Read Samburu Asat 7 Bible Online

Asat 7 - Samburu bible

Asat 7

¹Neipar ꞉laitainoni kitok la lasar Sitepano ajoki, <<Amaa, kedede kuna nikitipikaki?>>

²Newoliki ajoki, <<Lalachera lainien o loo papa, entining'ooki! Kore Nkai ang e nkitoo naa keipung'oka apa akuyia lang Abraam etii nkop e Mesopotamia, ewuon eitu elotu amany Aran.

³Ketiaka ꞉Nkai ninye, <Tung'ai nkop ino o ltung'ana lo ltung'ana linono, nilo nkop naaitodol.>

⁴<<Neing'uaa ninye inia kop ee Kaldia nelo amany Aran. Kore payie eper papa lenye, neiwuetie ninye ꞉Nkai te inie meeu amany ana kop taata nimanyanya.

⁵Kore tana kop nikitii naa eitu apa eicho ꞉Nkai Abraam murua najo nenye, abaki rioto nabo. Kake keitaka ꞉Nkai ninye lekutuk nchere kore ninye o ichoi enye naa keaku ana kop nenye abaki meata ninye nkerai inia kata.

⁶Nejoki ꞉Nkai inji, <Kore kenya ichoi ino naa kepuo aabikie atua nkop eiching'a. Neitae rrindiki, neitami sina te inie larin 400.

⁷Kake kore inia kop napuo ꞉ninche aaisiaai era rrindiki, naa kadung'oki kenya nkiguana torno, naa kore tesiedi inia, naapuonu ꞉ninche aasai tene ng'oji.>

⁸Neicho taa ꞉Nkai Abraam muratare metaa nkitodolunoto e lmumai oatama o ninye. Neiu ꞉Abraam Isaka nemurat eata mperot isiet. Neiu ꞉Isaka Yakobo, neiu ꞉Yakobo layiok 12 oaataa lmareita 12 le Isirael.

⁹<<Kore lolo ayiok naa keata lalache obo oji Yosep. Kore amu keiputa ninche lom, nemiraki ninye ltung'ana le Misiri meitaa rrindik. Kake ketaa apa Nkai tenebo o ninye,

¹⁰nelaku taatua sinaitin pooki lenyena. Neicho ꞉Nkai ninye omom o ng'eno tekue Parao lkinkii le Misiri. Nepik ꞉Parao ninye nkitoria meitoria Misiri o nkang enye pooki.

¹¹<<Nelotu nkolong torno o sina kitok inia kop pooki e Misiri o Kanan, nelau lmakui lang ntoki nanya.

¹²Kore payie ening Yakobo ajo keatae ndaa te inia kop e Misiri, neirruaaya nkata ekue lmakui lang mechomo inie.

¹³Kore payie eitoki aaigil nkata e are, neibalakinyie Yosep koon lalachera lenyena, neyielou sii ꞉Parao nkang ee Yosep.

¹⁴Neirruaaya ꞉Yosep lkilikuai meyeu papa lenye Yakobo o nkang enye pooki netii ninye. Kore inia ang pooki naa ltung'ana 75.

¹⁵Nedou Yakobo alo inia kop e Misiri, nenang inie ana natanang'a lkulie makui lang ootuo tesiedi ninye.

¹⁶Neyae loik lenche aarriny Sekem, nepiki atua nkurarei nainyieng'ua apa ꞉Abraam taa layiok le Amor too nkuti ropiyiani.

¹⁷<<Kake kore etaa kenyiku nkata naitabari lekutuk oitaka ꞉Nkai Abraam, neaku ltung'ana lang kumo oleng te Misiri

¹⁸ana metumo Misiri lkinkii lemeyielo mbaa e Yosep.

¹⁹Kore ꞉ilo kinkii nepik ltung'ana lang loseg torno, neidachaki nkop lmakui lang, aisimaki ninche meiturrai nkera kunini naaini metuata.

²⁰<<Kore inia kata neini Musa, naa kera apa ninye nkerai ee mbene oleng. Neirrita ꞉ntoiwuo enyena ninye lapatin okuni taatua nkaji enche.

²¹Kore payie eaku merekure eidim aaisudoi ninye, neipung'ie aulo etii atua nkikapu. Nerrapu ntito e Parao neya aitubulu aaitaa layieni lenye.

²²Neiteng'eni Musa taatua ng'eno pooki ee Lmisiri neaku jartan to nkuroroto neatakanu taa asat.

²³<<Kore payie ebaya Musa larin artam, neyieuu ta ltau payie elo aisabaki lalachera lenyena oaara ltung'ana le Isirael.

²⁴Nedol lobo lenche erita ꞉ltung'ani loo Lmisiri, nelo ajing ninye nkoriong, neitalak aar ilo tung'ani loo Lmisiri metua.

²⁵Nejo ninye kebaki naa kedol lolo alachera lenyena le Isirael aajo keichoo ꞉Nkai ninye meitejeu ninche te rrindikicho, kake eitu edol ꞉ninche.

²⁶Kore mparri naijipu inia, netum ꞉Musa ltung'ana oare loo Isirael era, nejo ntemeleta ninche ajoki, <Lolewa, irara dei lalachera, aanyo payie irara?>

²⁷<<Kake kore ꞉ilo tung'ani orita likae, nerrumoo Musa nejo, <Ng'ae likintaa iyie lkitok lang o ladung'oni lang le nkiguana?

²⁸Ikiyieu dei nikiar ana ninkuna ng'ole ilo tung'ani loo Lmisiri?>

²⁹Kore payie ening Musa ana, neisig alo Midian, newuon te inie era ltung'ani leiching'a neiu layiok oare.

³⁰<<Kore payie eichunye aitoki larin artam, neipung'oki ꞉lmalaika la Laitoriani Musa te lng'ejep le nkima to suur nabo nailu. Ketaase apa inia too lkees onyikita ldonyuo le Sinai.

³¹Neing'asia Musa oleng payie edol inia. Kore payie enyikaki asipu, nening ltoilo la Laitoriani ejo,

³²<Kara nanu Nkai e lmakui lino, Nkai e Abraam o ne Isaka o ne Yakobo.> Neiputukuny Musa oleng, nemeitieu aing'ura inie aitoki.

³³<<Nejoki ꞉Laitoriani, <Ntai namuka inono amu kore inie nintacheyie naa ng'oji sinyati.

³⁴Katoduaa katukul sina onyeita ltung'ana lainien te Misiri, natining'o lkichiret lenche naa kayewuo payie alaku ninche. Kore taata, kaairruaya chomo Misiri.>

³⁵<<Naa ilo Musa apake oatanya ꞉ninche ejo, <Ng'ae likintaa iyie lkitok o ladung'oni le nkiguana?> Ninye eirruaayie ꞉Nkai metaa lkitok o lalakunoni lenche, te reto e lmalaika oipung'oka ninye ta laduo saar ooilu.

³⁶Neipung'unyie ninche aitai te Misiri, neas mbaa kutuaa e nking'asia o mbaa naitodolu nkitoo e Nkai te nkop e Misiri, neitoki aas tankalo mpaso naji Mpaso Nanyieke, neitoki aas nkulie baa kumo taa larin artam te lkees.

³⁷<<Ilo Musa taa apa otiaka Isirael, <Kore Nkai naa kelo aitupukoki ntae loiboni otuwuana nanu, taatua ltung'ana linchi.>

³⁸Kore taatua lolo tung'ana loo Isirael ooiturrurrote te lkees, naa keti Musa inie tenebo o ilo malaika oirorie chiaake ninye to ldonyuo le Sinai, netii sii tenebo o lmakui lang. Ketang'amayie ninye rerei oichu, payie eicho iyioo.

³⁹<<Kore lmakui lang naa meyieu nening ninye, kake ketanya ninye neiwuatuwuata taa ltauja lenche aayieu payie errinyokino Misiri.

⁴⁰Nejoki Aron, <Ntibiraki iyioo nkaitok naarik iyioo, amu kore ele tung'ani oji Musa otirikua apa iyioo aipung'unyie to nkop e Misiri, mikiyielo ntoki natumo ꞉ninye!>

⁴¹Kore ake te inia ng'amata, neitibir ꞉ninche nkai e sapare e nkitanyanyukoto e lache. Neitaki ninye lasar, nenya sikukuu tankaraki inia naaitibirita taa nkaik enche.

⁴²Kake neicho ꞉Nkai ninche nkoriong, neicho metoomon lakir o ndama o lapa, ana naigero ajo te mbuku ee loibonok le Nkai nchere: <Amaa ntae Lotung'ana kulo le Isirael, ikiyakita dei nanu lasarri o nkichoorot taa larin artam imanaa te lkees?

⁴³Kore ntae naa itanapa inia aji e inia ai naji Molek o nkitanyanyukoto e lakira naitacheki inia ai inchi naji Repan, nenia aitok nintaitua payie isaisai. Neaku kaiwuetie ntae enchom entamany teidialo Babilon.>

⁴⁴<<Kore apa lmakui lang naa keata nkaji e Nkai natii nkitanapat enyena to lkees. Naa keitoduaa apa ꞉Nkai Musa neiko payie eitibir inia aji te nkitanyanyukoto naitodua.

⁴⁵Neng'amaa lmakui lang oatai apa ta nkata e Yochua inia aji. Kore erikito Yochua ninche, neraya nkopi ee lkulie oreren ootimiraka ninche ꞉Nkai. Neyau inia aji atua inia kop, nebik inia aji teinie ana metabaki ng'amata e Daudi.

⁴⁶Neicho ꞉Nkai Daudi omon, neipar ꞉Daudi ninye tanaa keidim ateyiaki ng'oji newuenie Nkai e Yakobo.

⁴⁷Kake Solomon otechataka ninye nkaji nabik nasaayieki.

⁴⁸<<Kake kore ꞉Ilo ooisul pooki naa mewuenie atua nkajijik naatecheta ltung'ana, ana nejo loiboni le Nkai,

⁴⁹<Nejo ꞉Laitoriani, kore chumata naa ninye lorika lai le nkitoo, naa nkop lorika loo nkejek ainien. Naaku nkaji natiwuaja kichetakiki nanu, anaa aa ng'oji aidim nanu ayang'iyang'are?

⁵⁰Mara nkaina ai naitibira kuna pooki?>

⁵¹<<Ntae ltung'ana ogol kuechi oata ltauja o nkiyiaa nemening'icho! Iyanyiyany nkata pooki Ltau Sinyati ana neikuna lmakui linchi naa nejia sii inkoko ntae.

⁵²Amaa, keatae apa loiboni le Nkai leitu eitam ꞉lmakui linchi sina? Ketara abaki lolo ooibonutua apa lotunoto e ilo Loosipat. Naa ninye taata inchooitie niarar metua,

⁵³abaki aa ntae apa oaatang'amaitie nkitanapat naaing'uaa Nkai, naaitarasakita ntae lmalaikani neitu imbung'bung.>>

⁵⁴Kore ening'ito ꞉ninche kuna baa, negorokino Sitepano oleng, neony lala.

⁵⁵Kake kore Sitepano, eiputa ꞉Ltau Sinyati, neimariri chumata nedol nkitoo e Nkai o Yeso eitache te tetene e Nkai.

⁵⁶Nejo, <<Eng'ura kadolita chumata ebolo, neitache Nkerai e Ltung'ani te tetene e Nkai.>>

⁵⁷Nebuak lolo tung'ana to ltoilo sapuk, neiken nkiyiaa enche, nekuetiki ninye mij.

⁵⁸Neipung'unyie taatua ilo kerenket, neng'asu aanang too soito aar metua. Kore lolo tung'ana oata mbae nadung'okinyieki ninye nkiguana, neiteper nankan enche tankalo nkejek e ltung'ani obo lelerie oji Saulo.

⁵⁹Kore enang'ita ninche Sitepano, neomon Sitepano ajo, <<Laitoriani Yeso, tang'amai nkichui ai.>>

⁶⁰Negil kung nebuak aichir ajo, <<Laitoriani, minkenaki ninche ana ng'oki.>> Kore eidipa atejo nejia, neper.