Read Samburu Lkolosae 3 Bible Online

Lkolosae 3 - Samburu bible

Lkolosae 3

¹Kore naa tankaraki keitipiwuaki ntae tenebo o Kristo, eng'oru naa nenia baa e keper, naatii neti Kristo, ewuenita ta nkaina e tetene e Nkai.

²Entipik mparrunot inchi atua nenia baa natii keper, mara atua nenia natii nkop.

³Kore ta mbata ee mbaa e nkop, naa ituata apa naa kore taata, keisudoyieki nkichui inchi taatua Nkai tenebo o Kristo.

⁴Kore payie eibalunye kenya Kristo oara nkichui inchi, neitokini sii aaibalunyie ntae tenebo o ninye to wong'an kitok.

⁵Kore ntoki pooki e mpukunoto inchi nara ne nkop entar metua! Entar naa metuata, mboita e sesen namara na lpayian o ntomononi enye o asat pooki ee aanyit o ntolo o lng'uarra o yieunot torrok o lubo, aa ninye taa sayiata ee nkaitok e sapare.

⁶Kore tankaraki nenia baa, keirrachu ngoro e Nkai lolo lemening ninye.

⁷Kore sii apa ntae, naa ichomo tee nkichoni inchi ana lolo tung'ana, inia kata iwuenini taatua nenia ng'ok.

⁸Entung'ai nenia baa pooki! Emincho eiputakino ntae ngoro, naa entung'ai sii ntolo o mang'antiticho, nimidekdek Nkai anaa ltung'ana, niminchocho meimu nkutukie inchi rerei lemeichiaakino.

⁹Emisapa naa amu ituburkuchutua mpukunoto inchi e apa o asat enyena pooki,

¹⁰ninchopokita ate mpukunoto ng'ejuk, inia naiteng'ejukutoi nkata pooki payie eyielou sipata naipirita Nkai, neinyunyukoreii Laitainoni lenye.

¹¹Meatae ajo loo Lgirriki ira anaa loo Lyiaudi, anaa ltung'ani otumurataki tanaa leitu emurati, lomoni anaa ltung'ani leiching'a, ira rrindik anaa mira rrindik. Kristo oara pooki toki naa ninye otii pooki!

¹²Kore irara lgelunot sinyat le Nkai oaacham ninye, entaa loaata lng'er o nanai e nkocheke o ng'iriata o mborron.

¹³Enting'iri nchalan ee lkulie nipalikinono, teneatae ltung'ani oata mbae naatayie likae. Naa kore ana natapalika ntae Laitoriani, entapaliki sii ntae lkulie.

¹⁴Entoponiki kuna pooki nchaman, naa ninye naen ntoki pooki tanaboicho katukul.

¹⁵Enchoo metaa seriani e Kristo naitore atua ltauja linchi. Keipotokaki ntae inia seriani, irara le sesen obo. Entaa sii loaata nache.

¹⁶Enchoo rerei le Kristo metowuana taatua ntae te garsisicho, inteng'enana, niutaroro taatua ng'eno pooki, niranyrany sinkoliotin le Nkai o le nkisisa o looing'uaa ꞉Ltau Sinyati, aaranyaki Nkai iatata nache.

¹⁷Naa kore pooki niasias, aa taa tee rereii tanaa taa asat, entaas pooki ta nkarna e Laitoriani Yeso, inchocho Nkai Papa nache te ninye.

¹⁸Natomonok, entodoi ate taa lpayiani linchi, amu ana nairirikino ta Laitoriani.

¹⁹Lopayiani, entacham ntomonok inchi nimigorokinono ninche.

²⁰Nakera, entining ntoiwuo inchi taa mbaa pooki, amu keiting'id inia Laitoriani.

²¹Kore ntae ntoiwuo, emintogor nkera inchi, payie megila ninche ltauja.

²²Lorrindiki, entining lkutuaa linchi tana kop taa mbaa pooki, namara ake nkata nadolita ntae, eji atuwuana ltung'ana inting'idng'id, kake entining ninche taa ltauja supati iurierie Laitoriani.

²³Kore ake siaai pooki liasias, entaas taa ltauja linchi pooki, ana Laitoriani iasikitata namara ltung'ana,

²⁴amu iyielolo aajo ing'amaa ntoki naisiligie ntae Laitoriani. Esiaayia naa Laitoriani Kristo.

²⁵Kore loas ntorrok naa keitalak ꞉Nkai nenia torrok naataasa, nemeata Nkai ngela.