Read Samburu 1 Lkorinto 10 Bible Online

1 Lkorinto 10 - Samburu bible

1 Lkorinto 10

¹Lalachera o nkanachera ainien, kayieu niyielouu mbaa naaimaitie apa lmakui lang te lkees. Ketirripo ꞉nkidis ninche pooki, nelang mpaso Nanyiekie tee nkejek.

²Kore te inia kidis o ta mpaso, neipatisaki ninche pooki metaa le Musa.

³Nenya pooki inia daa nabo naichoo ꞉Nkai,

⁴neitoki sii pooki aamat inia are nabo naichoo ꞉Nkai. Amu kematita pooki nkare naing'uaa inia dadapoi e ꞉Nkai nairukurukore ninche. Naa kore inia dadapoi na Kristo koon.

⁵Kore eyia, eitu eng'idakino ꞉Nkai lkumo lenche, kelioo inia tankaraki natumuta ꞉Nkai ninche te lkees.

⁶Kore naa kuna baa pooki, naa ketaasate apa payie eutaa iyioo payie miking'uar ntorrok ana apa nataasa ninche.

⁷Emisai nkaitok e sapare ana apa nataasa lbata loo lolo tung'ana. Amu keigero too Lkigerot Sinyat nchere, <<Newueni ltung'ana aadaa, nematicho neinyuototo aacha.>>

⁸Mikias mboita e sesen nemeichiaakino ana apa nataasa lbata lenche nemuta 23,000 ta mparri nabo.

⁹Mikisaan sii Kristo ana nataasa lbata lenche near ꞉lasuria metuata.

¹⁰Eming'unyung'uny aitoki ana nataasa lbata lenche, near ilo malaika omutucho metuata.

¹¹Kore kuna baa naatumo kulo tung'ana naa keigeroki payie eitaarriyianieki iyioo ooichu ta nkata e nkiting'oto e nkop.

¹²Naaku kore ilo ojo keitache aipidaki, oi edol koon payie merria.

¹³Kore inia temata nitumo, taparru ajo ntemat ake naatiu nejia eimarita ltung'ana pooki. Naa keisiligai Nkai amu meicho ntae etum ntemat naalang nindimumu. Kore aitoki teneitemei ntae, naa keitibir Nkai nkoitiei nimpung'unyienyie taatua nenia temat payie itumtum aating'iria.

¹⁴Naaku sotuatin lainien lacham, entalam sayiata ee nkaitok e sapare.

¹⁵Kairorie nanu ntae ana ltung'ana ng'eni, entisipu naa ntae maate inia najoito.

¹⁶Kore tinikimayian lkikompe lemayian nkata e ndaa e laitoriani, mara iking'arita lodo le Kristo te ilo kikompe? Naa kore tinikigil mukate nikinyia, mara iking'arita sesen le Kristo te inia mukate?

¹⁷Amu nabo ake mukate, naaku kore abaki iyioo oaara kumo nikiaku sesen obo, amu inia mukate nabo ake king'ar pooki.

¹⁸Entodol ja ltung'ana loo Isirael, amaa loaatama ndaa mara ketang'ara sii ninche lperere la lasar?

¹⁹Nyo dei ajoito tana bae? Keitoki sa lasar oitakaki nkaitok e sapare, tanaa keitoki sii nkaitok e sapare?

²⁰Mara pae nejia, kore najoito naa ana, kore lasarri ooitai lolo lemeyielo Nkai naa lairiruani eitaki mara Nkai. Namayieu payie iatata nchula o lairiruani.

²¹Miindim atamatichere lkikompe la Laitoriani o laa lairiruani. Nimindim sii aitoki atang'ara ndaa e Laitoriani nintoki aitoki naa lairiruani.

²²Amaa, ikintorioki aang'elaki Laitoriani? Aa ikigol iyioo aalang ninye?

²³Keidim lobo lang nejo, <<Meitoki naaibooyo payie maas ntoki nayieu.>> Ee nejia etiu, kake mara ntoki pooki naas naaret. Neidim sii aitoki nejo, <<Meitoki naaibooyo payie maas ntoki nayieu.>> Ee, kake mara pooki naitogol lkulie.

²⁴Mincho eaku koon ing'uraki supati, kake nchoo metaa lkulie.

²⁵Naaku tama ake nkiri pooki naamiri to ng'oji nemirichiereki mimparu aitanyamal ltau lino.

²⁶Amu kejo Lkigerot Sinyat, <<Kore nkop o ntoki pooki natii naa ne Laitoriani.>>

²⁷Kore teneitoomon ntae ltung'ani leitu eiruk Kristo entam ndaa tenebo o ninye, niyieuu nipuopuo, entam ake ntoki pooki natipikaki tekue ntae eitu mparuru aaitanyamal ltauja linchi.

²⁸Kake tenejoki ilo ooitoomono ntae, <<Kore ana daa, naa ndaa naitakaki nkaitok e sapare,>> eminya tankaraki ilo tung'ani otilika ntae amu keidim aitanyamala ltau lenye.

²⁹Mairorita mbaa naaipirita ltau lino, kake naaipirita ne ilo likae tung'ani. Amu kaji eiko ltau onyamal le likae tung'ani teneiguanare lakunoto naata payie aas ntoki nayieu?

³⁰Amaa tanaa kaicho Nkai nache tankaraki ndaa, aanyo payie aadeki tananya?

³¹Oo inya ntoki tanaa imat tanaa nkae toki pooki nias, taasa to nkoitiei nayaki Nkai nkisisa.

³²Entaa lemeata nakurrieki tekue Lyiaudi o Lgirriki o ltung'ana le Nkai.

³³Kaas abaki nanu nejia anyok nkata pooki aaiting'id ltung'ana pooki, namaing'oru inia naaret nanu, kake naret pooki ng'ae payie etum ninche aatejeu.