Read Samburu Asat 6 Bible Online

Asat 6 - Samburu bible

Asat 6

¹Kore eponunye looiteng'eni tee nenia perot, neichankarra Lyiaudi ooiro nkutuk ee Lgirriki o Lyiaudi ooiro nkutuk ee Lburania. Amu kore mperot pooki, naa keorokini ltung'ana ndaa, nejoito lolo ooiro nkutuk ee Lgirriki meichoritae aaitibiraki nkoilia enche ndaa.

²Neiturrurru ꞉loochi tomon oare lkulie ooiteng'eni pooki nejoki, <<Meiririkino tinikipal likoroto ee Lomon Supati le Nkai, eji payie kitum aatoriki ltung'ana ndaa.

³Naaku naa lalachera, entegelu taatua ntae lewa sapa liyielolo aajo keipida mbaa nebore Ltau Sinyati o ng'eno, likipik nkaik enche ele siaai.

⁴Kore iyioo naa ikintirrichaki nkomono o siaai le rerei le Nkai.>>

⁵Neiting'id ilo turrur pooki inia wolet. Negelu Sitepano, ltung'ani obore nkurukoto o Ltau Sinyati, o Pilipo o Porokoro o Nikanor o Timon o Parmenas o Nikolas oing'uaa lkerenket le Antiok, oibelekenye apa aaku le nkurukoto ee Lyiaudi.

⁶Neyau kulo tung'ana tekue lolo Kipaareta, neomonoki ꞉Lkipaareta ninche, neiteleki nkaik.

⁷Nebulaa rerei le Nkai oleng, nesioki lturrur loo looiteng'eni aaponunye te Yerusalem, neibung ꞉laitainok kumo la lasar inia kurukoto.

⁸Kore apa Sitepano naa ltung'ani oiputa ꞉munyani o ngolon, neas mbaa kutuaa e nking'asia o nkitodolunoto kutuaa e nkitoo e Nkai taatua ltung'ana.

⁹Neatae apa Sinagogi nabo naji nee rrindiki oaatalakuaki. Netii inie ltung'ana ooing'uaa lkerenket le Kirene o le Alekisandiria o lolo ooing'uaa nkop e Kilikia o Asia. Neinyuototo lbata lenche aaichankarrare Sitepano.

¹⁰Kore eirorita Sitepano, nelakino ninche aaitachekinere ng'eno naata o Ltau Sinyati oidimie ninye meiroro,

¹¹neroj lbata loo lpayiani metasapicho aajo, <<Ikitining'o iyioo Sitepano eirorita rerei adek Musa o Nkai.>>

¹²Neinyoyie lolo omon ltung'ana o lpayiani o laiteng'enak loo nkitanapat metogoroto, neibung Sitepano aaitirrichaki, neyau tekue nkiguana ee larikok loo Lyiaudi.

¹³Neitai ltung'ana metasapicho aajo, <<Kore ele tung'ani naa ikiata sipata nchere, mepal meiro mbaa nemeichiaakino e ana aji sinyati o nkitanapat e Nkai.

¹⁴Amu ikitining'o ninye ejo, <Kore ele Yeso le Nasaret naa kear ene ng'oji neitoki aibelekeny lkerreti oitarasaka apa ntae ꞉Musa.> >>

¹⁵Kore lolo pooki oowueni taatua inia kiguana, nekurraki nkonyek Sitepano, nedol nkomom enye etuwuana ne lmalaika.