Read Samburu 1 Lkorinto 9 Bible Online

1 Lkorinto 9 - Samburu bible

1 Lkorinto 9

¹Amaa, keatae sa ntoki naaibooyo payie maas nayieu? Mara nanu Lkipaaret la Laitoriani? Amaa, eitu adol nanu Laitoriani lang too nkonyek ainien? Amaa ntae, mara lng'anayio le siaai lai lataasa taatua Laitoriani irara?

²Kore abaki tanaa eitu aairruaaki ꞉Yeso lkulie tung'ana ana Lkipaaret lenye, kaairruaaka naa ntae! Amu ntae naa sipsip ooitodolu aajo kara Lkipaaret la Laitoriani.

³Kamitu koon too lolo tung'ana ooiparuta mbaa ainien, aiko nchi.

⁴Amaa, mikiata nkitoria nikinyayie ndaa o ntoki nikimat?

⁵Amaa, mikiata iyioo lakunoto nikiyemie ntomononi nairuko Kristo, nikirik ninye ana neasita lkulie kipaareta la Laitoriani o lalachera lenyena o Kepa?

⁶Tana Barnabas o nanu aapeny echi ooichiaakino payie eas siaai likitumie ndaa nikinya?

⁷Itining'o aikata sikarii olak koon teneas siaai loo sikarini? Keatae ltung'ani oun lchampa, nemenya lng'anayio le ilo champa lenye? Anaa keatae ltung'ani oaramat ntare, nememat kule enche?

⁸Amaa kulo omon laimakita, loo ltung'ana ake ana nejia abaki ejo ꞉nkitanapat e Nkai?

⁹Amu keigero tee nkitanapat e Musa ajo, <<Miyen lmong'o nkutuk emanaa aidong nkano.>> Amaa, lmong'i aapeny apa eparrarita ꞉Nkai payie ejo ana?

¹⁰Mara tankaraki iyioo apake payie etejo Nkai ana? Ee kedede tankaraki iyioo eigero, amu kore ilo oturucho o ilo ooidong nkano neasita siaai eata siligi payie eng'ar tenebo ndung'ore.

¹¹Amaa amu ikituuno lantarara la Ltau Sinyati le Nkai taatua ntae, ijo sa meichiaakino iyioo tiniking'amaa ntoki nikinya o nikinchop taa ntae?

¹²Kore tanaa keatae looichiaakino neng'amu reto taa ntae, mara iyioo naa eichiaakino oleng? Kake eitu chiaake kiyiaya iyioo inia naichiaakino iyioo. Alang nikias inia, niking'iri mbaa pooki payie mikimbooyo hooyia Lomon Supati le Kristo ta mbae ake naje.

¹³Kasip ajo iyielolo aajo kore ltung'ana oaasicho ta nkaji e Nkai naa te inia aji e Nkai etum ndaa, naa kore lolo ooisiaaicho te lperere la lasar, neng'arieki lasarri ooitaini te ilo perere la lasar.

¹⁴Nejia sii eitanapichie Laitoriani metaa kore lolo oolikoo Lomon Supati, nenyayie ndaa likoroto ee lolo Omon Supati.

¹⁵Kake eitu ayiaya hoo nabo ee kuna naaichiaakino, namaigerito kuna baa payie atum nana tokitin. Naikach abaki tanaye alang tanaaoru ꞉ltung'ani rrepet naata tankaraki nalikoo Lomon Supati maitalakicho pito.

¹⁶Kore abaki tanaa kalikorita lolo Omon Supati, naa meitoki ailachie amu Nkai koon naaitanapa matilikoi. Oi siake ltolut nanu tanamalikoo Lomon Supati!

¹⁷Kore tanaa yieuna ai alikorie, anata aa kaichiaakino laata, kake mara yieuna ai amu Nkai naaitaa laing'urani le ele siaai.

¹⁸Naaku nyo naa laata ai? Kore tanalikoo Lomon Supati, naichooyo pecheu meti laata, napal inia naaichiaakino nanu te likoroto ee Lomon Supati, naa ninye laata ai.

¹⁹Kore abaki ara nanu ltung'ani lamara rrindik loo ltung'ana, kaitaa koon rrindik loo ltung'ana pooki payie atum ateyietu lkumo metaa le Kristo.

²⁰Kore payie atum ateyietu Lyiaudi metaa le Kristo, nawuon ana ninche tanatii tenebo o ninche, atuwuana ltung'ani oirukurukore nkitanapat enche, abaki matii taabori nenia kitanapat.

²¹Kore ati tenebo o lkulie tung'ana lemeirukurukore nkitanapat ee Lyiaudi, nawuon ana ilo lemeirukurukore nenia kitanapat, payie atum ateyietu ninche metaa le Kristo. Mara nanu lobo lemeirukurukore nkitanapat e Nkai, kake kairukurukore nkitanapat e Kristo.

²²Kore apa atii tenebo o lolo oaachal to nkurukoto, naya koon ana netiu ninche payie atum ateyietu ninche netii Kristo. Naaku katonyua nanu ayiaya nkoitiei naning'ore ltung'ana pooki payie ebaki ake naitejeu lbata lenche.

²³Kataasa nanu kuna baa pooki tankaraki Lomon Supati le Yeso Kristo, payie ikitum aatang'ar o lkulie tung'ana mayian ee lolo Omon Supati.

²⁴Amaa, miyielolo aajo ltung'ana kumo chiaake oaang'asu nkuetata, kake ltung'ani obo ake oisul, netum inia naichori loisula? Enkuet naa payie itumtum inia!

²⁵Kore pooki ng'ae oyieu payie ekuet neisul, keichiaakino nerretena oleng. Kekuet ninche payie etum ntoki nemebik, kake kore iyioo naa ikikuet payie kitum ntoki nabik ntarasi.

²⁶Naaku maijulo nanu tanakuet, namanya larrabal ana ꞉ltung'ani oikuto siwuo.

²⁷Kake kore naas, kaar sesen lai metaa rrindik lai payie meaku katilika lkulie tung'ana Lomon Supati, kore tesiedi naanyi nanu.