Read Samburu Rroman 16 Bible Online

Rroman 16 - Samburu bible

Rroman 16

¹Karrepaki ntae nkanache ang Pibi, nkaisiayiani ta nkanisa natii Kenkerea,

²payie ing'amaa taatua Laitoriani ana naichiaakino sinyat le Nkai, niretret to pooki nayieunyie ninye ntae, amu ketaa ninye nkaretoni too ltung'ana kumo ati sii nanu.

³Eroroki Pirisila o Akuila naasita siaai le Kristo Yeso tenebo o nanu.

⁴Kore apa ninche, ketachamaitie aanang nanu. Naa karrinyoki ninche nache, namara nanu apeny orrinyoki kake abaki nkanisani pooki ee loreren lamara loo Lyiaudi.

⁵Eroroki aitoki nkanisa nati nkaji enche, nirorokiki sii sotua lai lacham oji Epaneto, ilo oara ltung'ani lekue ta mbata e Asia oibelekenyakine Kristo tankaraki likoroto ai,

⁶nirorokiki Maria inia natonyuaa aasaki ntae siaai oleng,

⁷nirorokiki ltung'ana lo lorere lai, Andironika o Yunias o lolo ooteenaki tenebo o nanu, nera sii ltung'ana oaayanyiti taatua Lkipaareta, naa ketii apa ninche atua Kristo tekue nanu,

⁸nirorokiki aitoki Apilianto sotua lai lacham taatua Laitoriani,

⁹nirorokiki Urbano naasita siaai le Kristo tenebo o iyioo, nirorokiki sii sotua lai lacham oji Sitakisi,

¹⁰nirorokiki Apeles ilo oatasaanaki nechamari taatua Kristo, nirorokiki lolo le nkaji e Arisitobulo,

¹¹nirorokiki Erodion, ltung'ani lo lorere lai, nirorokiki lolo tung'ana le nkaji e Naresiso, oaara la Laitoriani

¹²nirorokiki Tiripena o Tiriposa, ntomonok naasicho to nyuata taatua Laitoriani, nirorokiki Peris ntomononi nachami, inia natonyuaa taatua Laitoriani,

¹³nirorokiki Rrupo, ilo oisul taatua Laitoriani o ng'otonye nara sii yieyio lai,

¹⁴nirorokiki Asinkirito o Pilegon o Armas o Patirrobas o Ermes o lalachera ootii tenebo o ninche

¹⁵nirorokiki Pilogo o Yulia, nintokiki Nereo o nkanache enye, nirorokiki Olimpa o sinyat pooki ootii tenebo o ninche.

¹⁶Erorokinoto ntae to ngusoto e nchaman.[4] Eiroroki ntae ꞉nkanisani pooki e Kristo.

¹⁷Kaitaarriyian ntae lalachera o nkanachera, entodol lolo ooyau oro o mbaa naaitopong'oo aaitung'aa ntae inia kiteng'ena apa naiteng'enaki ntae. Naaku entalam ninche!

¹⁸Amu kore ltung'ana ootuwuana lolo, naa meisiaita Kristo Laitoriani lang, kake nkochuaa naarikito. Naa kore tee rereii supati nemelok, neitamae ꞉ninche ltung'ana oaamae.

¹⁹Kake keyielo pooki ng'ae ajo ining'ining ntae Lomon Supati, naa ikinting'idita nanu te inia. Kayieu niatata ntae ng'eno taa mbaa supati, niakuku lemeata ntioto taa mbaa torrok.

²⁰Kore te nkini kata, kerrar ꞉Nkai e sotua Chitani taabori nkejek inchi. Metaa munyani e Laitoriani lang Yeso Kristo tenebo o ntae.

²¹Eiroroki ntae Timoti, oasicho tenebo o nanu, neiroroki sii ntae Lusio o Yason o Sosipita, oaara ltung'ana lo lorere lang.

²²Kore sii nanu Tertio oigerito ana palai, naa kairoroki ntae taatua Laitoriani,

²³neiroroki ntae Gayo, ilo laa nkaji enye awuenie naa ta nkang enye sii etumo nkanisa pooki. Eiroroki ntae Erasito ilo oara laibung'ani loo ropiyiani e ele kerenket, neiroroki sii ntae lalache lang Kuarto.

²⁵Meeichori inia Ai ake nabo ng'en naidim aichoo ntae ngolon, nkisisa te Yeso Kristo! Keidim ninye aitogolo ntae ana neiteng'en ntae likoroto ai ee Lomon Supati, inia likoroto naipirita Kristo Yeso, ndedei nemeidimai payie eyielouni kake neibalunyieki taata. Keisudoro apa too ntowuon o ntowuon, kake kore taata, naa keibalunyieki neiteyieloki loreren pooki too lkigerot le naibon, ana naitanapa ꞉Nkai ee ntarasi, payie etum ninche aatining Nkai teneiruk Lomon Supati likilikorita. Metaa nenye nkisisa ntarasi, Aamin.