Read Samburu Rroman 1 Bible Online

Rroman 1 - Samburu bible

Rroman 1

¹Kore ana palai, naa nanu Paulo eing'uaa, laisiaayiani la Laitejeunoni Yeso, naaipoto ꞉Nkai mataa Lkipaaret naategelua matilikoi Lomon Supati lenyena.

²Kore lolo Omon Supati naa lekutuk oitayia apa Nkai aimunyie loibonok lenyena too Lkigerot Sinyat.

³Naa keipirita Nkerai enye, nara te inoto ne ntalipa e Daudi,

⁴kake kore ta Ltau lenye le sinyaticho, neitodoluni to ngolon aajo kera Nkerai e Nkai payie eitipiuni taatua lootuata. Kore lolo omon naa Yeso Kristo Laitoriani lang eipirita.

⁵Laa te ninye kitang'amaitie iyioo munyani o nkitoo naata Lkipaareta lenyena, paa kore taatua lochon pooki lemeyielo Nkai, nikintaa ltung'ana metaa looning Nkai tankaraki nairuko Lomon Supati likilikorita, nerrepi nkarna e Nkai.

⁶Naa kore sii ntae, itii atua lolo ooipotoki metaa le Yeso Kristo.

⁷Kairoroki ntae pooki ootii Rrom, oacham ꞉Nkai neipoto metaa sinyat lenyena. Metaa munyani o sotua naing'uaa Nkai papa lang o Laitoriani lang Yeso Kristo tenebo o ntae.

⁸Kore nekue, naa karrinyoki Nkai ai nache ta nkarna e Yeso Kristo tankaraki ntae pooki, amu kelikoritae nkurukoto inchi to nkop pooki.

⁹Amu Nkai naisiai chiaake ta ltau lai alikoo Lomon Supati le Nkerai enye, nayielo ajo mapal maipot ntae mparri pooki to nkomono ai.

¹⁰Kore ntoki nabo chiaake naomonu, naa payie eidimai taata natum mpaach nalotunyie adol ntae echam Nkai,

¹¹amu kayieu oleng nadol ntae payie atum atang'arie ntae nkichooroto e Ltau le Nkai payie eitogoli ntae.

¹²Kore najoito naa ana, nchere kayieu nalotu inie nitii payie kitum aitogoloto to nkurukoto niking'ar tenebo, aitogol nanu ntae to nkurukoto ai, nikintogolgol sii ntae nanu te ninchi.

¹³Kayieu niyielouu lalachera o nkanachera aajo mara nkata nabo atanape alotu nitii, kake naaiboori ana metabaki taata. Kore payie ayieu nalotu nitii, naa payie etum Lomon Supati lalikorita aatiuu lng'anayio taatua ntae, ana payie etiutua too lkulie oreren.

¹⁴Kaaing'urie Nkai Lomon Supati payie aliki lochon pooki, lolo tung'ana loo Lgirriki o lamara loo Lgirriki, o lolo ooisomate o leitu eisoma.

¹⁵Naaku kore ta nanu, kaata yieuna sapuk nalikinyie ntae sii otii Rrom Lomon Supati.

¹⁶Madol nanu anyit too Lomon Supati, amu ninche ngolon e Nkai naitejeu pooki ng'ae ooiruk, ang'asu too Lyiaudi neitoki Lgirriki.

¹⁷Amu kore Lomon Supati, naa keibalunyie neiko Nkai teneicho ltung'ana sipata enye naicho metumo sotua oipida o ninye. Naa kore ng'asunoto o nkiting'oto naitabarieki ele sotua, naa nkurukoto. Ana nejo Lkigerot Sinyat nchere, <<Kore ilo loosipat naa nkurukoto eichiwue>>

¹⁸Amu keibalunyieki ngoro e Nkai erere mbaa pooki naaitodolu aajo meurie ꞉ltung'ana Nkai o ntorroni pooki ee ltung'ana ooiboorie ntorno enche ndedei.

¹⁹Naa keibala mbaa naaipirita yielounoto e Nkai tee ninche, amu Nkai naibalakinyie ninche.

²⁰Kore apake payie eitaini nkop, kore inia pukunoto enye nemelio, aa ngolon ee ntarasi o mpukunoto e aaicho enye, naa kesipuni, neyielouni too ntokitin naaitayia ninye. Naaku meata neiko ninche tenejo meyielo Nkai.

²¹Amu kore abaki eyielo Nkai, eitu eyanyit ninye ana Nkai anaa eicho nache, kake kore enyok aaparraa mbaa, nepong'ori ninche, neitimisimisi mparrunot enche naamada.

²²Kore abaki eikarrapa aajo kera ng'eni neaku ninche lmada.

²³Neitapaach nkitoo e Nkai nemeye aikata o nkaitok e sapare naainyinyukore ltung'ana ooye o nkueeny o suom anaa ng'uesi naaye.

²⁴Kore tankaraki inia, neichooyo ꞉Nkai ninche meeirukurukore ng'uarrat ee ltauja lenche payie ejing atua mbaa nemeichiaakino, neitala seseni lenche nkanyit maate.

²⁵Keitapaachita ndedei e Nkai o sapare, nesai neisiaai ntokitin naitayia ꞉Nkai, alang nesai ninye oisisi ntarasi! Aamin.

²⁶Kore tankaraki inia, neichooyo ꞉Nkai ninche meirukurukore ng'uarrat enche e anyit. Kore ng'orio enche neitapaachita mboita e sesen naatae apake o mboita e sesen nemeyiere neasi.

²⁷Kore sii aitoki lewa neiko nejia. Ketung'aitie mboita apake naatae o ntomonok, nepejori too ng'uarrat eyieu neboita maate. Neas lewa o lewa mbaa e anyit, naaku kore inia wochoto nachiaakino inia kiminata enche, netum ninche.

²⁸Naa kore amu eitu edol ninche aajo keichiaakino payie eata Nkai mpaach to mparrunot enche, neicho ꞉Nkai ninche meirukurukore mparrunot enche naatarroitie payie eas mbaa nemeichiaakino.

²⁹Neiput ninche ꞉ntorroni pooki o ntorno o liboi o lmena, neboreii lom o arichoi o nchankar o nkitamaaya o mang'antiticho o nkurrare.

³⁰Kera ninche ltung'ana oaar lkulie tee rerei, neiba Nkai, netuata seseni, neilach, negol kuechi, nechetu ntorrok, nemeanyit ntoiwuo enche,

³¹nemada, nemeisiligai, nemeata nchaman, nemeata lng'ur.

³²Kore kulo tung'ana naa keyielo nkitanapata e Nkai, nchere kore lolo oaas kuna baa naa keichiaakino lkiye, kake kore eyia, mara ake nenia baa eas, kake keitoki achamaa pooki oaas.