Read Samburu Lgalatia 6 Bible Online

Lgalatia 6 - Samburu bible

Lgalatia 6

¹Lalachera lainien, tenerriaakino lobo linchi ng'oki, kore ntae oara botoro taatua nkichon e Ltau Sinyati, embung'a ninye nirrinyokiki atua mbaa supati to mborron. Nirrita sii koon payie mirriakino atua ntemat.

²Enteretokinoto nkirochi, naa te inia oitiei intabayaya nkitanapat e Kristo.

³Naa kore tenedol ltung'ani koon ajo kera toki, nemeitoki era, naaku koon esapita.

⁴Keyiere payie eineneng pooki ng'ae siaai enye. Naa kore inia narrepie koon, neaku nenye ake, nemeyiere neitinyinyukore koon likae tung'ani.

⁵Kore pooki ng'ae, keyiere nenap lkurupa lenye makoon.

⁶Kore ilo oiteng'eni rerei, nchoo metang'arie ꞉ninye laiteng'enani lenye mbaa pooki supati.

⁷Emincho esapi ntae, amu mesapai Nkai. Kore inia natuuno ltung'ani naa ninye edung.

⁸Amu kore ilo oun payie eiting'id mpukunoto enye torno, nedung te inia pukunoto enye torno lkiye laa ntarasi. Kake kore ilo oun payie eiting'id Ltau Sinyati, nedung ta Ltau nkichon ee ntarasi.

⁹Naa mikinauru kias mbaa supati, amu kore teneitu kinauru taa ltauja, naa iking'amaa laare ta nkata nalotu.

¹⁰Naaku kore ewuon kiata nkata, mataasaki ltung'ana pooki mbaa supati, nelusoo lolo likira nabo to nkurukoto.

¹¹Entodol naikuna tanaigeroki ntae kulo sirat kutuaa, ta nkaina ai makoon.

¹²Kore lolo ooyieu neilachie nenia mbaa e sesen, neisimaki ntae muratare, naa keas ake inia payie meitami ninche sina tankaraki lomon lo lmusalaba le Kristo.

¹³Naa kore abaki lolo oaang'amaa muratare naa meibung nkitanapat, kake keyieu nemurati ntae payie eaku inia muratare rrepet tee ninche.

¹⁴Kore nanu, mailachie hooyia hae toki mara ake lmusalaba la Laitoriani Yeso Kristo. Naa to nkoitiei e Kristo etechoki nkop, payie maitoki ara le nkop, naatechoki sii nanu paa maaitoki ꞉nkop aatayie nchula.

¹⁵Amu meitoki era tinikitumurataki tanaa teneitu, kake kore ntoki e tipat naa tinikira nkitibirunoto ng'ejuk.

¹⁶Naa kore pooki oopoyie ana kitaarriyiana, ninche Isirael le Nkai[8], naa metamanyai ꞉seriani o lng'er.

¹⁷Naa kore ang'asu taata, enchoo metaa meatae ltung'ani laaitanyamal, amu kaata nanu lminchiria latumo tankaraki Yeso te sesen lai.

¹⁸Lalachera lainien, metowuana munyani e Laitoriani lang Yeso Kristo taatua ltauja linchi. Aamin.