Read Samburu 1 Timoti 4 Bible Online

1 Timoti 4 - Samburu bible

1 Timoti 4

¹Keibalunyie ꞉Ltau Sinyati aipidaki nchere kore taa ng'amat e siedi naa keing'uaa lbata nkurukoto, neirukurukore ltauja oaasapicho o nkiteng'ena ee lairiruani.

²Kore inia kiteng'ena naa keimu ltung'ana oaasapicho neitaakino, ootiminchiraki ltauja metaa merokure emusu nadede o nemedede.

³Nemitiki ltung'ana eyemicho, neitoki sii aamitiki enya mbata ee ndaki naaitayia Nkai payie eng'amaa ta nache ꞉lolo ooiruk neyielo ndedei.

⁴Amu kore ntoki pooki naitibira Nkai naa keisupat, nemeata ntoki naanyi teneng'amari ta nache,

⁵amu keitisinyi te rerei le Nkai o to nkomono.

⁶Kore tininteng'en lalachera o nkanachera kuna baa, niaku laisiaayiani supat le Kristo Yeso, neitodolu inia ajo itubulua taatua rerei le nkurukoto o le inia kiteng'ena supat nirukurukore.

⁷Tapaachere nenia atinin nemeitaa Nkai toki nemeata tipat, kake nteng'ena koon payie iaku ltung'ani ourie Nkai.

⁸Amu kore tenelo ltung'ani alak nkejek naa keata inia nkini tipat te sesen lenye, kake kore uriata e Nkai naa keata tipat taa mbaa pooki. Amu keata lekutuk le nkichon e taata o ne kenya,

⁹naa rerei ilo oirukoi, neichiaakino neng'amari pii.

¹⁰Kore tankaraki inia, ikiasita siaai to nyuata o te nkinyinyiret, amu Nkai naichu etii siligi lang, laa ninye Laitejeunoni loo ltung'ana pooki, neisul too ꞉lolo ooiruk ninye.

¹¹Intaarriyianicho, ninteng'enicho kuna baa.

¹²Nimincho ltung'ani kimen iyie tankaraki nira lelerie, kake kore te rerei lino o to wuanata ino o te nchaman ino o to nkurukoto ino o te sinyaticho ino, taa nkitanyanyukoto naduaaya lairukok.

¹³Kore nias ana mayeu, tonyuaa somaki ltung'ana Lkigerot Sinyat, nintaarriyian, niteng'en.

¹⁴Mintololoki inia kichooroto nikitii atua, nikinchooki apa ta naibon payie kinteleki lturrur laa lpayiani le nkanisa nkaik.

¹⁵Tipika kuna baa atua ltau lino, nimbung payie edol ltung'ana pooki aajo iloito kue.

¹⁶Toduaa koon o nkiteng'ena ino, niwuon taatua nenia baa, amu kore tinias nejia, naa intejeu koon o lolo likining iyie.