Read Samburu Lgalatia 2 Bible Online

Lgalatia 2 - Samburu bible

Lgalatia 2

¹Kore aitoki pee eich larin tomon o ong'uan, nailiep aitoki alo Yerusalem tenebo o Barnabas. Narik sii Tito.

²Naa kailiepa inie tankaraki mbolunoto naaichoo Nkai. Naiteyielo sii nanu lolo oaata rrepeta Lomon Supati lalikoo tekue loreren, aa nanu ake o ninche. Nataasa ana, payie meaku siaai laasita anaa lataasa[2] le pecheu.

³Kake kore abaki Tito otii tenebo o nanu, neitu eisimakini metumurati, oo duo era ninye loo Lgirriki[3].

⁴Naa ikichomo inie tankaraki lalachera ooiteng'enicho sapare, ootuo atua iyioo too nkurrat aaikitalan lakunoto ang nikiata taatua Kristo Yeso. Keyieu apa neitaa iyioo rrindiki loo nkitanapat e Musa,

⁵neitu kipik ate taabori lolo tung'ana abaki nkata nabo, payie etum ndedei ee Lomon Supati atowuana taatua ntae.

⁶Naa kore lolo arikok oaata rrepeta nchere kera toki, kajo meitoki aatoponikita te nkiteng'ena ai. Kore apa netiu ninche, naa meata tipat ta nanu, amu meing'or Nkai mbaa e oriong.

⁷Kake nedol ꞉ninche aajo kaaichooki Lomon Supati maitabaki lmomurata[4], ana apake neikunaki payie eichori Petero Lomon Supati meitabaki loomurata[5].

⁸Amu kore ꞉ilo oidimie Petero metaa Lkipaaret loo loomurata, ninye sii laaidimie nanu mataa Lkipaaret loo loreren.

⁹Kore aitoki payie eyielou munyani naaichooki nanu, Yakobo taa o Kepa[6] o Yoana, lolo ooyieloi aajo kera lng'opeta, naang'amaa nanu o Barnabas, eitodolu aajo iking'ar ele siaai, payie kipuo iyioo aabaki loreren, nepuo ninche netii loomurata.

¹⁰Neitu eponiki toki, mara rerei obo ake, payie kiparru laisinak, naa katonyua sii nanu aas ilo rerei.

¹¹Kore mparri nabo, payie elotu Kepa Antiok, naany mbaa enyena tekue ninye, amu keichiaakine ninye payie eiguanareki.

¹²Amu kore ewuon eitu epuonu lkulie Yiaudi eing'uaa netii Yakobo, naa kenya ninye ndaa tenebo o ltung'ana loo loreren. Kake kore pee epuonu, nerrinyo siedi, neorore ꞉ninye ninche eurie lturrur loo loomurata.

¹³Kore lolo kulie Yiaudi, nechulare ninye te nkitaakino enye, ana meitopong'ori sii Barnabas te nkitaakino enche.

¹⁴Kore payie adol nchere measita ꞉ninche ana nairirikino te ndedei ee Lomon Supati, najoki Kepa tekue ltung'ana pooki, <<Ira iyie Lyiaudii, kake niwuon ana ltung'ani loo loreren nemerokure irukurukore lkerreti loo Lyiaudi. Aji naa inko payie isimaki loreren meirukurukore ilo kerreti?>>

¹⁵Kore iyioo naa ikira Lyiaudi te inoto, nimikira loo loreren loo ng'ok.

¹⁶Naa ikiyielo aajo meikenakini ltung'ani aajo loosipat tekue Nkai tankaraki nairukurukore nkitanapat, kake to nkoitiei e nkurukoto taatua Yeso Kristo eikenakini. Tankaraki inia, ikitipika sii iyioo nkurukoto ang atua ilo Aitejeunoni Yeso payie eikenakini iyioo sipat to nkurukoto taatua Kristo, namara tankaraki nikirukurukore nkitanapat e Musa, amu meatae ltung'ani oikenakini sipat teneirukurukore nkitanapat.

¹⁷Amaa, tinikiyiaya meikenakini iyioo sipat taatua Kristo, netoduaaki iyioo aajo ikira loopeny ng'ok, keaku Kristo laisiaayiani loo ng'ok? Meaku katukul!

¹⁸Kake tanachet aitoki nenia baa apa naidakie, naa kaitodolu ajo kara laitarruoni.

¹⁹Kore apa anyokita aibung nkitanapat, naalakuni te nkitoria ee nkitanapat payie atum atibikoki Nkai. Kaatechoki tenebo o Kristo.

²⁰Kaatechoki nanu tenebo o Kristo. Merokure aa nanu oichu, kake Kristo oichu taatua nanu. Kore nkichon naichu taata te sesen, naa kapikita nkurukoto ai atua Nkerai e Nkai, ilo laatachama, neichoru nkichui enye tankaraki nanu.

²¹Maany munyani e Nkai, amu tanaa apa nkitanapat eikenakinyieki ltung'ana sipat, naa ketua naake Kristo pecheu.