Read Samburu Lpilipi 4 Bible Online

Lpilipi 4 - Samburu bible

Lpilipi 4

¹Kore naa lalachera o nkanachera ainien nacham oleng nayieu nadol, ikinting'iding'id naa kaikarrie nanu ntae! Entacho katukul taatua Laitoriani, sotuatin lainien, imbungbung inia natiaaka ntae.

²Kajoki Ewodia o Sintek, metining'oto taatua Laitoriani.

³Kore sii iyie sotua lai odede laasichere, kaamon teretu kuna tomonok metining'oto. Ketonyua aaitubulaa Lomon Supati le Nkai tenebo o nanu o Kilement o lkulie aisiaayiak likiasicho tenebo, ootii nkarn enche mbuku e nkichui.

⁴Enting'idata taatua Laitoriani nkata pooki, naitoki ake ajo enting'idata!

⁵Enchoo edol pooki ng'ae mborron inchi. Ketataana Laitoriani.

⁶Emintanyamal ate tae bae, kake kore nkata pooki niomonmon ninchirakiki Nkai, entiliki yieunot inchi inchocho nache.

⁷Naa kore inia seriani e Nkai narepaa ning'unoto pooki ee ltung'ana, nerrip ltauja o mparrunot inchi taatua Laitejeunoni Yeso.

⁸Kore naidipie, lalachera o nkanachera, entaparrai nenia tokitin naadede o nenia naichiaakino rrepet, nenia ee sipat, nenia nemeata ntioto o nenia naachamaroi. Kore ntoki pooki naichiaakino lwuenet supat o nkanyit, entaparrai inia.

⁹Kore ntoki pooki naiteng'ena ntae o naitarasaka nanu ntae o nitining'o nitoduaa te nanu, entaas nkata pooki, naa keaku Nkai e seriani tenebo o ntae.

¹⁰Kang'ida nanu oleng taatua Laitoriani amu intodolutua aitoki aajo iyieuu nikiretret. Kayielo ajo ikiparuru chiaake kake eitu itumtum mpaach nikiretetie.

¹¹Namajoito taa nejia tankaraki naatong'orika, amu katomoo aaitiemu inia naata.

¹²Kayielo nanu netiu tanaang'oriki o tanaata te nkiputakinoto. Natomoo netiu ng'orikinoto anaa nkuputakinoto to ng'oji o ta nkata pooki o aimo tanaa aisumach, o aata naalang nayieu tanaa aatong'orika.

¹³Kaidim ataasa nenia baa pooki atii atua Kristo laaicho ngolon.

¹⁴Kake itaasa supat oleng kiteretutua ntae nanu tee nyamalitin ainien.

¹⁵Kore ntae Lpilipi iyielolo naa netiu apa payie ang'asu alikoo Lomon Supati ta Makedonia. Kore payie aing'uaa inie, naa nkanisa inchi apeny naaibung'are too kuna baa naaipirita nkichorot o ntokitin naang'amari.

¹⁶Amu kore apa ewuon ati Tesalonike, mara nkata nabo ake kiterewakita reto ee nenia naatong'orikita.

¹⁷Namara taa nkichoorot ayieita, kake kayieu payie ing'amaa mayianat naatum ꞉ilo oichooyo.

¹⁸Kore naa, katang'amayie nkichoorot pooki nikiterewakita, naa keterepaitie yieunot ainien. Kaata naa taata pooki nayieu amu kaitabaka ꞉Epapiroditas nkichoorot inchi. Kore ninche naa lasar orropili, ong'amaroi neiting'id Nkai.

¹⁹Naa kore inia Ai naisiaita, keicho ntae ntoki pooki nabana niyieuu to murdaicho enye aimu Laitejeunoni Yeso.

²⁰Metaa naa ne Nkai Papa lang nkitoo ntarasi o ntarasi. Aamin.

²¹Eroroki sinyat pooki ootii atua Laitejeunoni Yeso. Naa keiroroki sii ntae lalachera o nkanachera pooki laata tene.

²²Neiroroki sii ntae sinyat pooki le Nkai, naleng lolo le nkang e Kaisari.

²³Metaa munyani e Laitoriani Yeso Kristo tenebo o ntae pooki. Aamin.