Read Samburu Asat 8 Bible Online

Asat 8 - Samburu bible

Asat 8

¹Netachamayie sii Saulo metari Sitepano. Kore ake inia parri, neng'asuni aaitam sina kitok lolo tung'ana le nkanisa e Yerusalem. Nesachari ninche pooki aaisigaki Yudea o Samaria, mara ake lkipaareta.

²Kake kore eyia, nenukaa ꞉lewa oourie Nkai Sitepano, neichir oleng tankaraki ninye.

³Nejing'aa ꞉Saulo nkajijik enyok aaraa ltung'ana le Nkai, neibung lewa o ntomonok, nepik jila.

⁴Kore lolo pooki oiruko Kristo netasachayieki, nemanaa alikoo Lomon Supati.

⁵Nedoyio Pilipo alo lkerenkent oji Samaria, neliki ltung'ana le inie lomon le Kristo

⁶Kore payie ening lolo turrurri lomon le Pilipo nedolita mbaa naasita ninye naaitodolu nkitoo e Nkai, neur nkiyiaa tanaboicho aaning nejoito ninye.

⁷Kore taatua ltung'ana kumo oaata lairiruani, neipung'u ꞉lairiruani ebuakita too ltoilochi kutuaa, neichiunyieki sii lkumo ootigiligilete o lng'ojinia.

⁸Nejing ilo kerenket ng'ida kitok oleng.

⁹Kore apa te ilo kerenket naa keatae ltung'ani oji Simon, oirupucho neing'asia ltung'ana le Samaria, nejo apa kera ltung'ani kitok oleng.

¹⁰Kore ltung'ana pooki, kutuaa o lkunini neur nkiyiaa nejo, <<Kore ele tung'ani naa inia golon e nkai naipoti aajo <Ngolon Kitok.> >>

¹¹Neur nkiyiaa aainining amu keing'asia nkaisicho enye ninche ta nkata naado.

¹²Kake kore payie eiruk ꞉ninche Pilipo olikita Lomon Supati ooipirita nkitoria e Nkai o nkarna e Yeso Kristo, neipatisi ninche, lewa o ntomonok.

¹³Neiruk abaki ꞉Simon ninye neipatisi, neirukurukore Pilipo ng'oji pooki nelo. Naa kore edolita mbaa kutuaa naasita Pilipo, naaitodolu nkitoo e Nkai o mbaa e nking'asia, neing'asia.

¹⁴Kore payie ening Lkipaareta otii Yerusalem nchere ketang'amaitie ltung'ana le Samaria rerei le Nkai, nerewaki ninche Petero o Yoana.

¹⁵Nebau ninche inie, noomonoki ltung'ana payie etum Ltau Sinyati,

¹⁶amu kore apa lolo tung'ana keipatisaki ta nkarna e Laitoriani Yeso metaa lenyena, kake ewuon eitu edoki ꞉Ltau Sinyati.

¹⁷Neiteleki ꞉Petero o Yoana ninche nkaik, netum Ltau Sinyati.

¹⁸Kore payie edol Simon ajo ketumi Ltau Sinyati teneiteleki ꞉Lkipaaret ltung'ana nkaik, neicho ninche ropiyiani

¹⁹nejoki, <<Enchooki abaki nanu ana kitoo, metaa kore pooki laiteleki nkaik ainien netum Ltau Sinyati.>>

²⁰Nejoki ꞉Petero ninye, <<Ndaai o ropiyiani inono! Eji ijo duo iyie indim ainyiang'u nkichooroto e Nkai too ropiyiani?

²¹Kore iyie naa meata ntoki ning'ar o iyioo tana kitoria, nemeata ntoki nitum, amu kore niparraa ta ltau lino naa mara supat tekue Nkai.

²²Mbelekenyaii tung'ai kuna parrunot torrok nikiti ltau, niomon Laitoriani paa tanaa keidimai, nikipaliki.

²³Amu kadol ajo iata lom torno, niena too ng'ok.>>

²⁴Nejoki ꞉Simon ninche, <<Entoomonokaaki Laitoriani, payie meata ntoki naatum too kuna pooki nikitiakita.>>

²⁵Kore payie elimu sipata enche aaipidaki, netilikoitie rerei la Laitoriani, nerrinyo Petero o Yoana Yerusalem. Kore epuoito nelikoo Lomon Supati taa nkang'ite kumo e Samaria.

²⁶Nejoki ꞉lmalaika la Laitoriani Pilipo, <<Inyuo saai ile e mparkiji todoi chomo inia oitiei e loliyio, nadoyio te Yerusalem alo Gasa.>>

²⁷Neinyuototo ninye alo inie. Kore payie ebaki inie, netum ltung'ani kitok oitacheki parakuoicho pooki e Kandase, nkinkii e Itopia, naa kore ilo tung'ani naa lmong'o. Kechomo apa ninye Yerusalem aomon,

²⁸naa nkang enye echuko aloito inia kata, eisomita mbuku e loiboni le Nkai Isaya to ltoilo sapuk ewuon te nkeper e nkarri enye nayiataa ꞉mbartan.

²⁹Nejoki ꞉Ltau Sinyati Pilipo, <<Chomo tinyikaki inia arri, niriamariyie.>>

³⁰Nekuetiki Pilipo inia arri, nening ilo tung'ani eisomita mbuku e loiboni le Nkai Isaya, nejoki, <<Amaa, ining'uta sa dei inia nisomita?>>

³¹Nejoki, <<Aji aiko tananing'u maata ltung'ani laaliki?>> Neitoomon Pilipo metidira awuon tenebo o ninye.

³²Kore neisomita ninye too Lkigerot Sinyat naa ene: <<Etirikoki ana nker inie, neyieng'ichiereki neitu ebol nkutuk enye, ana lkuoo leker ogira edung'utoi lpapit.

³³Kore eitamitae anyit, neitu etum nkiguana naichiaakino. Ng'ae oidim aimaki ichoi enye? Amu ketooruaki ninye nkichui enye tene to nkop.>>

³⁴Neitoki ꞉ilo kitok ajoki Pilipo, <<Tilikaaki ja ajo, ng'ae dei eimakita loiboni le Nkai tana najoito, koon ana likae tung'ani?>>

³⁵Neng'asunyie taa Pilipo ilo rerei oisomita duo, aliki ninye Lomon Supati le Yeso.

³⁶Kore eibung'uta ninche nkoitiei aapuo netum nkare, nejoki ꞉ilo kitok Pilipo, <<Ng'ura, nana nkare! Nyo naaiboyoo payie maaipatisi[1]?>>

³⁸Neitanapicho ilo kitok meitacheyieki inia arri, nedoki ninche pukura nkare, neipatis ꞉Pilipo ninye.

³⁹Kore payie eipung'u ninche taatua inia are, neya ꞉Ltau Sinyati la Laitoriani Pilipo, metaa eitu eitoki adol ninye. Neibung ilo tung'ani nkoitiei alo eng'ida.

⁴⁰Kore Pilipo, nedoli etii lkerenket le Asoto, emanaa too lkerenketi pooki elikoo Lomon Supati ana metabaki lkerenket le Kaisaria.