Read Samburu 1 Lkorinto 4 Bible Online

1 Lkorinto 4 - Samburu bible

1 Lkorinto 4

¹Enteyielo aajo ikira iyioo laisiaayiak le Kristo ooichooki metaa laing'urak loo mbaa naaisudoyieki apa e Nkai.

²Kore ake nayiere taa laing'urak naa payie etumi era looisiligai.

³Kore ta nanu madol hoo era toki tinikinguanguan ntae nanu tanaa sii aaiguanare nkae kiguana, namadung'oki sii nanu koon nkiguana.

⁴Maata mbae naparru naitarruoyie, kake mara inia naaitaa loosipat, Laitoriani ake laadung'oki nkiguana.

⁵Naaku emidung'oki ltung'ani nkiguana ewuon eng'or nkata nachukunyie Laitoriani. Amu kore Laitoriani, naa keibalunyie nenia naaisudoro ta naimin, neibalunyie sii yieunot ee ltauja loo ltung'ana. Kore taa inia kata, neicho ꞉Nkai pooki ng'ae rrepet naichiaakino.

⁶Kore naa lalachera o nkanachera aainien, kaimaka mbaa ainien o ne Apolos aitainyie nkitanyanyukoto payie mirepaa inia naigero too Lkigerot Sinyat, nemeyiere sii neatae lobo linchi ong'idare likae arikoni nemenaa likae.

⁷Amaa, ng'ae likintaa iyie le tipat alang lkulie? Nyo iata iyie namara inia nikinchoo Nkai? Naa amaa tanaa ta Nkai itang'amayie ntoki pooki niata, aanyo payie iilach?

⁸Eji ijoijo ntae iborere pii, neidipa Nkai atamayiana ntae oleng? Eji itaa dei lkinkii mikitii iyio? Oi siake duo tanaa itaa lkinkii payie kintoreicho tenebo o ntae.

⁹Kadol ajo ketipika iyioo Nkai kira lkipaareta le Yeso mataa ltung'ana le siedi, ana ltung'ana otudung'okaki nkiguana e lkiye eing'orita ꞉nkop pooki o lmalaikani, eng'ida.

¹⁰Kedol iyioo nkop ana lmada tankaraki Kristo, nedol ntae tana ltung'ana lenyena ng'eni! Nedol iyioo ana loaachal, nedol ntae ana loogol! Keyanyit ntae, nemen iyioo.

¹¹Kore o taata ikiata sumach o nkure, mpurdat kinchopito neritae iyioo, nimikiata nikimanya.

¹²Keirraayie iyioo siaai ogol likiasita taa nkaik ang. Kore edeki iyioo, nikimayianicho, kore eitami iyioo sina, niking'iri.

¹³Kore teneitarruorri iyioo nkarn, nikiro to mborron. Kore o taata ikituwuana sordo e nkop o lokudong'oi loo nkejek ee ltung'ana.

¹⁴Kore naigerokita ntae naa mara payie aaitam ntae anyit, kake payie aitaarriyian ntae ana nkera ainien nacham.

¹⁵Amu kore abaki duaake tiniatata laiteng'enak 10,000 taatua Kristo, meatae lotiiwua ntae taatua Kristo Yeso, kake nanu otiiwua ntae taatua ninye payie aliki apa ntae Lomon Supati.

¹⁶Naaku kaitanap ntae entoduaayieki,

¹⁷naa tankaraki inia payie airruaaka ntae Timoti, nkerai ai nacham naisiligai ta Laitoriani. Keitaparru ntae naikunari tanairukurukore Yeso Kristo, ana naiteng'enicho chiaake taa nkanisani to ng'oji pooki.

¹⁸Keti lbata linchi oaatang'asutua aaikar ejo malotu nitii.

¹⁹Kore ta nkata nataana echam Laitoriani, naa kalotu nitii. Naa kore payie abau inie, mara ake rerei loo kulo tung'ana ooikar alotu ayielou, kake ngolon naata ninche.

²⁰Amu kore nkitoria e Nkai naa mara nee rereii lemeata tipat kake no ngolon.

²¹Kaa iyieuu too kuna? Kalotu nitii aata ng'udi tanaa te nchaman o ta ltau le mborron?