Read Samburu 1 Lkorinto 5 Bible Online

1 Lkorinto 5 - Samburu bible

1 Lkorinto 5

¹Ketining'ie ajo ketii mboita torno oleng e sesen atua ntae nemeas abaki ltung'ana lemeyielo Nkai, naa kaaing'asia inia. Kore najoito naa ana, eji keboitiere ltung'ani nkaini e ng'otonye!

²Eji ilachlach ntae, kake keyiere apa nisinanionio nintaii aaitung'aa nchula inchi ilo tung'ani oataasa ana.

³Amu kore abaki mati tenebo o ntae te sesen kake nati tenebo o ntae ta ltau, aidipa ana ltung'ani otii inie atudung'oki ilo tung'ani oataasa inia, nkiguana naichiaakino ninye.

⁴Kore tinitumomo tenebo ta nkarna e Yeso netii sii ltau lai o ngolon e Laitoriani Yeso tenebo o ntae,

⁵enchoo ele tung'ani Chitani meitiemio sesen lenye payie eitejeuni ltau lenye ta mparri e Laitoriani.

⁶Keitorno inia kilacha inchi! Aa miyielolo ntae aajo kore nkini mukate naisiicho neisiichie mukate pooki?

⁷Entaitun katukul inia mukate musana naisiicho ee ng'ok, payie itumtum aataa mukate ng'ejuk nemeisiicho ana nirara. Amu Kristo, laa ninye lkuo lang le Pasaka, eitaaki lasar.

⁸Kore tinikinya ntasim e Pasaka, mikinya kiata nkiba o ntorroni, amu inji etuwuana ana inia mukate naaisiicho, kake matam inia tasim tana ltung'ana oowong nedede amu tinikitiu nejia, naa ikira inia mukate ng'ejuk nemeisiicho.

⁹Kaitaarriyiana apa ntae ta mpalai naigeroka ntae payie miatata nchula o ltung'ana oaas mboita e sesen nemechiaakino.

¹⁰Mara taa ltung'ana le ana kop oaas mboita e sesen nemeichiaakino aimakita, tanaa loolubo tanaa loaasapaa ntokitin too ltung'ana tanaa loaasai nkaitok e sapare, amu tanaa nejia anata ipuopuo aaing'uaa ana kop.

¹¹Kore natejo naa, emiata nchula o ltung'ani oji le Kristo, oas mboita e sesen nemeichiaakino, tanaa lolubo tanaa loasai nkaitok e sapare tanaa lodekicho tanaa lomera tanaa loasapaa ntokitin ee ltung'ana. Eminya abaki ndaa tenebo o ltung'ani otuwuana ilo.

¹²Mara siaai lai payie adung'oki nkiguana ltung'ana lemeyiolo Kristo, kake Nkai nadung'oki. Kore ltung'ana ooichiaakino ninguanarere naa ltung'ana le nchula inchi, ana nejo Lkigerot Sinyat, <<Entimirai ltung'ani torno taatua ntae.>>