Read Samburu Rroman 8 Bible Online

Rroman 8 - Samburu bible

Rroman 8

¹Naaku kore taata, merekure eatae nkiguana torno too lolo otii atua Kristo Yeso.

²Amu kore tankaraki nara le Kristo Yeso, naalaku[2] ngolon e ꞉Ltau Sinyati oichoru nkichui to ngolon naaitaa nanu rrindik loo ng'ok naayakita lkiye.

³Kore apa inia toki nemeidim nkitanapat e Nkai aataas tankaraki nachal ꞉mpukunoto ang torno, neas Nkai. Naa ana etaasa Nkai, ketalakua iyioo to ngolon e ng'oki natii atua sesen lo ltung'ani airriuu Nkerai enye nayewuo eata sesen oinyunyukore mpukunoto e sesen loo ng'ok, payie etum ataa lasar ooitayiaki tankaraki ng'ok ang.

⁴Ketaasa Nkai ana payie etumi aaitabai nayieu nkitanapat taatua iyioo lamara mpukunoto torno e ltung'ani kirukurukore, kake nayieu Ltau Sinyati.

⁵Amu kore lolo ooirukurukore naayieu mpukunoto torno naa nenia baa e mpukunoto torno enche eparraa. Kake kore lolo ooirukurukore mbaa naayieu Ltau Sinyati, naa nenia baa e Ltau Sinyati eparraa.

⁶Amu kore natum ilo oitore ꞉mbaa e mpukunoto torno e ltung'ani naa lkiye, kake kore natum ilo oitore ꞉mbaa e Ltau Sinyati naa nkichui o seriani.

⁷Amu kore ltung'ani oitore ꞉mpukunoto torno, naa lmang'antita le Nkai, nemeyieu ninye payie eitore ꞉nkitanapat e Nkai, nemeidim abaki neicho meitoria.

⁸Kore lolo oopuo taatua mpukunoto enche torno naa meidim aaiting'ida Nkai.

⁹Kake mitii ntae taabori nkitoria e mpukunoto inchi torno, taabori nkitoria e Ltau Sinyati itii, tankaraki kemanya ntae Ltau le Nkai atua. Kore tenemeata ꞉ltung'ani Ltau Sinyati le Kristo naa mara lenye.

¹⁰Kake tenetii Kristo atua ntae, naa keye seseni linchi tankaraki ngolon e ng'oki, kake kore Ltau le Nkai, naa nkichui taa ntae, tankaraki keitaaki ntae loosipat tekue Nkai.

¹¹Kore tanaa kemanya atua ntae Ltau le ilo oitipiwua Yeso Kristo too lootuata, naaku keicho kenya ninye seseni linchi ooye nkichui to ngolon e Ltau lenye, oamanya atua ntae.

¹²Naaku lalachera o nkanachera, keatae nayieuni tee iyioo menya ajo nyo eyieu mpukunoto ang torno, meyiere payie kiwueni ana nayieu ꞉ninye.

¹³Amu tiniwuenini ana nayieu mpukunoto inchi torno naa iyeye, kake tiniarrar metuata asat e mpukonoto inchi torno, to ngolon e Ltau Sinyati, ninchichu.

¹⁴Naa kore pooki oorikoo ꞉Ltau le Nkai naa nkera e Nkai.

¹⁵Neitu itumtum Ltau le rrindikicho eji paa intokiki aawueni to ngureticho, kake itumo Ltau oicho ntae sipat niakunyienyie nkera e Nkai. Kore te ninye nikibuak aajo, <<Papa! Papa lai!>>

¹⁶Ilo Tau olimu sipata tenebo o ltauja lang ajo ikira iyioo nkera e Nkai.

¹⁷Naa tanaa nkera e Nkai kira, ikira sii lootum tenebo o Kristo inia naisiligie iyioo Nkai, naa tanaa iking'ar sina lenye, iking'ar sii nkitoo enye.

¹⁸Kadol ajo kore sina le ng'amata e taata, naa meitoki tenetemieki inia kitoo naibalunyieki kenya metaa nanang.

¹⁹Kore ntokitin pooki naaitibirua ꞉Nkai, naa keisiluguta oleng ꞉ninche oleng nkera e Nkai meibalunyieki.

²⁰Amu ketipikaki ntokitin pooki naaitibiruaki taabori ldeket payie erroyo. Namara te yieuna enche etaase inia, kake te yieunoto e ꞉ilo otipika ninche taabori ilo deket. Kake kore eyia keata ake ninche siligi,

²¹aajo kelakuni ntokitin pooki naaitibiruaki, te rrindikicho e ilo deket, nejing atua lakunoto e nkitoo naata ꞉nkera e Nkai.

²²Ikiyielo aajo kore ntokitin pooki naaitibiruaki, naa keigorito nesaisai pooki metabaki taata,

²³namara ake ninche aapeny, kake abaki iyioo oichooki Ltau Sinyati ana nkichooroto ekue naichoo iyioo Nkai. Kore abaki iyioo naa ikingor taatua ate, kianyuta payie kiaku nkera e Nkai katukul payie elakuni seseni lang.

²⁴Amu ele siligi apa kitumo payie eitejeuni iyioo. Naa kore siligi olioo naa mara siligi, amu ng'ae oisilig inia nadolita?

²⁵Kake tinikisilig inia nimikidolita, naa ikianyu te ng'iriata.

²⁶Nejia sii eiko Ltau Sinyati teneretu iyioo ta nchalan ang. Amu kore inia nayiere payie kiomonu naa mikiyielo. Kake keomonoki iyioo ninye to nkoitiei nemelimunoi tee rerei.

²⁷Naa kore ilo oing'uraa ltauja loo ltung'ana naa keyielo inia nayieu Ltau Sinyati, amu keomonoki sinyat le Nkai ana nayieu ꞉Nkai.

²⁸Ikiyielo nchere kore pooki naasai, naa kesupataki lolo oaacham Nkai, lolo ooipotoki ana nayieu ꞉Nkai.

²⁹Amu kore lolo ooteyielo ꞉ninye apake tekue, netegelua inia kata metinyunyukore Nkerai enye, payie etum inia Kerai enye ataa lkikau taa lalachera lenyena kumo.

³⁰Naa kore lootegelua apake tekue, ninche sii eipoto, naa kore looipoto /neitaa sii ltung'ana loosipat, naa kore /looitaa loosipat neitoki sii aicho nkitoo.

³¹Kaa hae, nyo naa taata kijo naaipirita kuna baa? Amaa tanaa keti Nkai mbata aang, ng'ae ilo oidim atarere iyioo?

³²Amaa ilo leitu emit eri Nkerai enye metua, kake keichorua metanang'a iyioo pooki, aji naa eiko payie meicho iyioo ntokitin pooki pecheu eichoo iyioo Nkerai enye?

³³Ng'ae ilo oidim aitara kusaka lgelunot le Nkai? Meitoki! Nkai naitaa loosipat.

³⁴Ng'ae odung'oki iyioo nkiguana torno? Meatae! Ketanang'a iyioo Kristo Yeso, naa mara ake inia, kake ninye sii eitipiwuaki too lootuata. Ninye owuenita ta nkaina e tetene e Nkai, naa ninye sii ilo oomonokita iyioo.

³⁵Ng'ae oidim atoorie iyioo chaman e Kristo? Keidim sa nyamali anaa sina? Oo sa teneitam iyioo ltung'ana sina, tanaa tenear iyioo sumach, tanaa tinimikiata nkilani, tanaa tenetum iyioo ntoki nagol, tanaa teneri iyioo matuata?

³⁶Ana naigero ajo, <<Kore tankaraki iyie, keri iyioo mparri pooki, keikenakaki iyioo nkerra naayieng'i.>>

³⁷Meitoki naidim atoorie iyioo! Kore te nenia baa pooki, naa ikisul katukul, te ilo oatachama iyioo.

³⁸Amu kaata sipata ajo, mara lkiye, namara nkichon, namara lmalaikani, namara laitoriak, namara mbaa naatii taata, namara mbaa naapuonu kenya, namara ngolon naje,

³⁹namara te keper lakir tanaa tokop, namara nkae toki naitibiruaki naidim atoorie iyioo nchaman e Nkai inia natii atua Kristo Yeso Laitoriani lang.