Read Samburu Rroman 9 Bible Online

Rroman 9 - Samburu bible

Rroman 9

¹Kairorita mbaa naadede amu kara le Kristo namajoito sapare amu katumuse naiteyielo sii Ltau Sinyati.

²Kaisinanio oleng naata mion nemeyagari taatua ltau lai.

³Oi siake duo aa nanu edeki naaitaini taatua Kristo, matanang'a lalachera o nkanachera e lorere lai,

⁴ltung'ana loo Isirael. Kore apa ninche naa ketegelua ꞉Nkai metaa ltung'ana lenyena. Neichoo metoduaa nkitoo enye, neitai lning'o o ninche, neicho sii ninche nkitanapat enyena. Neibalakinyie neikoni tenesaii, neitoki aicho lekutukie lenyena.

⁵Neing'uaa sii ninche ꞉lmakui lang Abraam o Isaka o Isirael, lolo ooing'uaa abaki ꞉Kristo ta ntalipa, ilo oara Nkai naaisul pooki, meterrepi ntarasi! Aamin.

⁶Kake mara eji ketaa eitu ebaya rerei le Nkai, amu mara lolo pooki oaara le ichoi e Isirael oaara ltung'ana le Isirael oodede.

⁷Namara ichoi pooki e Abraam natum inia natejo Nkai keichoru te lekutuk lenye, kake kejo lkigerot Sinyat, <<Ichoi e Isaka eipoti aajo ne ntalipa ino>>

⁸Keitodolu ana ajo, mara nkera naatiutua ltung'ana naara nkera e Nkai, kake lolo ake ooitaaki nkera te lekutuk eipoti aajo ichoi e Abraam.

⁹Kore lekutuk oitayia Nkai naa ele, <<Kore aitoki tana ng'amata te elde ari, naa karrinyunyie eata Sara layieni.>>

¹⁰Kake mara abaki inia, kore layiok oare le Rebeka naa la lpayian obo oji Isaka laa ninye akuyia lang, neata ana mbae nautu.

¹¹Nejoki ꞉Nkai Rebeka ewuon eitu eini nkera enyena o ewuon sii eitu eas ninche supati tanaa ntorrok nchere, <<Keisiaai ꞉ilo ayieni botor lkini.>> Paa kore inia gelunoto e Nkai naaku mara inia nataasa nenia kera eirichakino kake nayieu ninye.

¹³Ana naigero ajo, <<Atachamayie Yakobo, alang Esao.>>

¹⁴Ikijuaa naa taata, keas Nkai nemeichiaakino? Naikaiting'o! Meas!

¹⁵Amu ketiaka Musa, <<Kaing'urrie ilo laing'urrie, naing'er ilo laing'er.>>

¹⁶Tankaraki inia, paa mara yieuna tanaa nyuata e ltung'ani eirichakino kake tankaraki naata ꞉Nkai lng'ur.

¹⁷Amu keichoo Nkai Musa lkilikuai le Parao lkinkii le Misiri ejoki, <<Kaailiepunyie iyie aata ana kipidata nchere, payie aaitodolu ngolon ai taatua iyie, neitokini aalikoo nkarna ai to nkop nalulung'a.>>

¹⁸Naaku naa, keing'urrie ilo oyieu ꞉ninye neing'urrie, neitogol nkue e ilo oyieu neitogol.

¹⁹Naaku indim naa nijo, <<Aanyo naa payie ewuon ekusakan ninye ꞉ltung'ana? Ng'ae sa oidim aibooi ntagule e Nkai?>>

²⁰Kake ng'ae ira iyie ltung'ani payie intooliki Nkai? Keidim sa ntoki naitibiruaki atiaaki loitibirua, <<Aanyo payie kintibirua aiko inji?>>

²¹Oo sa laitibirani loo ntokitin e mparpar, meata nkitoria naitibirunyie ntoki e tipat ta mparpar, neitoki ake aitibirunyie inia parpar nkae toki nemeata tipat?

²²Kore abaki eyieu apa Nkai neitodol ltung'ana ngoro enye neiteyielo sii ngolon enye, nepal lolo mang'ati lenyena ooitaanyutae mutai, tankaraki ng'iriata enye kitok.

²³Ketaasa sii inia payie eitodolu nowua nkitoo enye too lolo ooing'urrieki, lolo ooitibira apake payie etum ꞉ninche inia kitoo.

²⁴Keipoto sii iyioo Nkai, namara ake iyioo oaara loo Lyiaudi aapeny eipoto, kake abaki lolo oaara loo lkulie oreren.

²⁵Ana najoito ꞉Nkai to mbuku e loiboni lenye Osea, <<Kore apa lolo lamara ltung'ana lainien, naa kaipot ajo ltung'ana lainien naa kore inia apa nemechami naipot ajo <Nachami.>

²⁶Naa kore te inie ng'oji apake netiaakinyieki, <Mirara ltung'ana lainien,> neipoti ninche te inie ng'oji aajo <Nkera e ꞉Nkai naichu.> >>

²⁷Nebuak loiboni le Nkai Isaya tankaraki Isirael ejo, <<Kore abaki ewuana ltung'ana le Isirael ana sunyai le mpaso, muro ake eitejeuni.

²⁸Amu kesioki Nkai aitai rerei odung'ie nkiguana to nkop.>>

²⁹Neitoki Isaya aibonu ajo, <<Teneitu apa eing'uaki iyioo Laitoriani loo njorin ichoi, anata apa eidakieki iyioo ana lkerenket le Sodom, nikituwuanai ana lkerenket le Gomora.>>

³⁰Ikijuaa naa taata iyioo? Kore nikijo, naa nchere kore apa lkulie oreren leitu eyiaya neiko tenetum sipata natumie sotua oipida o Nkai, naa ketumo inia sipata. Naa kore inia sipata, naa nkurukoto eirichakino.

³¹Kake kore enyok Isirael aajo embung'a nkitanapat payie eaku ltung'ana loosipat, neitu eitabaya ꞉ninche nenia kitanapat.

³²Aanyo? Tankaraki neitu eyiaya sipata eirichakino nkurukoto, kake nejo apa ninche eji ketumi taa asat. Nerror ate te ilo soit orrorricho.

³³Ana naigero ajo, <<Ng'ura, kapik atua Sion soit orrorricho o ndadapoi narrekicho, naa kore pooki ng'ae oiruk ninye naa menya anyit.>>