Read Samburu Epeso 6 Bible Online

Epeso 6 - Samburu bible

Epeso 6

¹Nakera, entining ntoiwuo inchi amu inia nairirikino taatua Laitoriani.

²Iyanyita papa lino o ng'utunyi amu ana nkitanapata ekue naata lekutuk,

³payie eitibirari mbaa inono nibik mperot kumo to nkop.

⁴Kore ntae lpayiani oaata nkera, emintogor nkera inchi, kake entubulu ninteng'eng'en, niutaa ana nayieu ꞉Laitoriani.

⁵Kore aitoki ntae rrindiki, entining lkutuaa linchi to nkop, ta nkanyit kitok o te uriata, aaning katukul ana duaake ninkoko tinining'ining Kristo.

⁶Namara ake nkonyek imulmul ana ake loojo payie eiting'id ltung'ana, kake entining ninche ana rrindiki le Kristo, iasias inia nayieu Nkai taa ltauja linchi pooki.

⁷Entaas siaai te ng'ida ana Laitoriani iasakitata namara ltung'ana,

⁸iyielolo aajo kore ake siaai pooki supat oas ltung'ani, pee era rrindik tanaa ltung'ani lemera rrindik, naa kelaaki ꞉laitoriani.

⁹Kore sii aitoki ntae lkutuaa, nejia sii ake entaasa rrindiki linchi. Emibuaaki aaitogor, amu iyiololo aajo kore Laitoriani lenche laa ninye sii linchi naa keti chumata, nemeata ninye ngela.

¹⁰Kore mbae naidipie, entogolioto taatua Laitoriani o te ngolon e nkidimata enye.

¹¹Enchopo masaa pooki e Nkai naichoo ꞉ninye sikarini lenyena, payie indimdim aaitacho aaibooi losegin pooki le Chitani.

¹²Amu mikinya iyioo larrabal aarare ltung'ana, kake ikirere laitoriak o lolo oaata nkitoo, nikirere looitore ana kop e naimin, nikirere sii lairiruani torrok otii loing'ang'e.

¹³Kore tankaraki inia, enchopo masaa pooki e larrabal naaichoo ntae ꞉Nkai, payie indimdim aairicha te inia parri torno, naa kore indipa aaterretenata nintachoo mikijariri.

¹⁴Entachoto naa iterretena nkijii inchi te ndedei, ninchopo long'o lo lgoo le sipata,

¹⁵ninchopokita nkejek inchi namuka e rreten nitumtum too Lomon Supati le seriani.

¹⁶Kore too pooki, entarrapu long'o le nkurukoto, payie indimdim aatar mbaa naaiyupuyup naang'oru ilo torno.

¹⁷Naa entang'amai ninchopchop nkopiyia e njeunoto nimbung'bung lalem la Ltau Sinyati, naa rerei le Nkai taa ilo.

¹⁸Entoomon nkata pooki to nkomono inchi pooki, eutaa ntae Ltau Sinyati. Nirripichocho ing'iriri katukul payie itumtum aatoomonoki sinyat nkatitin pooki,

¹⁹nikiomonokiki sii nanu, payie aaicho Nkai rerei lajo nkata pooki nabol nkutuk ai airo, natum atilikoi te mpijan mbaa naaisudoro ee Lomon Supati,

²⁰lolo laa tee ninche ara nanu loirruaayieki le Kristo oena. Naaku Entoomonokaaki payie atum airoro te mpijan ana nayiere payie airo.

²¹ Kore lalache lai lacham oji Tikiko, oara laisiaayiani oisiligai taatua Laitoriani, kelotu anyaki ntae mbaa ainien pooki, payie itumtum lomon lainien, niyielouu natiu.

²²Kaipaawua ꞉nanu ninye nitii tankaraki ana, payie itumtum lomon lang o payie etum sii ninye aitogolo ltauja linchi.

²³Meichoo Nkai Papa o Laitoriani Yeso Kristo, lalachera o nkanachera seriani o nchaman tenebo o nkurukoto.

²⁴Metaa munyani e Nkai tenebo o ꞉lolo pooki oaacham Laitoriani lang Yeso Kristo te nchaman nemeyagari.