Read Samburu Epeso 5 Bible Online

Epeso 5 - Samburu bible

Epeso 5

¹Naaku taa, entaa ꞉ltung'ana ooduaaya Nkai, tankaraki nirara nkera enyena naacham oleng.

²Entewueni te nchaman ana natachama iyioo Kristo neitai koon anang iyioo aaku lasar orropili ta Nkai.

³Kore loloito o asat pooki e anyit o lubo naa meyiere nening'i taatua ntae, ana nairirikino netiu sinyat.

⁴Emincho sii metaa keti atua ntae morore anaa rerei le madai o lderrat lemeiririkino. Kore kuna naa meiririkino ntae, kake kore nayiere naa payie inchocho Nkai nache.

⁵Enteyielo katukul nchere, meatae hoo ltung'ani ololoito anaa loas nkulie boita e sesen torrok tanaa loas mbaa e anyit tanaa ltung'ani olibo, otum mpaach te nkitoria nara ne Kristo nera ne Nkai. Kore ltung'ani olibo, naa laisiaayiani laa nkaitok e sapare.

⁶Emincho hoo esap ntae ltung'ani tee rereii oorok, amu tankaraki ee mbaa naijo kuna etum ꞉ngoro e Nkai ltung'ana lemening'icho.

⁷Naaku emiaku nabo o ninche.

⁸Amu irara apa ntae naimin, kake kore taata irara wong'an taatua Laitoriani. Naaku enchom naa ana nkera e wong'an!

⁹Amu kore wong'an naa keiu mbaa pooki supati o mbaa ee sipat o mbaa naadede.

¹⁰Enchom inyoknyok aaing'oru inia naiting'id Laitoriani.

¹¹Emichulakino asat e naimin nemeiu lng'anayio supati kake embalie,

¹²amu anyit abaki teneipoti nenia naas ltung'ana laijo lolo too nkusudorot.

¹³Kake kore nenia pooki nelioi teneitoong wong'an,

¹⁴amu kore ntoki pooki naitoong ꞉wong'an neaku wong'an. Tankaraki inia payie eji, Inyuo iyie loilura, tipiu too lootuata naa ikintoong iyie Kristo.

¹⁵Eng'ura oleng ninkunariri to lototo inchi, mara ana ltung'ana oaamada kake ana ltung'ana ng'eni,

¹⁶niasicherere nkata inchi aaitibiraki, amu keitorrok nkolong'i.

¹⁷Naaku naa emiaku lmada, kake entining'u nayieu Laitoriani.

¹⁸Emintoki aamera ta naichuo, amu kore merai naa keicho ntae enchirkalie ntokitin inchi, kake enchoo eiput ntae Ltau Sinyati,

¹⁹irorie likae likae too sinkoliotin le Nkai o le nkisisa o le nkiyeng'et, iranyakiki Laitoriani taa ltauja linchi,

²⁰Inchocho Nkai Papa nache ta nkarna e Laitoriani lang Yeso Kristo nkata pooki o taa mbaa pooki.

²¹Meatae lemeitodoyio koon te likae tankaraki nirara ltung'ana oourie Kristo.

²²Natomonok entodoi ate taa lpayiani linchi ana ninkoko tinintodoyioyio ate ta Laitoriani,

²³amu lpayian nkue e ntomononi ana pee era Kristo nkue e nkanisa, ilo sesen lenye laa ninye koon Laitejeunoni.

²⁴Naaku kore ana naitodoyio nkanisa koon te Kristo, keyiere sii neitodoyio ntomonok ate taa lpayiani lenche taa mbaa pooki.

²⁵Kore ntae lpayiani, entacham ntomonok inchi ana nacham Kristo nkanisa neichooyo koon anang ninye,

²⁶payie etum aitisinya, eituk ta nkare o te rerei le Nkai,

²⁷netum ayaki koon nkanisa naipilipil nemeata rachata anaa ntioto anaa ntoki natuwuana inia pee eaku nkanisa sinyati nemeata kusaka.

²⁸Neija sii eyiere netiu lpayiani, keichiaakino necham ntomonok enche ana nacham seseni lenche. Kore loacham ntomononi enye naa koon echam.

²⁹Amu meatae aikata ltung'ani oiba sesen lenye, kake keitoti neramat, ana ake naramat Kristo nkanisa,

³⁰amu ikira iyioo rubat e sesen lenye.

³¹Tankaraki ana paa, <<Keing'uaa lee menye o ng'otonye neibung'are nkitok enye, neaku ninche pukura sesen obo.>>

³²Kore ana naa nkisudoroto kitok oleng, kake kalimuta nanu mbae naipirita Kristo o nkanisa.

³³Naaku taa, enchoo metaa meata lpayian lemecham ntomononi enye ana nacham koon, naa keyiere payie eyanyit ꞉ntomononi lpayian lenye.