Read Samburu Rroman 10 Bible Online

Rroman 10 - Samburu bible

Rroman 10

¹Lalachera o nkanachera, kore nayieu oleng taatua ltau lai, naomon Nkai tankaraki ltung'ana lang loo Lyiaudi, naa payie eitejeuni.

²Kaata sipata naipirita ninche nchere kenyok aaisiaai Nkai, kake meyielo

³inia naitaa ltung'ani asipani ta Nkai. Nenyok aaitaa ate loosipat, naaku eitu eitodoyio ate meitaa ꞉Nkai ninche loosipat.

⁴Amu Kristo nkiting'oto ee nkitanapat, paa kore pooki ng'ae oiruk neikeni aajo loosipat.

⁵Amu keigero ꞉Musa naipirita inia sipata natumi te nkibung'ata ee nkitanapat ejo, <<Kore ltung'ani oas nayieu nkitanapat, naaku nkitanapat eichiwue.>>

⁶Kore naipirita inia sipata nayau sotua oipida o Nkai natumi te nkurukoto naa inji ejo Lkigerot, <<Mijo ta ltau lino, <Ng'ae dei kenya oiliep alo chumata?>, eji ayau Kristo abori

⁷nimijo sii, <Ng'ae odoki lodo le nkop?> >>, eji aitai Kristo taatua lootuata.

⁸Kake kejoito aa? Kejo, <<Ikinyikita ꞉rerei, keti nkutuk ino o ltau lino>>, ilo rerei taa oipirita nkurukoto nikilikoo.

⁹Naaku tinimbalie iyie to nkutuk ino nchere kera Yeso Laitoriani, niruk ta ltau lino ajo keitipiwua ꞉Nkai ninye too lootuata, naa ikintejeuni iyie,

¹⁰amu ta ltau eiruk ltung'ani neitaae loosipat, naa to nkutuk eibalie nejeu.

¹¹Kejo Lkigerot Sinyat, <<Meata hoo obo oiruk Yeso oitami anyit.>>

¹²Amu mepaacha ltung'ani loo Lyiaudi o loo lkulie oreren, ilo Aitoriani ake oara Laitoriani loo pooki, naa keicho mayianat enyena pooki ng'ae oipot ninye.

¹³Amu, <<Kore pooki ng'ae oipot nkarna e Laitoriani naa keitejeuni.>>

¹⁴Naa aji eiko ltung'ana teneipot ilo leitu eiruk? Naa aji eiko teneiruk ilo leitu apake ening? Naa aji eiko tenening tenemeata lalikoroni?

¹⁵Naa aji eiko ltung'ana tenelikoo teneitu eirruaari? Ana naigero ajo, <<Kewuaa sa supaticho tenening'oi nkejek ee lolo oolikoo Lomon Supati!>>

¹⁶Kake eitu eiruk pooki Lomon Supati, ana natejo loiboni le Nkai Isaya, <<Laitoriani, ng'ae oiruko lkilikuai otining'o tee iyioo?>>

¹⁷Naaku, kelotu nkurukoto te inia naning'i, naa kore inia naning'i kelotu te likoroto e rerei le Kristo.

¹⁸Kake kaiparu, eitu sa ening ninche? Ketining'o dei, amu kejo Lkigerot, <<Kechomo ltoilo lenche nkop pooki, nechomo rerei lenche neiting'ie nkop.>>

¹⁹Kaiparu sii aitoki, eitu apake ening'u Isirael? Ketining'o, kake eitu eng'amaa. Ketejo Musa, <<Kapik ntae lom tankaraki ltung'ana lamara lo lorere linchi, naitogor ntae entogorokinoto lorere lemeyiolo apake Nkai.>>

²⁰Netejo aitoki ilo oiboni Isaya te mpijan, <<Kaatumo apa ꞉lolo lamaayiaya, naibalakinyie koon lolo lamaaiparuta.>>

²¹Kake kejoki ꞉ninye ltung'ana loo Isirael, <<Kore ta mparri pooki kairruaaka ntae nkaina ltung'ana lemening'icho, negol kuechi.>>