Read Samburu 2 Lkorinto 9 Bible Online

2 Lkorinto 9 - Samburu bible

2 Lkorinto 9

¹Kore taata meata tipat payie aigeroki ntae aliki mbaa naipirita ana reto naitakini sinyat le Nkai otii Yerusalem, amu indipa apa aateyielo.

²Amu kayielo ajo iyieuu oleng payie iretret ninche, naa tankaraki inia payie arrep ntae tekue ltung'ana le Makedonia ajoki, <<Kore ltung'ana le Akayia naa keterretenete ang'asu apake ta lari oichunye.>> Naa nyuata inchi nainyoyie ltung'ana kumo le Makedonia metaasa inia.

³Kore naa taata, kareuu kulo alachera payie meaku ake pecheu rrepeta nikiterrepa ntae, enterretenata naa amu katiaka ltung'ana le Makedonia indipa aaterretenata.

⁴Mikiyieu metaa tenetii ltung'ana kenya ootuo eing'uaa Makedonia tenebo o nanu neyielou aajo eitu irretenena. Kebaa sa anyit nanya iyioo? Amaa tanaa kenya iyioo anyit nawua nejia, kewua sa nanya ntae?

⁵Naaku inia payie adol nanu ajo keichiaakino payie aomon kulo alachera metang'asa aaisabaki ntae ewuon eitu alotu nanu. Naa siaai lenche payie eitabaya ilo lekutuk loo nkichoorot nintaitua, metaa kore tanalotu neidipaki aatobosu nenia kichoorot pooki, namara te mpiani kake te leng'on.

⁶Entaparru nchere, kore loun lkuni antarara nedung nkini daa, naa kore loun lantarara kumo nedung ndaa kitok.

⁷Keichiaakino payie eichooyo pooki ng'ae inia nategelua ta ltau lenye, nemeichooyo meyieu tanaa eisimakitae. Amu kecham ꞉Nkai ilo oichooyo te ng'ida.

⁸Naa keidim Nkai aichoo ntae munyani pooki nalang inia niyieuu, paa kore taa mbaa pooki nkata pooki, naaku iatata inia naitiemu ntae katukul, niatata nalekunye nindimdim aataasie siaai pooki supat.

⁹Ana nejo Lkigerot Sinyat, <<Ketasachaka nkichoorot enyena te leng'on aicho loomena, neparruni asat enyena ee sipat ntarasi.>>

¹⁰Naaku kore Nkai naicho lantarara ilo ounicho o ndaa nanya, keicho ntae lantarara liyieuu neponunye lng'anayio ooitodolu aajo irara loosipat tekue Nkai.

¹¹Keitaa ntae ltung'ana oaata nalang naayieu taa mbaa pooki, payie iakuku looleng taa mbaa pooki. Kore nenia kichoorot nintaitua te leng'on, neng'amaa ltung'ana tee iyioo, naa keicho ninche meichoo Nkai nache.

¹²Amu kore ele siaai likiasita naa mara ake ltung'ana sinyat le Nkai lemeitoki eata oleng eret, kake keicho sii ltung'ana kumo oleng meichoo Nkai nache.

¹³Kore ana reto nintaitua naa keitodolu ajo kedede nkurukoto inchi, nerrep ꞉ninche Nkai amu imbung'a ntae Lomon Supati le Kristo litilimutua aajo irukurukorere. Kerrep sii aitoki ꞉ninche Nkai tankaraki ning'arierie ninche o lkulie pooki ntokitin inchi te leng'on.

¹⁴Kore teneomonoki ntae, neparru ntae oleng tankaraki inia munyani kitok naichoo ntae Nkai.

¹⁵Maichoo Nkai nache tankaraki inia nkichooroto enye kitok nemelimunoi!