Read Samburu 2 Lkorinto 4 Bible Online

2 Lkorinto 4 - Samburu bible

2 Lkorinto 4

¹Kore tankaraki naichoo iyioo Nkai te lng'er lenye ana kisiaayiere, naaku megila iyioo ltauja.

²Kake ikitanya mbaa pooki naaisudoro e anyit, nimikiasichere sapare tanaa kintarruoo rerei le Nkai. Ikimbalie sipata ee Lomon Supati, kiyieu payie esipu pooki ng'ae ta ltau lenye nikitiu tekue Nkai.

³Amu kore tanaa keisudoro Lomon Supati likilikoo, naa too lolo ooidaaya eisudoro.

⁴Keikeno ꞉Chitani nara nkai ena kop nkonyek enche metaa medolicho, aibooyo payie medol wong'an naitoong'aki ninche ꞉Lomon Supati, naa kore inia wong'an naa Kristo oara nkitanyanyukoto nadede e Nkai.

⁵Amu mara ate kilikoo iyioo, kake Yeso Kristo kilikoo ana ilo Aitejeunoni oanyutae apa[1], nikilikoo sii ana Laitoriani. Naa kore iyioo ikira laisiaayiak linchi tankaraki Yeso.

⁶Kore Nkai natejo, <<Metupuku wong'an aong'u taatua naimin,>> naa ninye ake naitowong ltauja lang payie eibalie yielounoto e nkitoo e Nkai naong'u to nkomom e Kristo.

⁷Ltung'ana ake oaachal kira iyioo ootuwuana motioo ee nkulupo, kake keichooki iyioo ana toki e tipat, payie eibalai ajo kore ana golon nemeitoki eitinyunyukieki naa Nkai eing'uaa mara iyioo.

⁸Keironyitae iyioo taa mbat pooki, kake eitu kimuta, netii nkatitin nimikiyielo nikias, kake eitu eich iyioo siligi.

⁹Neitamitae iyioo sina, kake eitu eing'uaa iyioo Nkai, netipikaki aitoki iyioo lbaa, kake eitu eri iyioo matuata.

¹⁰Kore to ng'oji pooki nikipuo naa ikitumuto tee seseni lang mion natumo apa Yeso payie eri, neibalunyieki sii nkichui enye te nkichon ang.

¹¹Amu kore ake ewuon kinchu naa keichori chiaake iyioo matuata tankaraki Yeso, payie eibalunyieki nkichui enye tee seseni lang oomutari.

¹²Naaku keyieita iyioo lkiye, kake kore nkichui e Yeso naa keasicho taatua ntae.

¹³Kejo Lkigerot Sinyat, <<Kairo tankaraki nairuko.>> Kore to nkurukoto naijo inia, ikiro sii iyioo tankaraki nikiruko.

¹⁴Ikiyielo aajo kore Nkai naitipiwua Laitoriani Yeso aitung'aa lootuata, keitipiu sii ninye iyioo kitii atua Yeso neyau iyioo inie netii ninye tenebo o ntae.

¹⁵Kore kuna pooki naatumuto iyioo naa keasai payie eret ntae metaa kore ebulaa munyani e Nkai, neponunye ꞉ltung'ana ooicho Nkai nache netum ninye nkisisa te inia.

¹⁶Naaku megila iyioo ltauja. Kore abaki emutari seseni lang le oriong, naa keiteng'ejuki nkurruki ang mparri o mparri.

¹⁷Naa kore ele kiti sina le nkiti kata, naa keitibiraki iyioo matum ng'ida nemelimunoi, kitok alang ele sina le taata.

¹⁸Naaku mara nenia naalio kikurraki nkonyek ang aing'or, kake nenia nemelioo. Amu kore nenia naalioo naa nkiti kata ake ebik, kake kore nemelio nebik ntarasi.