Read Samburu 2 Lkorinto 5 Bible Online

2 Lkorinto 5 - Samburu bible

2 Lkorinto 5

¹Ikiata sesen le ana kop otuwuana nkaji e nkiti kata namanya nkichui ang. Naa Ikiyielo aajo kore kenya teneidaari ele sesen, ikiata te chumata sesen oicho iyioo Nkai, oaku nkaji nabik ntarasi neitu eitibir nkaina e ltung'ani.

²Kore ewuon kiata ele sesen ikinchir kiyieu payie eichopokini iyioo ilo sesen le chumata.

³Kore teneichopokini iyioo ilo sesen, nimikintoki aaku mikinchopo.

⁴Amu kore ake ewuon kiata ele sesen le ana kop naa ikinchir, neirochi iyioo ltauja tankaraki nimikiyieu neitaini ele sesen lang, kake ikiyieu payie eichopokini iyioo sesen lemeye paa kore ele sesen oye, neimulmuli te nkichui nabik ntarasi.

⁵Nkai naa naterretena iyioo payie easai ana tee iyioo, neicho iyioo Ltau Sinyati metaa sipsip ajo keitabaya inia.

⁶Naaku ikiata nkitieunoto nkata pooki, naa ikiyielo aajo ewuon ake kiata kulo seseni, newuon eng'or payie kiaku tenebo o Laitoriani.

⁷Amu to nkurukoto kipuoito iyioo, mara taa mbaa naalioo.

⁸Kore taa najoito, naa ikiata nkitieunoto, nikiyieu payie kitum aataa tenebo o Laitoriani alang tinikiata kulo seseni le ana kop.

⁹Naaku kore nalus too pooki, ikiyieu nikinting'id ninye kiata kulo seseni lang oo mikiata

¹⁰Amu meata ajo mikipuonu pooki tekue lorika oiguanichiere Kristo meiguanareki iyioo, paa kore pooki ng'ae nelaakini ntoki pooki naataasa ewuon apa eata ele sesen, peera supati tanaa ntorrok.

¹¹Kore tankaraki nikiyielo aajo keichiaakino payie eurieini Laitoriani, naaku ikinyok aasai ltung'ana meeiruko lomon lang. Keyielo Nkai iyioo katukul ajo oong'ae kira, nayieu sii niyielouu ntae taa ltauja linchi nikitiu.

¹²Mikintoki aaigil arrepaki ntae ate, kake ikiyieu nikincho ntae mpaach ning'idarere iyioo, payie itumtum aatowoliki lolo oong'idare mbaa eoriong namara ne atua ltau.

¹³Kore tanaa ikitamadete naa tankaraki nikisiaita Nkai, naa tanaa kecho iyioo nkuechi, naa tankaraki nikisiaita ntae.

¹⁴Naaku nchaman e Kristo naitore iyioo, amu ikitisiputua aajo ketanang'a ltung'ani obo ltung'ana pooki, naaku ketuata ltung'ana pooki.

¹⁵Ketanang'a ꞉ninye ltung'ana pooki, paa kore lolo oaata nkichui ng'ejuk nemeitoki aawueni eiting'id ate, kake payie ewueni aaiting'id ilo oatanang'a ninche nepiu tankaraki ninche.

¹⁶Naaku kore ang'asu taata meata ltung'ani likiya to nduata e ltung'ani. Kore abaki kiwaita apa Kristo te inia oitiei, merekure taata king'or ninye aiko nejia.

¹⁷Naaku kore tenetii ltung'ani atua Kristo, netaa ntoki ng'ejuk, echomo napa musana, nelotu ng'ejuk.

¹⁸Nkai nataasa ana pooki, aa kore aimu Kristo neitutumoka iyioo koon, neitoki aicho iyioo ana kisiaayiere maitemeleta lkulie o ninye.

¹⁹Kore nikijoito naa nchere ketii apa ꞉Nkai atua Kristo aitemelet koon o nkop, meikenaki ltung'ana ng'ok enche, neichoo sii iyioo Lomon Supati ooyau melet.

²⁰Naaku ikira iyioo looirriwayieki le Kristo, naa Nkai nasaicho taatua iyioo. Kore kilej ntae entemelet o Nkai, naaku Kristo olejita ntae.

²¹Amu kore ilo leitu eas ng'oki, neitaa ꞉Nkai lasar lo ng'ok ang, paa kore aimu ninye nikiaku iyioo loosipat tekue Nkai.