Yerusalem enapita ltamoyia o loorita ꞉lairiruani, neyau neichiunyieki ninche pooki.

¹⁷Kore tankaraki inia, neinyuototo laitainoni kitok la lasar eiputa lom o lboitiei lenyena oaara le ilo turrur loo Sadukayo,

¹⁸neibung lolo Kipaareta, neirriki atua jila e ilo kerenket.

¹⁹Kake kore kuarie, nebol lmalaika la Laitoriani nkutuk e jila neipung'unyie ninche boo nejoki,

²⁰<<Enchom entacho taatua nkaji e Nkai, nilikiki ltung'ana rerei pooki le ana kichon ng'ejuk.>>

²¹Kore payie ening ninche ana, nepuo etaa keikenyu aajing atua nkaji e Nkai, neiteng'enicho. Nelotu laitainoni kitok la lasar o lboitiei lenyena, neipotu Nkiguana ee larikok loo Lyiaudi, nereu ltung'ana jila meeyau lolo Kipaareta.

²²Kake kore payie ebaki lolo aisiaayiak jila naterewaki, nelau lolo kipaareta taatua jila, nechuko nelikoo aajo,

²³<<Ikitumo jila eikeno pii, neitachoo sikarini oorripito too nkutukie, kake kore payie kibol nemeatae ltung'ani likitumo taatua.>>

²⁴Kore payie ening lkitok loo sikarini le nkaji e Nkai o laitainoni kitok la lasar kulo omon, neing'asia nejo, <<Nyo sa nataase?>>

²⁵Nelotu ltung'ani obo nejoki, <<Kore laang'ole lewa lirrika jila, naa keitachoo taata aaiteng'enita ltung'ana taatua nkaji e Nkai.>>

²⁶Nelo taa lkitok loo sikarini o sikarini lenyena neitoki aayau Lkipaareta, kake eitu eibung aaitirrichaki amu keurie aajo kenang ꞉ltung'ana ninche aar too soito.

²⁷Kore payie eyau ꞉ninche lkipaareta, neitacheyie tekue Nkiguana ee larikok loo Lyiaudi. Neiparichiere laitainoni kitok la lasar ninche ajoki,

²⁸<<Ikintarrapita apa ntae payie minteng'enichocho te inia arna e Yeso, kake eibulaayie nkiteng'ena inchi Yerusalem, niyieuu nimpotietie iyioo lkiye lele tung'ani.>>

²⁹Kake nejoki ꞉Petero o lkulikae kipaareta ninche, <<Meatae ajo mikiyanyit Nkai alang ltung'ana!

³⁰Kore Nkai ee akui lang naa keitipiwua Yeso taatua lootuata, ilo apa litecho metua to lmusalaba.

³¹Keiliepie ninye ꞉Nkai metewuenie nkaina enye e tetene metaa Lkitok o Laitejeunoni payie eicho Isirael nkoitiei e nkirridunoto o ne mpalikinoto ee ng'ok.

³²Kore iyioo o Ltau Sinyati oichoo ꞉Nkai lolo ooibung rerei lenye, naa ikilimu sipata ee kuna baa.>>

³³Kore payie ening inia kiguana ee larikok loo Lyiaudi ana, neiputakino ngoro oleng eyieu near ninche metuata.

³⁴Kake keatae apa Lparisayoi oji Gamaliel, oara laiteng'enani loo nkitanapat, oayanyit ꞉ltung'ana pooki. Neitache ninye tekue inia kiguana, nebuaaki meipung'ieki lolo tung'ana ang'as peneu.

³⁵Nejoki inia kiguana, <<Lolewa kulo loo Isirael, eng'ura oleng mbaa nipuopuo aaitaas kulo tung'ana.

³⁶Kore apa, ketupukua Teudas nejo kera kitok, neirukurukore ninye ꞉ltung'ana matejo 400. Kake neri ninye nesachari lolo tung'ana lenyena pooki apa ooirukurukore ninye, nebaki mbaa enyena inie.

³⁷Kore tesiedi ninye, nepuku aitoki Yuda oing'uaa Galilaya ta ng'amata apa e nkigerore, neitopong'oo ltung'ana ooirukurukore ninye. Kake neri aitoki ninye, nesachari lolo tung'ana lenyena pooki.

³⁸Kore naa tana bae, kaitaarriyian ntae emiseyie kulo tung'ana, kake entapalai mechomo. Amu kore tanaa ltung'ana eing'uaa nenia naayieu neas o naasita, naa keiting.

³⁹Kake kore tanaa Nkai eing'uaa ana, naa mindimdim aaitacheyie mbaa enche. Entodol ake meaku Nkai irarere.>> Nechamaa ninche inia kitaarriyiana enye.

⁴⁰Neipotu lolo Kipaareta meotu. Neidong ninche, nejoki payie mejo ntoki te nkitoo e nkarna e Yeso, nepalaa.

⁴¹Neing'uaa lolo Kipaareta atua inia kiguana eng'ida amu keikenaka ꞉Nkai ajo keichiaakino payie enya ꞉ninche sina tankaraki nkarna e Yeso.

⁴²Kore mparri pooki taatua nkaji e Nkai o taa nkang'itie neitu epal ninche meiteng'enicho, nelikoo aajo kore Yeso naa ninye ilo Aitejeunoni oanyutae.