Read Samburu Rroman 11 Bible Online

Rroman 11 - Samburu bible

Rroman 11

¹Naiparu naa ajo, amaa, keiturrayie sa Nkai ltung'ana lenyena? Nakaiting'o! Eitu eiturraa, amu kore sii nanu naa kara loo Isirael ichoi e Abraam, la lmarei le Benjamin.

²Eitu eiturraa ꞉Nkai ltung'ana lenyena ooteyielo apake ta ng'asunoto. Ana miyielolo nejo Lkigerot Sinyat teinie ng'oji neipirita Elija, neikuna pee eyaki Nkai mbaa ee ltung'ana lee Isirael ejo,

³<<Laitoriani, ketara loibonok linono, netodotoitie lpereren linono la lasar, naa nanu ake apeny owuon eichu neyieita nkichui ai.>>

⁴Kake amaa dei, nyo etoolika ꞉Nkai ninye? Ketoolika ajoki, <<Kaiteng'elaka koon lewa nkalupuni sapa leitu egilaki Baal nkung'uchi enche aasai.>>

⁵Naaku kore abaki taata tana ng'amata, keatae muro nategelua ꞉Nkai te munyani enye.

⁶Naa tanaa te munyani etegelua naaku meirichakino ngelunoto e ltung'ani asat enyena, amu tanaa nejia, naa meitoki naa munyani ara munyani.

⁷Naaku nyo ejoito kuna pooki? Kore apa naiyieita Isirael naa eitu etum, kake ketumo ꞉inia muro. Kore lkulikae pooki naa keitogoloki ltauja lenche,

⁸ana naigero ajo, <<Ketipika ꞉Nkai ninche ltauja lememuso, nemening'u o nkonyek nemedolicho o nkiyiaa nemening'icho ana metabaki ana parri.>>

⁹Nejo Daudi, <<Metaa nduaata enche rruachet o lgiitani ooibung'ieki ninche, meterriaa ninche, neaku laata enche torno.

¹⁰Metipiki nkonyek enche naimin payie medolicho, neirrigi nkoriong'i enche ntarasi.>>

¹¹Kaiparu naa ajo, amaa Isirael ketorrorrote apa payie meinyuototo aitoki? Nakaiting'o, eitu! Kake eitu eiruk, neicho inia lkulie oreren ꞉njeunoto payie etum Isirael lom.

¹²Kore tankaraki neitu eiruk ninche, netum nkop pooki mayian, neaku inia ng'orikinoto enche dupoto too ltung'ana lamara loo Lyiaudi. Kewuaa sa mayian natumi, tenechukunyie Isirael pooki aairuk Yeso!

¹³Naa kairorie naa ntae ltung'ana loo lkulie oreren lamara loo Lyiaudi. Kara nanu lkipaaret linchi, naa kore tankaraki inia kang'idare ilo siaai lai lo lkipaaret,

¹⁴aata ajo payie apik lorere lai loo Lyiaudi lom, naitejeu lbata lenche.

¹⁵Amu amaa tanaa kore inia kiturrarroto e Isirael neyau melet nkop, nyo sa naasai teneng'amari aitoki ninche te nchula e Nkai? Meitoki nkae mara ake tenetuwuana ketum lootuata nkichui.

¹⁶Kore tanaa keisinyati orati e ndaa ekue naitakini Nkai, naaku keisinyati inia daa pooki. Naa tanaa keisinyat ntana naa keisinyat sii sura.

¹⁷Keteng'eruaki mbata ee sura e lng'erriyioi otuunoki nerubakini surai e lng'erriyioi le ntim metubulu tenebo o nkulie sura e ilo ng'erriyioi otuunoki. Kore naa ntae lamara Lyiaudi, itiuu ana inia surai e ntim naturubakaki ilo ng'erriyioi otuunoki payie ing'arng'ar parakuoicho e inia tanai e ilo ng'erriyioi,

¹⁸minkar naa tankaraki nenia sura naateng'eruaki. Naa tininkar, taparru ajo mara iyie oibung'uta ntana, kake ntana nikimbung'uta iyie.

¹⁹Indim iyie atejo, <<Keteng'eruaki nenia sura payie aarubakini nanu ilo cheni.>>

²⁰Kedede inia, keteng'eruaki ninche tankaraki nemeata nkurukoto, naa irubakino iyie tiniwuon taatua nkurukoto. Minkar, kake tuureicho!

²¹Amu tanaa eitu epal Nkai sura naatubuluta apake, mikipal sii iyie.

²²Teyielo naa ajo, kenana ocheke Nkai nericho. Kericho too lolo ooterriete, nenana ocheke te iyie tiniwuon taatua supaticho enye. Naa tiniminko nejia niking'eruni sii iyie,

²³naa kore abaki nenia sura apa naateng'eruaki naa kerubakini aitoki tenemepuo kue meiruk, amu keata Nkai ngolon narubakinyie.

²⁴Amu amaa tanaa ikiteng'eruaki iyie te ilo ng'erriyioi oara apake le ntim, nikirubakini ilo ng'erriyioi otuunoki leitu apake ibulunyie, kebaa sa elelek tenerubakini nenia sura lng'erriyioi laa ninye apake etubulunyie?

²⁵Amu lalachera lainien, kayieu niyielouu ana bae naisudoro, payie midoldol ate aajo irara toki. Kore naa inia naisudoro naa ana, keitogolito lbata loo Isirael nkuechi, ana meiputakinoto ltung'ana pooki loo loreren lamara loo Lyiaudi.

²⁶Naa te inia eitejeuni Isirael pooki ana naigero ajo, <<Sion eing'uaa lalakunoni, naa keoru lmarei le Yakobo mbaa naaitodolu aajo meurie Nkai.

²⁷Naa ele lning'o lai o ninche, tanaaoru ng'ok enche.>>

²⁸Kore inia natanya ꞉ninche Lomon Supati, nera lmang'ati le Nkai, neaku inia dupoto taa ntae. Kake kecham ꞉Nkai ninche, nera sotua lenche tankaraki nategelua lmakui lenche.

²⁹Amu mejak ꞉Nkai nkichoorot o nkupototo naichorua.

³⁰Kore apa itanya ntae ining'ining Nkai neing'urrie taata ntae tankaraki natanya Lyiaudi ening ninye.

³¹Nejia sii eikuna ꞉ninche nchere ketanya taata ening Nkai payie etum Nkai aing'urrie ninche tesiedi.

³²Amu eteenika ꞉Nkai pooki ming'ano payie etum aing'urrie pooki.

³³Kebaa siake nguton e parakuoicho o ne ng'eno o ne inia naa nemeitoki meyielo ꞉Nkai! Meidimai payie iyielou aichu mbaa naadung Nkai, nemeyielounoi nkoitieii enyena!

³⁴Ana nejo lkigerot, <<Amu ng'ae oteyielo mparrunot e Laitoriani Nkai, anaa ng'ae oidim aitaarriyiana ninye?

³⁵Anaa ng'ae oichoo ninye sile, eji metaa kelaaki ninye ꞉Nkai?>>

³⁶Amu kore ntokitin pooki naa ninye eing'uaa, naa ninye sii eichiwue naa ninye etiyie ntokitin pooki peetii. Metaa nenye nkisisa ntarasi, aamin!