Read Samburu 1 Lkorinto 7 Bible Online

1 Lkorinto 7 - Samburu bible

1 Lkorinto 7

¹Kore naa taa mbaa nikingerokita, naa keisupat tenemeas lee mboita e sesen o ntomononi.

²Kake kore naa amu ketaa mboita e sesen nemeichiaakino kitok, enchoo metaa meatae lee lemeata ntomononi enye, nemeata ntomononi nemeata lpayian lenye apeny.

³Keyiere neicho ꞉lpayian ntomononi enye inia naichiaakino te sesen, neiko sii ntomononi nejia ta lpayian lenye.

⁴Amu meitore ntomononi sesen lenye kake lpayian oitore. Nejia sii ake etiu ta lpayian mara ninye oitore sesen lenye, kake ntomononi enye naitore.

⁵Emiany iboitata te sesen mara ake nkata nitachamaitie pukura aany inia tankaraki niyieuu payie itumokiki nkomono. Nintokiki taa ake aaku tenebo payie metem ntae Chitani tankaraki nimiatata nkibooroto e ate.

⁶Mara taa nkitanapata ana naichorita ntae, kake kaicho ntae mpaach payie iasias nejia.

⁷Kayieu duo niwuenini ana nanu, kake keichoo Nkai ltung'ani pooki nkichooroto supat, eata likae ana, neata likae nkae.

⁸Kaliki lolo ltung'ana leitu eyemicho o leitu eemi o nkoilia nchere keisupat tee ninche tenewueni ana nanu.

⁹Kake kore tanaa meidim aaibooi ate, enchoo eyemicho anaa eyemi. Amu naikach teneyemicho anaa eyemi alang tenewueni aaitar ate nkiborra ee nkonyek.

¹⁰Kore too lolo ooyema, kaata ana kitanapata namara nanai kake na Laitoriani, nchere payie meorere ꞉ntomononi lpayian lenye.

¹¹Naa kore teneorere, newuon meyema ankata echukokino nening'ore lpayian lenye. Kore sii lpayian, Meyiere neiturraa ntomononi enye.

¹²Kore naa, kaitoki airorie lkulie linchi, namaata taa nkitanapata naing'uaa Laitoriani tana bae, teneatae lalache leitu eiruk ꞉ntomononi enye Kristo netachamayie inia tomononi awuon o ninye, naa meyiere payie eiturraa ninye.

¹³Naa teneatae ntomononi nairuko Kristo neitu eiruk lpayian lenye, netachamayie awuon o ntomononi enye, naa meyiere payie eiturraa.

¹⁴Amu kore lpayian leitu eiruk Kristo, neitaaki supat tankaraki ntomononi enye nairuko Kristo, naa kore ntomononi neitu eiruk Kristo neitaaki supat tankaraki lpayian lenye oiruko Kristo. Amu tanaa mara duo nejia etiu, anata mara nkera inchi supati, kake kore natiu keisupati ninche.

¹⁵Kake kore teneyieu ltung'ani leitu eiruk Kristo neorore lpayian anaa ntomononi enye, neichori eorore. Meitoki naibooyo inia anache tanaa ilo alache kake keipoto ntae Nkai payie iwuenini te seriani.

¹⁶Amaa dei iyie natomononi, miyielo ajo keidimai payie ejeu lpayian lino tankaraki iyie? Oo iyie lapayian, miyielo ajo keidimai payie ejeu ntomononi ino tankaraki iyie?

¹⁷Kore eyia enchoo pooki ng'ae metowuana ana nategelaka ꞉Laitoriani payie eipot ninye ꞉Nkai. Naa ana taa nkitanapata ai taa nkanisani pooki.

¹⁸Kore tanaa kemurata ltung'ani payie eipot ꞉Nkai, meyiere nenyok aisudoo muratare enye. Naa tanaa memurata ltung'ani payie eipoti, nemeitoki aicho metumurati.

¹⁹Mara muratare toki, namara sii toki teneitu kimurati, kake kore ntoki nara toki naa tinimbung nkitnanapat e Nkai.

²⁰Enchoo pooki ng'ae metowuana ana netiu payie eipot Nkai.

²¹Rrindik apa ira iyie payie kimpot Nkai? Mincho inia bae kintanyamal, kake tanaa keatae nkoitiei nitumie lakunoto ino, niyiaya.

²²Amu kore ltung'ani oipoto ꞉Laitoriani era rrindik, naa ltung'ani otalakua ꞉Laitoriani. Nejia sii etiu, kore ltung'ani lamara apake rrindik payie eipoti naa rrindik le Kristo taata.

²³Keitama ntae Laitoriani ntoki nagol nemenyieng'unoi, emiaku naa rrindiki loo ltung'ana.

²⁴Naaku lalachera o nkanachera ainien, entewueni pooki itiuu ana apake nitiuu tekue payie eipot ntae ꞉Nkai.

²⁵Kore taa mbaa naaipirita ltung'ana leitu eyemicho o leitu eemi, maata nkitanapata naaichoo ꞉Laitoriani, kake kalimu nanu nduaata ai atuwuana ilo oisiligai amu kaaichoo Laitoriani omom.

²⁶Kore naa tankaraki natogolo ana kuarie, kajo naikach tenewuon ltung'ani ana netiu chiaake.

²⁷Kore tanaa iyama, miyiaya nkoitiei e oro. Naa tanaa eitu iyemicho, miyiaya ntomononi.

²⁸Kake tiniyemicho mara ng'oki itaasa, naa teneyemi nkoliontoi mara sii ng'oki etaasa ninye. Kore lolo ooyemicho naa keimaa sina, naa kajo payie aitapaachere ntae ilo sina.

²⁹Lalachera o nkanachera, ana bae dei aimakita, nchere ketinyikua nkata e nkiting'oto. Naaku kore ang'asu taata, enchoo lolo oaata ntomonok ewueni atuwuana lemeata,

³⁰kore lolo ooichir nchoo etuwuana meichirita, kore loong'ida nchoo etuwuana meng'ida, kore lolo ooinyiang'icho nchoo etuwuana mara nkunenche ntokitin naainyieng'utua.

³¹Kore lolo oaasichere ntokitin ena kop, nchoo etuwuana lemeret nenia ꞉tokitin. Amu kore ana kop ana chiaake nikiyielo, nemebikoo kake keich mpukunoto enye.

³²Kayieu nanu payie miirranana. Kore ltung'ani leitu eyemicho naa mbaa e Laitoriani eirranakino ayiaya neiko teneiting'id Laitoriani.

³³Kake kore ltung'ani oyemichie naa mbaa e ana kop eirranakino, ayiaya neiko teneiting'id ntomononi enye,

³⁴naaku kore yieunot e ltau lenye naa keoro. Kore ntomononi tanaa nkoliontoi nemeyama naa mbaa e Laitoriani eirranakino, amu kore yieuna enye naa payie eaku sinyati te sesen o ta ltau. Kake kore ntomononi naema naa mbaa e nkop eirranakino ayiaya neiko teneiting'id lpayian lenye.

³⁵Kore kuna baa natejo naa payie eret ntae, mara payie aibooyo ntae. Amu kore nayieu naa payie iwuenini to nkoitiei naichiaakino, nibung'ubung Laitoriani aaitirrichaki miatata irran.

³⁶Kore tenedol lee ajo merekure eidim aaibooi lng'uarra oata te inia oliontoi natoomonua, neiririkinete ninche nkiyema, enchoo eyama amu mara ng'oki teneyema.

³⁷Kake kore lotudung'o ta ltau lenye ajo kebik eitu eyemicho, neidim sii aiboi koon, naaku ketaasa supat tenewuon aanyu inia tomononi enye.

³⁸Naaku kore ltung'ani ooyem inia oliontoi natoomonua, naaku ketaasa supat, kake kore ilo otowuana oleng eitu eyemicho, naaku ketaasa supat oleng.

³⁹Kore ntomononi nayema naa meyiere payie eitokini aayem ewuon eichu lpayian lenye. Kake kore teneper lpayian, naaku keyiere payie eyem ꞉ltung'ani oyieu ꞉ninye, kake loiruko Laitoriani.

⁴⁰Naa kore to nduaata ai, keng'ida ninye teneitu eitokini aayem. Naa kajo sii nanu Ltau Sinyati le Nkai laatutayie matejo kuna baa.