Read Samburu Lkolosae 4 Bible Online

Lkolosae 4 - Samburu bible

Lkolosae 4

¹Lokutuaa, entaasa rrindiki linchi nairirikino o naasipa, iyielolo sii ntae aajo iyatata Lkitok te chumata.

²Entewueni taatua nkomono, naa kore iomonitoto, entirripicho, niatata nache.

³Niomonokiki sii iyioo, metoboloki iyioo Nkai nkoitiei matilikoi rerei lenye, aalikoo kulo Omon ooipirita Kristo ooibalakinyie taata iyioo ꞉Nkai, leitu apake eibalakinyie ltung'ana tekue. Naa tankaraki sii lolo Omon paena nanu.

⁴Nikiomonokiki aitoki nanu payie atum aibalunyie to nkoitiei nayiere payie aibalunyie.

⁵Entewueni te ng'eno o ltung'ana lamara le Kristo, iasicherere nkata aaitibiraki.

⁶Enchoo nkirorot inchi metaa naairirikino nkata pooki nebor, payie iyielouu nijoijo tiniwolikiki pooki ng'ae.

⁷ Keliki ntae Tikiko lomon lainien pooki. Kera ninye lalache lang lacham, nera laisiaayiani oisiligai neasicho tenebo o nanu taatua Laitoriani.

⁸Kore payie aterewua ninye nitii, naa payie iyielouu nikitiu iyioo netum sii ninye aitogolo ntae ltauja.

⁹Kelotu ninye o Onesimas lalache lang oisiligai nikicham, nera lobo linchi. Naa keliki ninche ntae lomon pooki le ene ng'oji.

¹⁰Eiroroki sii ntae lboitiei lai Arisitarko oteenaki tenebo o nanu, o Marko apiyio le Barnabas oitaarriyianakaki apa ntae aajoki kore tanaa kelotu nitii, entang'amai!

¹¹Neiroroki sii ntae ilo Yeso oitokini ajo Yusuto. Kore taatua Lyiaudi, kulo tung'ana aapeny pukura okuni oaasita siaai tenebo o nanu tankaraki nkitoria e Nkai, netaa ninche le rereto kitok ta nanu.

¹²Neiroroki sii ntae ltung'ani linchi oji Epaparas, oara laisiaayiani le Kristo Yeso. Kenyokita ninye nkata pooki tankaraki ntae to nkomono enye, payie itumtum aaitacho irara lemeata ntioto, niatata sipata ee mbaa pooki naayieu Nkai.

¹³Kaliki ntae sipata ajo ketonyua ninye tankaraki ntae oleng o lolo otii Laodikea o lootii Ierapolis.

¹⁴Keiroroki ntae Luka, lkitarrii lang likicham, neiroroki sii ntae Demas.

¹⁵Enchoo nkirorokino ai lalachera o nkanachera ang naatii Laodikea, nirorokiki inia tomononi naji Nimpa o nkanisa nati nkaji enye.

¹⁶Kore payie eidipakini aaisomaki ntae ana palai, enchoo aitoki meisomi ta nkanisa e Laodikea nintokiki sii ntae aaisom mpalai naata ninche.

¹⁷Entiliki Arkipo aajoki, <<Todua ajo indipa ataasa ilo siaai likinchoo Laitoriani.>>

¹⁸Nanu, Paulo oigero ana kirorokino ta nkaina ai makoon. Entaparru enata ai. Metaa munyani e Nkai tenebo o ntae.