Read Samburu Lpilipi 3 Bible Online

Lpilipi 3 - Samburu bible

Lpilipi 3

¹Kore aitoki lalachera o nkanachera ainien, enting'idata taatua Laitoriani. Mainauru aigeroki ntae mbaa naigeroka apa amu tanaigeroki ntae, naa keret ntae inia payie mirriaa.

²Entirrip ate too lolo dein, lolo aasak loo ntorrok, lolo adung'ok le sesen oojo meata ajo memurati ntae payie iakuku ltung'ana le Nkai.

³Amu iyioo naa ltung'ana le Nkai oaasai Nkai erikoo Ltau lenye Sinyati, niking'idare Laitejeunoni Yeso, nimikisilig ndung'oto e sesen abaki duo aaidim nanu aisiliga.

⁴Amu tanaa keatae ltung'ani ooidim aisiliga mbaa e sesen naa nanu.

⁵Kaatumurataki ta mparri e isiet, nara loo Isirael, le ntalipa e Benjamin, nara Lburaniai nera lmakui lainien pooki loo Lburania. Kore taa mbaa naaipirita nkubung'ata ee nkitanapat ee Nkai nara apa Lparisayoi,

⁶kore to nyuata, katonyuaa aiting'id Nkai aaitam nkanisa enye sina. Kore te nkibung'ata ee nkitanapat e Nkai naa kara ltung'ani loosipat, amu kaitabayie pooki.

⁷Naaku kore apa nenia tokitin pooki naikena ajo dupoto, aikena taata ajo ntokitin e pecheu tankaraki Kristo.

⁸Ee kedede, kaiken nenia baa pooki ajo ne pecheu tankaraki inia nara ne tipat too pooki, naa kore inia nara ne tipat naa yielounoto e Laitejeunoni Yeso Laitoriani lai. Kore tankaraki Kristo naiturrayie pooki naata apa, naiken ajo ketuwuana nkik payie atum Kristo metaa lalai,

⁹naatumi aitoki taatua ninye, maaiken ꞉Nkai ajo loosipat tankaraki naibung'a nkitanapat enyena, kake payie aiken ajo loosipat tankaraki nairuko Kristo. Kore inia naa nkichooroto naing'uaa Nkai, nairichakino nkurukoto,

¹⁰payie ayielou Kristo oleng, nayielou sii inia ngolon naitipiwua ninye aitung'aa lootuata. Nayielou sii netiu tanang'arie sina, natuwuanai ninye te lkiye lenye,

¹¹aata siligi ajo kaaitipiuni kenya matung'ai lootuata.

¹²Majo taa nanu kaidipa atumo inia tanaa sii kaitabayie, kake kanyokita abaya payie atum aibung'a inia metaa nanai tankaraki kaaibung'a sii apa ꞉Kristo Yeso.

¹³Lalachera o nkanachera aainien, madol taa nanu koon etuwuana katabayie, kore ntoki nabo naas, naa kanyok arikino ntoki pooki naatii tesiedi nanyok abaki inia naatii tekue.

¹⁴Naaku kanyok abaki nkiting'oto payie atum aisula nang'amaa inia kichon e chumata naaipotoka ꞉Nkai ta Laitejeunoni Yeso.

¹⁵Kore iyioo pooki ootubulutua, neichiaakino nikiata mparrunoto natiu neja. Kake tenetii lbata linchi oodolita napaachere ana, naaku keibalakinyie ntae Nkai ajo nejia ake etiu.

¹⁶Kore nayiere naa tinikipuo kue kimbung inia nikindipa aateyielo.

¹⁷Lalachera o nkanachera ainien, Entoduaayieki nanu pooki, ning'orng'or oleng lolo ooirukurukore nikinkunari iyioo taatua nkichon.

¹⁸Amu katilika ntae ana bae nkatitin kumo, naa kaitoki ake taata aliki ntae too lkiyio, nchere keatae ltung'ana kumo oaara lmang'ati loo lomon ooipirita lmusalaba le Kristo.

¹⁹Kore nkiting'oto enche naa mutai, nera nkochuaa enche nkai enche, naa kore mbaa e nkurruna naa ninche eikarrie, neparraa ake mbaa e ana kop.

²⁰Kake kore iyioo naa keigero nkarn ang te chumata, nikintirrichuta aanyu Laitejeunoni lang Yeso Kristo eing'uaa chumata.

²¹Naa keibelekeny seseni lang oaachal nemutari, metutuwuana sesen lenye le nkitoo, te inia golon enye naidimie ninye metipika ntokitin pooki taabori nkitoria enye.