Read Samburu Asat 9 Bible Online

Asat 9 - Samburu bible

Asat 9

¹Kore apa Saulo, naa ewuon ake etipide eituria, netumuta ar metuata looiteng'eni la Laitoriani. Nelo netii laitainoni kitok la lasar,

²neomon ninye meigeroki mpala naaya Sinagogini pooki e lkerenket le Damasikas, metaa tenetum ꞉ninye ltung'ana ooirukurukore nkoitiei e Yeso, pee era lewa anaa ntomonok, neibung aya Yerusalem.

³Kore eloito etinyikaka Damasikas, newong'aki wong'an naing'uaa chumata taa mbat pooki.

⁴Nenang nkop, nening ltoilo ojo, <<Saulo, Saulo, aanyo payie kintamita sina?>>

⁵Newoliki ajoki, <<Ng'ae dei ira iyie, Laitoriani?>> Nejoki ilo ꞉toilo, <<Kara nanu Yeso, ilo lintamita sina.

⁶Kake inyuo ntacho, nilo ilo kerenket liloito duo, amu ikilikini ntoki nilo aas.>>

⁷Kore lboitieii le Saulo, neitachoo mebol nkutukie ening'ito ake ltoilo, neitu edol ilo tung'ani oirorita.

⁸Neinyuototo Saulo to nkop, kake kore payie ebol nkonyek enyena, naaku merokure edolicho. Neibung ꞉ninche ninye nkaina, nerik Damasikas.

⁹Newuon mperot uni medolicho, nemenya ndaa, nemeitoki emat.

¹⁰Kore taatua Damasikas neatae loiteng'eni obo oji nkarna Anania. Kore etuwuana keidetdetita nedol Laitoriani eipot ajoki, <<Anania.>> Neng'amaa ajo, <<Lele nanu Laitoriani.>>

¹¹Nejoki ꞉Laitoriani, <<Inyuo chomo lketiketi oji Nkoitiei naipida. Kore iti inie, chomo nkaji e Yuda, niyiaya Saulo lo lkerenket le Tarso amu keomonito teinie.

¹²Ketoduaa ninye to nduata ltung'ani oji Anania elotu netii aiteleki ninye nkaik payie eitoki adolichoi.>>

¹³Nejo Anania, <<Laitoriani katining'o too ltung'ana kumo lomon lele tung'ani. Ketilimutua newua ntorno naitaasa ꞉ninye sinyat linono te Yerusalem.

¹⁴Kore taata ninye naa keyewuo eata nkitoria naing'uaa laitainok kutuaa la lasar naibung'ie lolo pooki oipot nkarna ino.>>

¹⁵Kake nejoki ꞉Laitoriani ninye, <<Chomo, amu kore ele tung'ani naa kategelua ꞉nanu ninye payie elikoo nkarna ai too tung'ana le Isirael o too lkulie oreren o lkinkii.

¹⁶Naa kaitodol nanu ninye newua sina laa meata ajo metum tankaraki nkarna ai.>>

¹⁷Nelo Anania nejing inia aji, neiteleki Saulo nkaik nejoki, <<Lalache lai Saulo, kore Laitoriani Yeso likimpung'oka apa to nkoitiei ilotuta, naa kaaterewaka iyie payie itum aitoki atodolicho, nikimput ꞉Ltau Sinyati.>>

¹⁸Kore ake inia kata, nerrarrunye ntokitin naatuwuana sigat too nkonyek e Saulo, neitoki ninye adolichoi. Neinyuototo neipatisi,

¹⁹kore payie enya ndaa negolu. Nebik Saulo nkuti perot tenebo o looiteng'eni otii Damasikas.

²⁰Kore ake inia kata, neng'asu alikoo tee Sinagogini nchere kore Yeso naa Nkerai e Nkai.

²¹Kore pooki ootining'o ninye neing'asia nejo, <<Mara dei lapa tung'ani ele oyieu neidakie ltung'ana ooipot ana arna te Yerusalem, neyewuo taata ene payie etum aibung'a ninche ayaki laitainok kutuaa la lasar?>>

²²Keidimie ꞉Nkai Saulo mechomo kue aicho ngolon, neitigir Lyiaudi oaamanya Damasikas metala nejo, eitededeyie nchere kore Yeso naa ilo Aitejeunoni apa oanyutae.

²³Kore eima mperot kumo, nechamaa Lyiaudi payie ear ninye metua,

²⁴kake nekurru Saulo mbaa enche. Kore kuarie o parkiji neitirrichaki lolo Yiaudi aairrita oleng ltim le ilo kerenket, payie etum aatar ninye metua.

²⁵Kake neya ꞉looiteng'eni lenyena ninye kuarie, nepik atua nkikapu, neitodoyio aimie long'u le suntai e ilo kerenket too lgiitani.

²⁶Kore payie elotu ninye Yerusalem, nenyok ajo taa tenebo o looiteng'eni le Yeso, naaku keurie pooki ninye, neitu eiruk nchere ketaa ninye loiteng'eni.

²⁷Neyau ꞉Barnabas ninye netii lkipaareta, neliki ninche neikuna Saulo eloito to nkoitiei payie edol Laitoriani, o inia natiaka ꞉Laitoriani ninye. Neitoki aliki neikuna Saulo payie elikoo ta Damasikas meata ngureticho ta nkarna e Yeso.

²⁸Naaku, newuon Saulo tenebo o ninche te Yerusalem eata lakunoto, elikoo ta nkarna e Laitoriani meata ngureticho.

²⁹Neirorie eichankarrare lolo Yiaudi ooiro nkutuk ee Lgirriki, kake kore ninche, nenyok aajo entar ninye metua.

³⁰Kore naa payie eyielou lolo oiruko Yeso inia, nerik ninye aaitodoyio aya lkerenket le Kaisaria, neduaya mechomo Tarso ilo kerenket oing'uaa apake.

³¹Kore apa inia kata, keata nkanisa seriani ta mbata e Yudea o ne Galilaya o ne Samaria pooki. Nelo kue ebulu to uriata e Laitoriani eitogol neitarriyian ꞉Ltau Sinyati, neaku ltung'ana kumo.

³²Kore emanaa Petero aim ng'oji pooki aisabaki sinyat le Nkai, nebaki sii lolo oaamanya lkerenket oji Lida.

³³Netum teinie ltung'ani obo oji nkarna Enea, otigilgile netepero eitu einyuototo larin isiet.

³⁴Nejoki ꞉Petero, <<Enea, ikinchiunyie ꞉Yeso Kristo taata, inyuo tigila lchoni lino.>> Neinyuototo nabokata aitache.

³⁵Kore lolo tung'ana pooki oaamanya lkerenket le Lida o ang'ata e Charon, nedol ilo tung'ani otigilgile eichiwua, neibelekenya aairuk Laitoriani.

³⁶Kore apa te Yopa naa keatae nabo e naaiteng'eni naji Tabita, naa kore ana arna to nkutuk ee Lgirriki naa keji Dorkas. Ketaasa apa ninye asat kumo supati, neret loomena nkata pooki.

³⁷Kore ake ewuon etii Petero Lida, nemuai Tabita neper, neituki sesen lenye nepiki lgilata le nkaji e keper.

³⁸Naa kore amu ketaanikino apa lkerenket le Lida o Yopa nening looiteng'eni aajo ketii Petero inie, Neirruaaya ltung'ana oare meteleja aajoki, <<Wou matesioi aapuo tenebo Yopa.>>

³⁹Neinyuototo Petero neirukurukore ninche. Kore payie ebau, neitidiri lgilata le nkaji e keper. Nepuonu nkoilia pooki nkalo ninye, eichirita neitoduaaya nankan naapaapaacha naaitibira Tabita ewuon apa etii tenebo o ninche.

⁴⁰Neipung'ie ꞉Petero ninche pooki mechomo boo, negil kung neomon Nkai. Neiwuatuwuatakino ilo sesen nejo, <<Tabita, inyuo!>> Nebolu ninye nkonyek, kore payie edol Petero neinyuototo awuon.

⁴¹Neirruaki ꞉Petero ninye nkaina neret meinyuo aitache. Neipotu sinyat le Nkai etii nenia oilia, neitodol ninche Tabita eichu.

⁴²Nening ltung'ana pooki le Yopa inia nataase, neiruk ꞉lkumo Laitoriani.

⁴³Nebik Petero mperot kumo te Yopa ta nkang e lpayian oji Simon oara lakitoni loo lchonito o ndapan.