Read Samburu Rroman 3 Bible Online

Rroman 3 - Samburu bible

Rroman 3

¹Naaku amaa, nyo kiret tinira Lyiaudii? Anaa nyo tipat nayau muratare?

²Ikiret tinirara Lyiaudi too nkoitieii kumo. Kore nekue naa Lyiaudi apa eing'urieki rerei lenye.

³Oo sa tenetii lbata lenche lemeata nkurukoto, keicho inia metaa meisiligai Nkai?

⁴Nakaiting'o! Kera Nkai asipani, abaki era pooki tung'ani lasapani, <<Payie kinkeni iyie Nkai aajo ira loosipat tee rerei linono, nimiricho tininguanicho>>, ana naigero too lkigerot sinyat.

⁵Keidim ltung'ani neiparu ajo, <<Kake amaa tanaa keicho ntorroni aang metelioi sipata e Nkai, aa naa kijo iyioo? Naa amaa tenegoro Nkai near iyioo, ketaasa sa nemeichiaakino?>> Kukoino! Tanajo nchi, naa kairo ake ana neiko ltung'ana teneiro. Kore tanaa nejia etiu, aji naa eiko Nkai teneiguanare nkop?

⁷Keidim ltung'ani neiparu ajo, <<Amaa tanaa keibalai sipata e Nkai oleng ta sapare ai payie eichori ninye nkisisa, aanyo naa payie aaiguanareki nanu aajo loo ng'ok?>>

⁸Kedekita naa iyioo lkulikae aajo, ikijo, <<Mataas naa ntorrok payie eipung'unyie supaticho!>> Naa kedung'oki ninche ꞉Nkai nkiguana naichiaakino.

⁹Naaku kaa taata kijo? Ikilang iyioo Lyiaudi lkulikae? Mikilang hooyia! Amu kindipa duo aaitodolu nchere kore ltung'ana pooki naa taabori ngolon ee ng'ok etii, pee era Lyiaudii anaa Lgirriki

¹⁰ana nejo Lkigerot, <<Meatae hoo ltung'ani oara loosipat, abaki obo.

¹¹Meatae loning'u, meatae loyieita Nkai,

¹²keiminaitie pooki, eima pooki siu, meatae hoo loasita supat, abaki obo.>>

¹³<<Kore lgoso lenche naa nkurarei nabolo, neasichere lng'ejepa lenche aasapichere, Ketii sayiet e lasurai nkutukie enche.>>

¹⁴<<Neiro ldeketa torrok oome.>>

¹⁵<<Neten nkejek enche epuo aar ltung'ana metuata,

¹⁶neyau mutai o sina neimita,

¹⁷nemeyielo ꞉ninche nkoitiei e seriani.>>

¹⁸<<Nemeata ꞉ninche uriata e Nkai.>>

¹⁹Ikiyielo aajo kore mbaa pooki naajo Nkitanapat e Nkai, naa lolo ootii taabori nenia Kitanapat ejoki, payie meatae hoo obo oata mbae najo, nepiki nkop pooki taabori nkiguana e Nkai.

²⁰Amu meatae ltung'ani oikeni aajo loosipat too nkonyek e Nkai eji tankaraki naibung'a nkitanapat e Nkai, amu kore siaai loo Nkitanapat naa payie eiteyielo ltung'ana ajo nyo ng'ok.

²¹Kake kore taata naa eibalunyieki sipata naing'uaa Nkai, nayau sotua oipida o ninye mikimbung ana nayieu nkitanapat. Ketilimutua Nkitanapat o loibonok le Nkai inia sipata.

²²Kore inia sipata e Nkai naa ketumi to nkoitiei e nkurukoto taatua Yeso Kristo, neichori lolo pooki ooiruk menya ajo ng'ae era.

²³Amu etaasa pooki ng'ok, nelau nkitoo e Nkai,

²⁴naa keitaa ꞉Nkai ltung'ani loosipat pecheu to munyani enye tankaraki ketalakua ninche ꞉Kristo Yeso.

²⁵Ninye eibukori lodo, neitaa ꞉Nkai tekue ltung'ana pooki lasar loo ng'ok, naa to nkurukoto eng'amari ninye. Neas ana payie eitodolu sipata enye, amu kore apa te ng'iriata enye naa keichoo ltung'ana mechomo eitu eitalak ng'ok enche. Neitodolu taata tana ng'amata sipata enye nchere, kera ninye loosipat naa keitaa ilo tung'ani oiruko Yeso loosipat.

²⁷Naaku naa, nyo kilachie iyioo? Meitoki kilachie. Aanyo payie kijo nejia? Tankaraki nikimbung'a nkitanapat? Mara, kake tankaraki nikimbung'a nkurukoto.

²⁸Amu ikinken nchere te nkurukoto eitaa ꞉Nkai ltung'ani loosipat, namara teneas naayieu Nkitanapat.

²⁹Anaa amaa, kera Nkai Nkai ee Lyiaudi aapeny? Mera sii ninye Nkai ee lkulie oreren? Kore amu nabo Nkai naitaa Lyiaudi loosipat teneiruk ninye, neitaa sii lkulie oreren loosipat to nkurukoto, naaku kesipa kera sii Nkai e lkulie oreren.

³¹Naa amaa, ikintaa nkitanapat meitoki tankaraki ana kurukoto? Mikintaa hooyia! Kake ikimbung Nkitanapat.