Read Samburu 1 Lkorinto 15 Bible Online

1 Lkorinto 15 - Samburu bible

1 Lkorinto 15

¹Kore taata lalachera o nkanachera ainien, kayieu naitaparru ntae Lomon Supati latilika apa ntae, lolo litang'amaitie nirukutoto nisiligitata sii.

²Kulo Omon Supati latilika ntae ooitejeu ntae, tinimbung'bung aitibiraki, peechu naa pecheu apake iruko.

³Kaitarasaka ntae inia natang'amayie nera netipat oleng, nchere ketua Kristo tankaraki ng'ok ang ana naigero too Lkigerot Sinyat.

⁴Netunukayieki, neitipiuni too lootuata ta mparri e uni ana naigero too Lkigerot Sinyat.

⁵Keipung'oka Kepa, neitoki aipung'oki lkipaareta 12.

⁶Neipung'oki sii looiteng'eni lenyena oorepaa 500 ta nkata nabo, newuon eichu lkumo loo lolo, kake ketii lbata ooteperio.

⁷Neipung'oki aitoki Yakobo, neitoki aipung'oki lkipaareta pooki.

⁸Kore le siedi oipung'oka naa nanu, ilo otuwuana ltung'ani otiiwuaki eng'or nkata.

⁹Amu kore nanu naa meitoki ara too lkipaareta pooki le Yeso, nemeichiaakino payie aaipoti aajo lkipaaret lenye, amu kaitama nkanisa e Nkai sina.

¹⁰Kake kara nanu ntoki nara tankaraki munyani e Nkai, naa kore inia munyani naaichoo Nkai, eitu eaku ne pecheu. Katonyua alang ninche pooki, naa mara nyuata ai nataasa inia, kake munyani e Nkai nati tenebo o nanu.

¹¹Naaku taa menya ajo nanu otilikoyie tanaa lkulie kipaareta, lolo Omon Supati ake kilikoo naa ninche sii iruko ntae.

¹²Amaa tanaa ikilikoo iyioo aajo ketipiwua Kristo aing'uaa lootuata, kaji eiko payie ejo lbata linchi nchere meatae mpiunoto ee lootuata?

¹³Kake kore tanaa meatae mpiunoto ee lootuata, naaku naa eitu abaki eitipiuni Kristo,

¹⁴naa tanaa eitu eitipiuni Kristo, naaku naa ne pecheu likoroto aang naa ne pecheu sii nkurukoto inchi.

¹⁵Kore aitoki, naa keitodolu ajo ikitilikoitie lomon lemedede, aajo keitipiwua ꞉Nkai Kristo aitung'aa lootuata eitu eitipiu, tanaa kedede ajo meatae mpiunoto ee lootuata.

¹⁶Amu kore tanaa meitipiuni lootuata, naaku naa eitu eitipiuni sii Kristo.

¹⁷Naa kore tanaa eitu eitipiuni Kristo, naaku pecheu nkurukoto inchi, newuon eitu epalikini ntae ng'ok inchi,

¹⁸naa kore sii lolo ooteperio etii atua Kristo neimina katukul.

¹⁹Kore tanaa tana kichon ake apeny kiata siligi te Kristo, naaku ikira iyioo ltoluti aalang ltung'ana pooki.

²⁰Kake kore sipata naa nchere keitipiwuaki Kristo too lootuata, metaa ltung'ani lekue otipiwua too lolo ooteperio.

²¹Amu kore tankaraki keyewuo lkiye aimu ltung'ani oji Adam, kelotu sii mpiunoto ee lootuata aimu likae tung'ani, naa Kristo taa ilo.

²²Amu kore tankaraki naye ltung'ana pooki tankaraki naing'uaa Adam, nejia sii etiu, keitipiuni pooki metumo nkichon tankaraki nara le Kristo.

²³Keitipiuni pooki ng'ae ta nkata enye. Kore lekue oitipiwua Nkai naa Kristo, naa kore teneigil Kristo achukunye neitipiu lolo oaara lenyena.

²⁴Nelotu taa nkiting'oto e nkop, neidakie Kristo nkitoria pooki o nkidimata o ngolon, nerrinyoki nkitoria Nkai Papa.

²⁵Amu meata ajo meitore Kristo ana metimira Nkai lmang'ati pooki neicho meidacha murto.

²⁶Kore lmang'antita omiri tesiedi pooki naa lkiye.

²⁷Amu kejo Lkigerot Sinyat, <<Kepik Nkai ntokitin pooki taabori nkitoria enye.>> Keibala taa ajo mara Nkai eipirita ilo rerei ojo, <<ntokitin pooki>> amu ninye opik ntokitin pooki taabori nkitoria e Kristo.

²⁸Kake kore payie epiki ntokitin pooki taabori nkitoria e Kristo, nepiki taa inia Kerai e Nkai taabori nkitoria e Nkai, paa kore inia Ai naichoo nkerai enye nkitoria, neitore ꞉ninye katukul ntoki pooki.

²⁹Oo taata, kaa eas lolo tung'ana ooichoo meipatisi ta mpaach ee ltung'ana ootuata? Amaa tanaa meitipiuni lootuata, aanyo payie eipatisi ltung'ana ta mpaach ee lootuata?

³⁰Oo iyioo, aanyo payie kipik ate atua larrabal nkatitin pooki?

³¹Lalachera o nkanachera ainien, kaatumuto mbaa naajo ewaita matua mparri pooki. Kajoito ana amu kang'idare ntae taatua Kristo Yeso Laitoriani lang.

³²Amaa, ijoijo nyo sa atum payie arare ng'uesi e lkerenket le Epeso[4]? Tanaa naa meitipiuni lootuata metumo nkichui, mataas naa ana nejo Lkigerot Sinyat nchere, <<Matadaata nikimaticho, amu ikiye ake teisiere.>>

³³Emincho eitopong'ori ntae: <<Kore lturrur loo ltung'ana torrok naa keitarruoo lwuenet supat.>>[5]

³⁴Erracha ate niparrichocho aaitibiraki, nipalpal nkoitieii inchi ee ng'ok, amu meata lbata linchi yielounoto e Nkai, naa anyit inia taa ntae.

³⁵Kake keidim ltung'ani aiparicho atejo, <<Aji eiko Nkai teneitipiu ltung'ana ootuata? Kaji etiu seseni oaata ninche?>>

³⁶Lo madai ele! Amaa tiniun lantararai to nkop, kebulu echi eitu eng'as aye?

³⁷Kore tiniunicho, mara lcheni sapuk otubulua iun kake lantararai ake payie era le nkano tanaa sii ake likae antararai.

³⁸Nkai naidimie lantararai metubulu to mpukunoto nayieu ninye, neicho pooki antararai metubulu to mpukunoto enye.

³⁹Menyunyuk seseni loo ntokitin pooki naaichu, keata sesen lo ltung'ani mpukunoto enye, neata loo ng'uesi, neata loo nkueeny, neata sii loo sinkirri.

⁴⁰Naa keatae seseni ootii chumata neatae sii seseni ootii nkop. Nepaacha sii supaticho ee seseni ootii chumata o supaticho ee seseni ootii nkop.

⁴¹Keata ndama wong'an e nkiborra enye neata sii lapa nenye, neata aitoki lakir wong'an e nkiborra enche. Kore lakira obo nepaachare likae to wong'an e nkiborra enye.

⁴²Nchi naa etiu teneitipiu Nkai lootuata metumo nkichui. Kenukari seseni lang oomutari to nkop tinikiye kake keitipiuni era lememuta metumo nkichui.

⁴³Kore enukaritae, naa meitaae toki nechal, kake kore teneitipiuni naa keata nkitoo negol.

⁴⁴Kenukari kulo seseni loo nkiri o lodo, kake keitipiuni eata nkae pukunoto. Kore amu keatae sesen loo nkiri o lodo, keatae sii sesen oaata mpukunoto e chumata.

⁴⁵Amu kejo Lkigerot Sinyat, <<Kore ltung'ani lekue oji Adam, neaku loata nkichui,>> kake kore Adam le siedi neaku keata mpukunoto e Nkai neichooyo nkichui.

⁴⁶Mara sesen oata mpukunoto e Nkai oyewuo tekue, kake ilo sesen loo nkiri o lodo, neitoki taa sesen oata mpukunoto e Nkai.

⁴⁷Kore ltung'ani lekue oji Adam, neing'uaa apa ninye nkop neitibiraki te nterit, naa kore ltung'ani le oare laa Kristo naa chumata eing'uaa.

⁴⁸Kore lolo oaara le nkop, netuwuana ninche ilo tung'ani le nkop, naa kore lolo oaara le chumata, netuwuana ninche ilo oing'uaa chumata.

⁴⁹Kore ana nikinyunyukore ilo tung'ani oing'uaa nkop, ikinyunyukorei sii ilo tung'ani oing'uaa chumata.

⁵⁰Kore najoito lalachera o nkanachera ainien, naa ana: Kore kulo seseni lang loo nkiri o lodo naa metum nkitoria e Nkai. Amu kore kulo seseni ooidaari naa metum inia nabik ntarasi.

⁵¹Entacho maibalakinye ntae mbae naisudoro. Mikiye pooki kake keibelekenyi iyioo pooki.

⁵²Kore ta nkata e nkiting'oto teneochi mowuo, neibelekenyi iyioo nabokata, aasioki ana nkirriabata e nkong'u. Amu kore teneochi mowuo neitipiuni lootuata nemeigil aikata aaye, neibelekenyi sii iyioo.

⁵³Amu kore mpukunoto naidaari naa meata ajo meibelekenyi metaa mpukunoto nabikoo ntarasi, kore inia naye, neibelekenyi metaa nemeye.

⁵⁴Naaku kore payie eibelekenyi mpukunoto naidaari aye metaa mpukunoto nabik ntarasi nemeye, nebaya inia naigero too Lkigerot Sinyat nchere, <<Etimita mirichoi lkiye.>>

⁵⁵<<Lo kiye, merekure aikata imiricho iyie! Lo kiye, merekure iata ngolon nimirichere!>>

⁵⁶Kore lkiye naa ketum ngolon naarichere to ng'oki naa kore ngolon e ng'oki neing'uaa nkitanapat e Musa.

⁵⁷Kake ache Nkai! Amu ninye naichoo iyioo mirichoi aimu Laitoriani lang Yeso Kristo.

⁵⁸Naaku taa lalachera o nkanachera ainien nacham, entacho katukul, emungusugus. Entibik nkata pooki ing'idakinono nkisiaayiare e Laitoriani, amu iyielolo aajo mara pecheu siaai linchi taatua Laitoriani.