Read Samburu 2 Lkorinto 7 Bible Online

2 Lkorinto 7 - Samburu bible

2 Lkorinto 7

¹Naaku naa sotuatin lainien, kore tankaraki nikiata kulo lekutukie le Nkai, matung'ai ntoki pooki naitarruo seseni o ltauja lang, nikiaku sinyat le Nkai katukul kiurie ninye.

²Entang'amai iyioo, meatae ltung'ani likintarrokita, nemeatae likintopong'oitie, nemeatae sii likintamaaita.

³Majoito taa ana adung'oki ntae nkiguana amu katejo apake tekue nchere, irara ltung'ana le tipat oleng tee iyioo metaa ikiwueni tenebo kinchu nikinang nebo.

⁴Kaitieu airorie ntae katukul, nang'idare sii ntae oleng. Kore natining'o naipirita ntae naa kaitogolo nanu naiting'id katukul, too kulo sinaitin lang pooki ootumuto iyioo.

⁵Amu kore abaki apa payie kibau Makedonia, nikining aajo mikiata seriani. Ikiata apa mbaa nikirare taa mbat pooki, eilemlemakita iyioo ltung'ana nikiata sii ngureticho.

⁶Kake kore Nkai naa ninye naitogol lootigilate ltauja, neitogolo iyioo inia kata apa payie elotu Tito nikitii.

⁷Namara taa ake lotunoto enye apeny naitogolo ltauja lang, kake ikitogolito abaki payie kining aajo intogolito ntae ninye. Ketilika ninye iyioo ajoki iyieuu nikidoldol oleng o ninkuna tinisinanienio oleng o ninkuna inyoknyok aas nenia natiaka ntae. Nang'ida oleng tankaraki inia.

⁸Kore abaki tanaa keitanyamala ntae inia palai ai, majo hoo taata aanyo apake payie aigero. Katang'asa apa ajo aanyo payie aigero inia palai, payie adol ajo keitanyamala ntae te nkiti kata,

⁹kake kore taata kang'ida, namara tankaraki nitanyamalita kake kore apa payie inyamalulu naa ketereto ntae aibelekeny nkoitieii inchi. Amu kore apa inia naa yieuna Nkai, nemeitoki eiturrarrie ntae inia nikintaasita ntae.

¹⁰Amu kore naa tenenyamalu ltung'ani ta ltau ana nayieu Nkai, neyaki nkibelekenyata nemetii lkiyioi naa ninye nayaki njeunoto. Kake kore tenenyamalu ltung'ani ana neas ltung'ana lemeitaa Nkai toki, neyaki inia ninye lkiye.

¹¹Entodol ja mbaa naataasate tesiedi inia kata payie enyamalu ltauja linchi ana nayieu Nkai. Mara ketaa keikitok nyuata inchi, niteyieuta sii niasias mbaa aichiaaki? Kebaa itogorete tankaraki mbaa naataasate nemeichiaakino? Kebaa iatata ngureticho tankaraki wochoto nindimdim nitumtum? Kebaa iyieuu nidoldol iyioo, nebaa iterretenete payie intememe ilo tung'ani oataasa inia torno? Intodolutua ate katukul aajo meatae hoo ntoki nakurrieki ntae tana bae.

¹²Naaku kore abaki inia palai naigero, mara tankaraki ilo oitarroyie tanaa ilo oitarrokaki, kake kaigero payie itumtum aatisipu tekue Nkai aajo itijing'aitie iyioo katukul.

¹³Keitogolo iyioo inia ltauja. Namara ake apeny keitogolo iyioo, kake ikiting'idate oleng tankaraki ng'ida e Tito, amu intogolito ntae pooki ninye.

¹⁴Katerrepa apa ntae tekue Tito, neitu kintamtam nkop. Kake kore ana nikitilikita chiaake ntae sipata, naaku kore inia rrepet naipirita ntae nikitilikita Tito naa ketaa kedede.

¹⁵Naa keisapuk nchaman enye taa ntae, naleng teneparru ninkuna payie ing'amaa ta nkanyit o te ngureticho niasias ana natiaka ntae.

¹⁶Kang'ida oleng tankaraki kaidim aisiliga ntae taa mbaa pooki.