Read Samburu 2 Lkorinto 1 Bible Online

2 Lkorinto 1 - Samburu bible

2 Lkorinto 1

¹Kore ana palai naa nanu Paulo eing'uaa, oara te yieuna e Nkai, Lkipaaret le Yeso Kristo, ilo Aitejeunoni oanyutae apa, neing'uaa sii lalache lang Timoti. Ikiroroki nkanisa e Nkai nati Korinto o sinyat pooki ootii nkop e Akayia.

²Metaa munyani o seriani naing'uaa Nkai Papa o Laitoriani lang Yeso Kristo tenebo o ntae.

³Meisisi Nkai nara Papa la Laitoriani lang Yeso Kristo, Papa lo lng'ur, laa ninye Nkai nemelau aikata rreten!

⁴Ninye oitogol iyioo te sina pooki likiata, payie kitum sii aaitogolo lkulie teneimaa sina oje, te inia rreten naterretenie iyioo.

⁵Amu kore ana nikiimarita sina o mion ana naimayie Kristo, naaku ikiata sii iyioo rreten kitok nemeiting taatua ninye.

⁶Kore teneitami iyioo sina, neaku inia rreten o njeunoto taa ntae, naa tenerreteni iyioo, nitumtum sii ntae rreten ing'iriri ilo sina likiimarita iyioo.

⁷Naaku kore siligi lang taa ntae naa kerrapa, amu ikiyielo aajo kore ana ning'arng'ar sina o iyioo, ing'arng'ar sii rreten ang naicho iyioo Nkai.

⁸Naa lalachera o nkanachera ainien, mikiyieu naaku miyielolo sina likiimaitie iyioo te Asia. Kore nenia baa nikitumo naa keirochi oleng aarepaa nenia nikindim, ana matejo mikipok.

⁹Nikining katukul aajo kitumutate, kake ketaase inia payie mikintoki aaisilig ate, kake payie kisilig Nkai naitipiu lootuata.

¹⁰Keyiata kinyikaki lkiye, kake ketalakua iyioo Nkai, naa keche ake alaku iyioo. Nikitipika sii siligi lang ninye aajo keitoki ake alaku iyioo,

¹¹tiniretutu iyioo to nkomono. Kore teneomon ltung'ana kumo Nkai meichoo iyioo omom enye, naaku keicho kenya ꞉lkumo ninye nache tankaraki iyioo.

¹²Kore to nkop pooki aa oleng taatua ntae, ikitowuana ana ltung'ana supati ltauja o ana ltung'ana oong ana nayieu Nkai. Neitu kirukurukore inia najo ltung'ana le nkop ng'eno, kake munyani e Nkai kirukurukore. Ikiyielo taa ltauja lang aajo nejia etiu, naa inia ntoki niking'idare.

¹³Amu kingerokita ake ntae mbaa nindimdim aisoma nining'ung'u.

¹⁴Kebaki naa mining'ung'u mbaa pooki taata, kake kaisilig ajo ining'ung'u katukul mparri nabo. Kore ta mparri e Laitoriani lang Yeso Kristo, ing'idakinono ntae iyioo niking'idakino sii iyioo ntae.

¹⁵Kasip apake nanu ana, inia payie aterretene aisabaki ntae, payie itumtum mayian aaigil nkatitin are.

¹⁶Amu katerretene apa payie aisabaki ntae aloito Makedonia, naterretene sii payie aimu ntae aing'uaa inie paa ntae likintanapnap nikirruayaya aloito Yudea.

¹⁷Naaku, amaa apa payie arretena, ketuwuana kataasa eitu aing'uraa aitibiraki? Naa amaa tanadung aterretenai, kaas ana ltung'ana le nkop oojo, keas mbae eyielo ake aajo meas?

¹⁸Kake kore ana nara Nkai naisiligai, kore tinikiliki ꞉iyioo ntae ntoki naaku nejia.

¹⁹Amu kore nkerai e Nkai Yeso Kristo otilika ntae ꞉Silpanas o Timoti o nanu lomon lenyena, eitu elotu aaku <<Ee>> o <<Mara>> Kake taatua ninye eimie Nkai ntoki pooki ajo <<Ee>>,

²⁰amu te ninye eitabari lekutukie le Nkai pooki. Naa inia payie kijo te ninye <<Aamin>> payie etum Nkai nkisisa.

²¹Amu Nkai naitogol ntae o iyioo payie ikimbung'are Kristo.

²²Netegelua iyioo, nepik sii lminchire oitodolu ajo ikira lenyena, apik Ltau Sinyati atua ltauja lang ana sipsip ee mbaa pooki nikitum kenya.

²³Kaitache tekue Nkai payie elimu ninye sipata naaipirita, naa tanaa medede ana, neya nkichui ai. Kore payie eitu achukunyie Korinto naa tankaraki namayieu naitanyamal aitoki ntae.

²⁴Amu mikinyokita aisimaki ntae embung'a nenia nirukuruk, tankaraki ikiyielo aajo itarrapate aitibiraki to nkurukoto. Kore iyioo naa ikiasicho tenebo o ntae payie iwuenini te ng'ida.