Read Samburu Rroman 2 Bible Online

Rroman 2 - Samburu bible

Rroman 2

¹Naaku, oi siake iyie ilo odung'oki likae tung'ani nkiguana, amu meata ningaraki, ira ng'ae oo ira ng'ae. Kore tinidung'oki likae nkiguana, naaku koon itudung'oka, amu kore iyie oiguanare likae, iasita sii iyie koon nenia baa.

²Ikiyielo nchere kore tenedung'oki ꞉Nkai nkiguana lolo oaas kuna baa, naa te sipata edung'oki.

³Amaa iyie odung'oki lkulie nkiguana, niasita iyie koon nenia baa, ijo pasa indim atapaachere ndung'oto e nkiguana e Nkai?

⁴Ana imenaa iyie nowua supaticho o mborron o ng'iriata enye? Miyielo iyie ajo ikirikoo ꞉Nkai to supaticho enye kitok mbelekenyai?

⁵Kake kore tankaraki nira ltung'ani ogol kue, niata ltau lemeibelekenya, ichumakita koon ngoro, naa ikirrachu inia goro ta mparri naibalunyie Nkai ndung'oto e nkiguana enye nasipa.

⁶Amu kelaaki pooki ng'ae te risioroto ee asat enyena.

⁷Kore lolo oong'iri eas supati, nenyok ayiaya nkitoo e Nkai o nkanyit o nkichon naruk talip, neicho ninche nkichon nemeiting.

⁸Kake kelaaki ngoro enye napi lolo oaacham ate neany ndedei eirukurukore mbaa torrok.

⁹Kore ltung'ani pooki oas ntorrok, netum kenya sina sapuk oleng, sina oang'asu tekue too Lyiaudi, neitoki sii too loreren lamara loo Lyiaudi.

¹⁰Kake keicho ꞉Nkai nkitoo enye o nkanyit o sotua ltung'ani pooki oas supati, keicho ang'as Lyiaudi tekue neitoki loreren lamara loo Lyiaudi,

¹¹amu meata Nkai ngela.

¹²Kore lolo pooki oaataasa ng'ok meata nkitanapat e Nkai naa keidaaya sii meata nenia kitanapat, naa kore lolo pooki oaataasa ng'ok etii taabori nenia kitanapat nedung'okini ninche nkiguana torno te risioroto ee nenia kitanapat.

¹³Amu mara lolo ooyielo nejo nkitanapat e Nkai oaara loosipat tekue Nkai, kake lolo oaas inia nayieu nenia kitanapat eiken ꞉Nkai ajo loosipat.

¹⁴Kore teneas loreren lamara loo Lyiaudi inia nayieu Nkitanapat abaki meyielo ninche Nkitanapat naaigero e Nkai, naaku keyieolo inia naaichiaakino neasi.

¹⁵Keitodolu ninche aajo, kore naayieu Nkitanapat naa keigero taa ltauja lenche. Kore naitodolu ana, naa ana namusoo ninche taa naaipirita supati o ntorrok, nelimu ꞉mparnot enche teneas naichiaakino nelimu sii teneas nemeichiaakino.

¹⁶Inji naa kenya etiu te inia parri teneicho ꞉Nkai Yeso Kristo metijing'a mpaach enye aiguanare mbaa naaisudoro ee ltung'ana ana nejo Lomon Supati lalikorita.

¹⁷Ijo iyie <<Kara Lyiaudii>>, nisilig nkitanapat e Nkai nilach tankaraki nijo iyie ninchi echi apeny ꞉Nkai,

¹⁸niyielo sii yieuna enye, nintoki ayielo aitapaacha nenia tokitin naaisul too nkulie tankaraki ikintaarriyianaki too nkitanapat e Nkai.

¹⁹Ijo koon larikoni loo lmodook, nira lkilang'ilang'et too lolo oowuenie atua naimin,

²⁰nira loutaa lolo lemeitoki eyielo, nira laiteng'enani loo lolo oaamae, niata ng'eno o ndedei taatua nkitanapat e Nkai.

²¹Amaa iyie oiteng'en likae, minteng'en koon! Kore iyie olikoo ajo meichiaakino payie epurruchoi, naa ipurrucho iyie!

²²Kore iyie ojo payie meas ltung'ani loloito, naa iloloito iyie! Kore Iyie ojo <<Nakaiting'o!>> tenesaii ꞉ltung'ana nkaitok e sapare, naa ipurroo iyie ntokitin natii atua nenia ajijik e nkomono!

²³Kore iyie oilach tankaraki niata nkitanapat e Nkai, naa intamita Nkai anyit tankaraki igil nkitanapat enyena!

²⁴Keigero naa too Lkigerot sinyat nchere, <<Kedekitae nkarna e Nkai tankaraki ntae taatua loreren lamara loo Lyiaudi.>>

²⁵Kore tanaa imbung nkitanapat e Nkai, naaku keitoki muratare te iyie ira Lyiaudii[1], kake kore tanaa igil nenia kitanapat naaku meitoki inia muratare ino.

²⁶Naaku amaa teneibung ltung'ani lamara loo Lyiaudi inia nayieu nkitanapat e Nkai emurata o memurata, ijo iyie meikeni naa ninye aajo le Nkai?

²⁷Naaku kore lamara Lyiaudii kake neitabayie naayieu nkitanapat e Nkai, naa ikidung'oki kenya iyie nkiguana, iyie laa kore abaki ira Lyiaudii, nikitumurataki, niyielolo aitoki pooki naajo nkitanapat e Nkai, nigil ake eyia nenia kitanapat e Nkai.

²⁸Amu mara muratare e oriong naitaa ltung'ani Lyiaudii odede, namara muratare e oriong muratare nadede,

²⁹kake kore ilo oara Lyiaudii odede, naa ilo oara ta ltau, naa kore muratare nadede naa inia muratare e ltau. Kore ilo omurat ltau, naa Ltau sinyati le Nkai mara sirat ee nkitanapat. Kore ilo tung'ani naa ta Nkai eng'amaa rrepet, namara too ltung'ana.