Read Samburu Rroman 15 Bible Online

Rroman 15 - Samburu bible

Rroman 15

¹Kore iyioo oogol to nkurukoto, keichiaakino tiniking'iri nchalan ee lolo oaachal, namara ake payie kinting'id ate.

²Meatae lobo lang lemeyiere neiting'id likae eitaas supat payie erreten ninye.

³Amu kore abaki Kristo naa eitu eiting'id koon, kake keigero ajo, <<Kore ng'elaa ee lolo liking'elaki naa nanu etumo.>>

⁴Amu kore pooki naaigeroki apake too Lkigerot naa keigeroki payie eiteng'en iyioo, paa kore te ng'iriata o rreten nikitum too lolo Kigerot, nikimbung siligi lang.

⁵Meichoo ntae Nkai naa ninye eing'uaa ng'iriata o rreten entum mparrunoto nabo ana inia naata Kristo Yeso,

⁶paa kore tanaboicho o to ltoilo obo, nitumokiki aisisa Nkai e Laitoriani lang Yeso Kristo naa ninye sii Papa lenye.

⁷Entang'amaroto, ana payie etang'amayie ntae Kristo, payie etum Nkai nkisisa.

⁸Amu kajoki ntae nchere, ketaa Kristo laisiaayiani too Lyiaudi payie eitodolu ajo keisiligai Nkai, netum aitededeyie lekutukie apa ooichoo Nkai lmakui,

⁹netum lkulie oreren aisisa Nkai tankaraki e lng'ur lenye, ana naigero ajo, <<Tankaraki inia, kaaisis iyie taatua loreren lamara loo Lyiaudi, narany arrep nkarna ino.>>

¹⁰Nejo aitoki, <<Enting'idata ntae loreren lamara loo Lyiaudi tenebo o ltung'ana lenyena.>>

¹¹Neitoki ajo, <<Esisa Laitoriani ꞉ntae loreren pooki, ninchocho ltung'ana pooki meisisa ninye.>>

¹²Neitoki Isaya ajo, <<Keipung'u kenya ntanai e Yese, ilo oiliepu aitore loreren, neisilig ꞉loreren ninye.>>

¹³Naa meiputa ntae Nkai e siligi ng'ida o sotua irukuruk ninye, paa kore to ngolon e Ltau Sinyati nirrapaii te siligi.

¹⁴Kore nanu lalachera o nkanachera ainien, kaata sipata naipirita ntae ajo, kebore ntae supaticho, nebore ng'eno, naa indimdim aaitaarriyianata maate.

¹⁵Kake kore eyia, kaigeroka ake ntae aaitieu, aitaparru ntae nkuti baa. Kataasa inia tankaraki munyani naaichoo ꞉Nkai,

¹⁶mataa laisiaayiani le Kristo Yeso payie atum atabaki ltung'ana loo loreren, nalikoo Lomon Supati ana neas laitainoni la lasar teneitai lasar, payie eaku ltung'ana loo loreren nkichooroto nang'amaa ꞉Nkai, eitisinyaki to ngolon e Ltau Sinyati.

¹⁷Naaku kailach taatua Kristo Yeso tankaraki inia kisiaayiare ai te Nkai.

¹⁸Amu meatae ntoki naitieu airoro mara ake inia nataasa Kristo ta nanu, payie etum loreren aayanyita Nkai. Kaatasichere ninye tee rereii o taa asat

¹⁹o taa asat naaitodolu nkitoo enye o taa mbaa e nking'asia o to ngolon e Ltau Sinyati. Paa kore ang'asu te Yerusalem o lubot naanyikita ana metabaki mbata e Ilirikum, nalikoo Lomon Supati le Kristo to ng'oji pooki.

²⁰Naaku katumuta apa ajo malikoo Lomon Supati to ng'oji neyieloi Kristo, payie machet neitamanyua ꞉likae.

²¹Kataasa ana inia naigero ajo, <<Kore lolo leitu apake elikini mbaa enyena, naa kedol, naa kore lolo leitu ening apa nening'u.>>

²²Kaaibooyieki nkatitin kumo paa malotu nitii.

²³Kake kore amu merokure aata siaai too kuna bat e nkop, nateyiewua apake larin kumo nalotu nitii,

²⁴kaisilig ajo kaisabaki ntae aimaa aloito Sipein, nawuon tenebo o ntae peneu ang'idakino mboita inchi, kore tesiedi inia nikintanapnap machomo kue to lototo ai.

²⁵Kake kore taata, kaloito Yerusalem ayaki sinyat le Nkai otii inie, nkichoorot naaretieki.

²⁶Amu kore ltung'ana le mbata e Makedonia o Akayia naa ketachamaitie aaitai sotua o lolo aisinak sinyat otii Yerusalem.

²⁷Ketachamaitie ninche pee eas inia, naa kedede keata sile enche. Amu kore tanaa ketang'arie ltung'ana le Yerusalem mayianat e Ltau ltung'ana loo loreren, keichiaakino sii payie eret ꞉ninche ltung'ana le Yerusalem too ntokitin naayieu.

²⁸Kore naa tanaidip aitabaki ninche ntokitin pooki naatobosuaki, naimu ntae aloito kue abaki nkop e Sipein,

²⁹naa kayielo nchere kore tanalotu nitii, nemayian ntae Kristo katukul.

³⁰Kore ta Laitoriani Yeso Kristo o te nchaman naaichoo ꞉Ltau Sinyati, kaitaarriyian ntae lalachera o nkanachera ainien, entam larrabal tenebo o nanu to nkomono kiomonokitata Nkai.

³¹Entoomon payie aalakuni too ltung'ana lemening'icho ootii Yudea, neng'amaa ꞉sinyat ana reto ai te Yerusalem,

³²niomonmon payie atum ayeu aata ng'ida echam Nkai, nayeng'iyeng'a tenebo o ntae.

³³Metaa Nkai e sotua tenebo o ntae pooki. Aamin.