Read Samburu 1 Ltesalonike 4 Bible Online

1 Ltesalonike 4 - Samburu bible

1 Ltesalonike 4

¹Kore naa aitoki lalachera o nkanachera, ikilej ntae nikintaarriyian ta Laitoriani Yeso payie iwuenini te nkichon naiting'id Nkai ana nikinteng'enita ntae. Kore ana niwuenitata aaiko nejia, enchom naa kue oleng inkoko nejia!

²Amu iyielolo nkitaarriyiana nikinchoo ntae, naichoo iyioo Laitoriani Yeso.

³Naa ana yieuna e Nkai, nchere iakuku loosinya payie ilamlam loloito pooki,

⁴metaa meata linchi lemeyielo neiko teneyieki koon nkitok naayem, newueni te sinyaticho o ta nkanyit,

⁵namara too ng'uarrat torrok tana neiko lkulie ochon lemeiyielo Nkai.

⁶Naaku kore tana bae, meatae ltung'ani oitarroki nesap lalache tanaa nkanache enye, amu Laitoriani oitalaku nenia pooki ana apake nikitilikita ntae tekue, niking'ode sii ntae aaitaarriyian.

⁷Amu eitu eipot iyioo Nkai payie kiwueni taatua mbaa nemeichiaakino, kake payie ikiwueni taatua sinyaticho.

⁸Tankaraki inia, kore loany ana naa mara ltung'ani etanya, kake Nkai naicho ntae Ltau Sinyati.

⁹Kake kore mbaa naaipirita nchaman ee lalachera o nkanachera, meyiere payie eigeroki ntae ltung'ani amu keitanapa ntae Nkai payie ichamama maate.

¹⁰Naa kedede, ichamcham lalachera o nkanachera ootii mbat pooki e Makedonia. Kake ikintarrap ntae lalachera o nkanachera, payie intulusoo inia oleng,

¹¹ninyoknyok aaitirring'a te nkichon inchi, niasias mbaa inchi, niasias sii aitoki siaai linchi to nyuata, tana apa nikintaarriyianakita ntae,

¹²payie iwuenini to nkoitiei naipida nemeata ltung'ani lisiliglig tee yieunot inchi.

¹³Lalachera o nkanachera, mikiyieu naaku miyielolo mbaa ee lolo alachera ooilurate, payie misinanionio ana lolo lemeata siligi.

¹⁴Kore ana nikiruk aajo ketua Yeso neitoki apiu, nejia sii ake etiu, ikiruk aajo keyau ꞉Nkai ninye tenebo o lolo ooilurate etii atua Yeso.

¹⁵Kore tankaraki inia, ikiliki ntae ana natejo Laitoriani, nchere kore iyioo ooichu ootung'ayieki ana metuchukunyie Laitoriani, naa meatae nikinko tinikinturuk tekue lolo ooilurate.

¹⁶Amu kore teneitaini nkitanapata to ltoilo la lmalaika kitok o to wochoto e mowuo e Nkai, nedou Laitoriani koon eing'uaa chumata. Kore lootuata taatua Kristo nepiu tekue.

¹⁷Kore ake tesiedi inia, kore iyioo ooichu ootung'ayieki, newuapari aailiepie tenebo o ninche taatua nkidisin, payie kinang'are Laitoriani to loing'ang'e, naaku ikiboitiere Laitoriani ntarasi.

¹⁸Tankaraki inia, entogoloto naa ltauja linchi too lolo rereii.