Read Samburu Lpilipi 1 Bible Online

Lpilipi 1 - Samburu bible

Lpilipi 1

¹Kore ana palai naa keing'uaa Paulo tenebo o lalache lang Timoti oaara laisiaayiak le Yeso, ilo Aitejeunoni oanyutae apa. Ikiroroki sinyat pooki le Kristo Yeso ootii Pilipi, tenebo o larikok o laisiaayiak le nkanisa enche.

²Metaa munyani o seriani naing'uaa Nkai Papa lang o Laitoriani Yeso Kristo tenebo o ntae.

³Kaicho Nkai ai nache nkata pooki naparru ntae.

⁴Naa kore chiaake tanaomonoki ntae pooki, naomon te ng'ida

⁵tankaraki ninkuna tinikiretiret te siaai ee Lomon Supati ang'asu apake mparri ekue o taata.

⁶Kayielo sii katukul ajo kore Nkai natang'asua siaai lenye supat taatua ntae naa kelo kue aas aaidip ana metabau inia parri e Laitejeunoni Yeso.

⁷Keichiaakino sii tanaparraa ntae aiko inji tankaraki nikichamcham oleng. Kore abaki tanaa jila atii tanaa ang'orito Lomon Supati tanaa aitodoluta sipata e lolo Omon, itang'ara ana munyani e Nkai tenebo o nanu.

⁸Keyielo Nkai ajo kedede tanajo kacham ntae oleng te inia chaman e Yeso Kristo, nayieu nadol ntae.

⁹Kaomonoki ntae metoponunye nchaman inchi aaku kitok oleng ining'ung'u nitemtem mbaa pooki.

¹⁰Nitumutum aatisipu inia supat, niakuku ltung'ana lemeitaakino lemeata nakurrieki ana metabau inia parri e Kristo,

¹¹ebore ntae nenia sipat naaichoo ntae Yeso Kristo, payie errepi neisisi Nkai.

¹²Kayieu niyielouu lalachera lainien, nchere kore mbaa naatupukokita nanu naa keteretutua katukul aaitubulaa Lomon Supati,

¹³payie etum sikarini pooki le Kaisari o ltung'ana pooki otii ene aateyielo aajo kaena tankaraki Kristo.

¹⁴Netumo sii lalachera o nkanachera ang e Kristo kumo nkitieunoto nalikorie lomon le Nkai metii ng'ureticho tankaraki enata ai.

¹⁵Kesipa ajo kore lbata lenche, nelikoo Kristo tankaraki naata lom o nchankar, kake ketii lbata oolikoo taa ltauja supati.

¹⁶Kore lolo naa te nchaman eas nejia amu keyielo aajo kaategelua nanu Nkai matong'oro Lomon Supati.

¹⁷Kore lolo kulie nelikoo Kristo ejo pee eaku kutuaa, neas inia ejo paaitogoliki aena.

¹⁸Kake menya naa inia! Kelikoritae Kristo pooki kata, o eitaakinoi o meitaakinoi, naa kang'ida nanu teinia. Naa kalo naa kue ang'ida,

¹⁹amu kayielo ajo kore ana, naa kaaicho maatalakuni tankaraki nkomono inchi o reteto naaicho Ltau le Yeso Kristo.

²⁰Kore ntoki naanyuta naisiliguta sii oleng naa payie meatae ntoki naanyayie ꞉anyit. Naisilig ana chiaake naas maata ngureticho katukul ajo, kore to pooki naasai te sesen lai, o aichu o atua, netum Kristo rrepeta.

²¹Amu Kristo nkichon ai, naa dupoto lkiye tanaye.

²²Kake kore tanaa siaai le tipat aas tanawuon aichu naaku mayielo ajo kaa nabo agelu.

²³Kadututa mbaa are, kayieu katukul payie aing'uaa ana kichon naaku tenebo o Kristo, naa inia supat oleng ta nanu,

²⁴kake kore tankaraki ntae keikach tanabik aichu.

²⁵Kore tankaraki natisipua ajo keisupat inia taa ntae, naa kayielo ajo kabik aichu, nawuon tenebo o ntae pooki payie ibululu, ning'idada to nkurukoto,

²⁶nitumtum aating'idare Laitejeunoni Yeso oleng tankaraki nanu, tanaitoki alotu nitii.

²⁷Ntoki nabo ake naata tipat oleng, nchere payie iwuenini te nkichon inchi ana naichiaakino too Lomon Supati le Kristo, paa kore tanatumoka ayeu atoduaa ntae tanaa eitu, naning ajo intachoo katukul to nduata nabo o ltau obo inyanya larrabal le nkurukoto ee Lomon Supati.

²⁸Niminchocho eituria ntae lolo oaatayie ntae mbae to ntoki naje, kake entogolo amu tiniasias inia, neitodol ꞉Nkai ninche teinia ajo keidaari, nijeuu ntae.

²⁹Amu keichoo ntae Nkai munyani tankaraki Kristo, namara ake payie irukruk ninye kake payie itumtum sii sina tankaraki ninye.

³⁰Naa iimaritata ilo arrabal apake litoduaa anyeita, nining'itoto sii taata aajo kanyaita.