Read Samburu Lgalatia 4 Bible Online

Lgalatia 4 - Samburu bible

Lgalatia 4

¹Kore najoito naa ana, kore ake ewuon era lajung'oni nkerai, mepaachere rrindik, oo duo aa nenyena ntokitin pooki.

²Kake keti taabori laing'urak o laramatak ana metabau mparri nategelua ꞉papa lenye ajo ketobotoro.

³Naa nejia sii apa etiu tee iyioo, kore kira nkera naa keitaaki iyioo rrindiki lo nkitanapat ena kop.

⁴Kake kore apa payie ebau nkitabaroto e ng'amata, nereu ꞉Nkai Nkerai enye natiiwua ꞉nkitok. Neini metowuana taabori nkitanapat e Musa,

⁵payie elaku lolo ootii taabori nenia kitanapat, pee kiaaku iyioo nkera e Nkai.

⁶Naa kore amu ikira nkera e Nkai, eterewua ꞉Nkai Ltau le Nkerai enye atua ltauja lang, eichir ajo, <<Papa! Papa lai!>>

⁷Tankaraki inia, merokure kira rrindiki, kake ikira nkera e Nkai, naa tanaa ikira nkera, ikira sii lajung'ok.

⁸Kake kore apa ewuon miyielolo Nkai, naa isiaaita nenia namara abaki nkaitok.

⁹Naa kore taata iteyieloutua Nkai, anaa matejo eteyielowua ntae Nkai, aji naa inkoko aitoki tinirrinyokinono nkitanapat ena kop nemeata ngolon, nemeata tipat? Rrindiki lenche aitoki iyieu niakuku?

¹⁰Amaa, iyieuu nitumtum omom e Nkai isiaaitata lkuak linchi le nkubung'ata ee mperot o lapatin o ng'amat o larin?

¹¹Kaurie ajo, katonyua aisiaai ntae pecheu.

¹²Kalej ntae lalachera lainien, entaa ana nanu, amu ataa sii nanu ana ntae, tankaraki merokure ati taabori nkitanapat. Eitu kintarrokiki ntae nanu.

¹³Iyielolo aajo tankaraki nchalan apa natumo payie atilika ntae Lomon Supati nkata ekue.

¹⁴Naa kore abaki itumo ntemata tankaraki nchalan ai, eitu kimenunu anaa king'uaa, kake ikitang'amaitie ana lmalaika le Nkai, oleng ana Laitejeunoni Yeso.

¹⁵Naaku nyo nataase te ng'ida inchi apa niatata? Amu kaitai limunot nchere, kore apa tanaa keidimai, anata itukurtutua nkonyek inchi, nikinchocho nanu.

¹⁶Amaa, kataa naa lmang'antita linchi, tanaliki ntae ndedei?

¹⁷Kore laapa alachera le sapare, naa keyieu ntae oleng. Naa mara tankaraki supaticho eyiewuoki ntae, kake keyieu neitung'aa ntae iyioo, payie intaii ate aairukurukore ninche.

¹⁸Keisupat tiniyieuu oleng niasias supati mperot pooki, namara ake nkata natii tenebo o ntae.

¹⁹Nkera ainien kunini, kaata mion ana ntomononi nasaisai, ana metubulu Kristo taatua ntae.

²⁰Kayieu duo oleng nati tenebo o ntae, payie atum ateleja ntae to mborron, amu kaata lng'ach tankaraki ntae.

²¹Entilikaaki, ntae ooyieu newueni taabori nkitoria ee nkitanapat e Musa, amaa, mining'ning nejo Nkitanapat?

²²Keigero abaki nchere, keata apa Abraam layiok oare, ketiiunyie lobo nkaisiaayiani rrindik, neiunyie likae ng'oriei sainoti.

²³Kore ilo ayieni otiiunyie rrindik, naa ketiiwuaki te nyuata ee ltung'ana, kake kore ilo otiiunyie sainoti naa ketiiwuaki te lekutuk le Nkai.

²⁴Kore kuna baa naa maaji e nkitanyanyukoto. Kore kuna tomonok, naa noo lning'on oare. Kore nabo naa Agar, naitunyinyukoreki ldonyuo le Sinai, naa ninye naiu nkera e rrindikicho.

²⁵Kore Agar, naa nkitanyanyukoto e ldonyuo le Sinai otii Arebia. Naa keinyinyukore Yerusalem e taata, amu keti ninye rrindikicho tenebo o nkera enyena.

²⁶Kake kore inia ng'oriei sainoti naji Sara naa nkitanyanyukoto e Yerusalem e keper. Ninye yieyio ang, namara nkera enyena ne rrindikicho.

²⁷Amu keigero ajo, <<Ting'idai iyie ntomononi olipi, inia nemeiu nkera. Tobuaa ninchir te ng'ida, iyie neitu etum mion e saisai. Amu keikumo nkera e inia natung'ayieki ewuon apeny, aalang nkera e inia natoboitiere lee.>>

²⁸Lalachera, kore taata ntae, naa irara nkera e lekutuk tana Isaka.

²⁹Kore apa te inia ng'amata, neitam ꞉ilo ayieni otiiwuaki to nyuata ee ltung'ana sina ilo otiiwuaki to nkoitiei e Ltau Sinyati. Kore ana netiu apa, naa nejia siake etiu taata, kore lolo ootiiwuaki to nyuata ee ltung'ana, naa keitam sina lolo ootiiwuaki ta Ltau.

³⁰Oo Lkigerot, kejuaa? <<Nturrai nkaisiaayiani rrindik o layieni lenye, amu mejung'ucho layieni le rrindik o layieni le sainoti.>>

³¹Naaku, lalachera lainien, mikira nkera e rrindik kake ikira nkera e sainoti.