Read Samburu 2 Lkorinto 12 Bible Online

2 Lkorinto 12 - Samburu bible

2 Lkorinto 12

¹Meatae ajo malo kue aikar, abaki meitoki eret inia. Kake kairo taata mbaa naaitoduaa o naatoboloka Laitoriani.

²Kore apa larin tomon o oong'uan ooima, netii ltung'ani obo le Kristo otowuapayie ꞉Nkai aya nkop e ng'ida. Mayielo tanaa ketarrapuaki apa aaya eata sesen lenye tanaa keikonyi atuwuana keidetdet.

³Kaigil taa ake ajo, kayielo ajo ketowuapayieki ilo tung'ani aaya nkop e ng'ida, peera ketowuapayieki apa aaya eata sesen lenye tanaa keikonyi atuwuana keidetdet mayielo, Nkai apeny nayielo. Nening mbaa e nking'asia nemenyaunoi, nemeyiere nelimu ltung'ani.

⁵Kaikar tankaraki mbaa naataasate te ilo tung'ani, kake meitoki aikarrie to koon mara ake nchalan ai.

⁶Kore abaki duaake tanaa kayieu naikarrie nenia baa, maaku sii lmadai amu sipata ake alimuta. Kake maikarrie payie meatae ltung'ani laailiepie aitalang inia natoduaa ninye tanaa natining'o ta nanu.

⁷Kore payie mailiepunyie koon tankaraki nenia baa kutuaa e nking'asia naatobolokaki, naapiki lkukuai sesen, aa ilo malaika le Chitani maatooch aiteme naaibooyo payie mailiepunyie koon.

⁸Nkatitin uni atoomono Laitoriani maatooru ana bae.

⁹Kake naajoki, <<Kore munyani ai naa ikintiemu, amu te nechalu ltung'ani, nelioi neuwa ngolon ai.>> Naaku kang'ida oleng, naa alang tanaikarrie mbaa naaitoduaa Nkai, naikarrie mbaa naitachal payie etum ngolon e Kristo atowuana taatua nanu.

¹⁰Kore tankaraki Kristo, nachamaa mbaa naaitaa nanu ltung'ani oachal o tanaitami anyit o tanaaitogolikini o tanaaitami sina o tananyamalu ta ltau. Amu kore nkata nachal, naa inia kata agol.

¹¹Katutuwuana ana lmadai naa ntae likinkuna nejia, amu ntae apa eyiere payie kirreprrep nanu. Kore abaki tanaa meitoki ara, mara nanu kini too lolo lkipaareta kulda ooji le tipat oleng.

¹²Kataasa siaai lai pooki te ng'iriata taatua ntae, naa kore mbaa naaitodolu aajo kara lkipaaret odede le Yeso, naa mbaa naataasa Nkai taatua ntae. Ketaasa mbaa naaing'asicho o naaitodolu ngolon enye.

¹³Amaa, taa oitiei eitu eikeni ntae alang nkulie anisani, mara ake te inia neitu aipotunyie ntae reteto ee ropiyiani? Mara kaomon ntae mpalikinoto eji atuwuana kaitarroyie?

¹⁴Kore naa taata, katerretene payie alotu aisabaki ntae nkata e uni. Namaaku nkirochi taa ntae, amu kore nayieu naa mara ntokitin inchi kake ntae. Kore chiaake naa mara nkera eyiere payie eitengelaki ntoiwuo ntokitin, kake ntoiwuo eyiere neitengelaki nkera enche.

¹⁵Kaichooyo ntokitin pooki naata tankaraki ntae te ng'ida, nanang ntae. Amaa, keaku nchaman inchi kini ta nanu tankaraki nacham nanu ntae oleng?

¹⁶Kajo ing'amaa naake taata aajo eitu apake aaku nkirochi taa ntae. Kake kejoitoi kore amu kara jartan, naa katipika ntae loseg!

¹⁷Mara meatae ltung'ani laitamaaya, hoo to lobo loo lolo tung'ana lairruaaka ntae?

¹⁸Katoomono Tito meeu nitii, naitoki airriu ilo likae alache obo meeu tenebo o ninye. Amaa keitamaaya apa ntae Tito? Nabo chiaake kira o ninye, nikiim sii nkoitiei nabo.

¹⁹Amaa teneisomakini taata ntae ana palai, ijoijo ntae nkata pooki ikinyokita iyioo aang'oroo ate? Metiu nejia! Ikiro iyioo ana laisiaayiak le Kristo tekue Nkai, naa kore pooki nikijo, sotuatin lainien lacham naa payie eitogol ntae.

²⁰Kaurie ajo kebaki naa kairrachu ntae mitiuu ana nayieu tanalotu nitii, naa ikindimdim aatum matiu ana niyieuu. Kaurie ajo kairrachu ntae iatata nchankar o lom o lchut le ngoro o mpiani, niroro mbaa torrok naaipirita ltung'ana, niatata meteteel o nkilacha, neatae loatanya eitorei.

²¹Kaurie ajo kore tanaitoki alotu nitii naa kaaitam ꞉Nkai ai anyit atii tenebo o ntae, naisinanio tankaraki ltung'ana kumo oaataasa apa ng'ok, newuon eitu eirriidu aapal ntorrok o mboita e sesen nemeichiaakino o nkulie baa e anyit apa naatomoo.